សាធារណរដ្ឋឆែកបន្លំ លួច យកម៉ាស ដែលចិនផ្ញើឲ្យអ៊ីតាលី?
សាធារណរដ្ឋឆែកកំពុងរងការចោទប្រកាន់ថា បានបន្លំលួច យកម៉ាស និងគ្រឿងបរិក្ខាពេទ្យ ដែលប្រទេសចិន បញ្ជូនទៅឲ្យអ៊ីតាលី។ អ៊ីតាលី ដែលកំពុងរងគ្រោះ មានមនុស្សស្លាប់ដោយកូវីដ១៩ ច្រើនជាងគេក្នុងពិភពលោក។ តាមកាសែតអ៊ីតាលី Répubblica ចុះផ្សាយកាលពីថ្ងៃសៅរ៍ អាជ្ញាធររបស់សាធារណរដ្ឋឆែក បានចាប់រឹបអូសយកម៉ាស និងឧបករណ៍ពេទ្យ ជិត ៧សែន ក្នុងក្របខ័ណ្ឌនៃការបង្រ្កាបក្រុមឈ្មួញជួញដូរ ដែលចង់ឆ្លៀតកេងចំណេញពីជំងឺរាតត្បាត កូវីដ១៩។
ចុះផ្សាយនៅថ្ងៃ៖
ស្តាប់ - ០២:៥០
ហេតុការណ៍កើតឡើងនៅយប់ថ្ងៃអង្គារដើមសប្តាហ៍នេះ នៅពេលប៉ូលិស និងគយរបស់ប្រទេសឆែក ចុះចាប់ រឹបអូសយក ម៉ាស និងឧបករណ៍សម្រួលផ្លូវដង្ហើម ជិត ៧សែន នៅក្នុងឃ្លាំងស្តុកទំនិញរបស់ក្រុមហ៊ុនឯកជនមួយ នៅភាគខាងជើងប្រទេស។ អាជ្ញាធរឆែក បានបង្ហាញពីជោគជ័យធំធេង ក្នុងការបង្រ្កាបទៅលើក្រុមឈ្មួញ ដែលបើតាមអាជ្ញាធរ បានប្រមូលស្តុកម៉ាសនិងគ្រឿងបរិក្ខាពេទ្យ ដើម្បីលក់ក្នុងទីផ្សារងងឹតក្នុងតម្លៃខ្ពស់។
តាម កាសែតក្នុងស្រុក អាជ្ញាធរឆែក បាន យកម៉ាសនិង ឧបករណ៍ ពេទ្យដែលបានរឹបអូសនៅថ្ងៃនោះ ទៅ ចែកចាយបន្ត ទៅមន្ទីរពេទ្យ ឆែក ដែលពេលនេះ រាប់ឃើញមានអ្នកឆ្លង មេរោគកូរ៉ូណា ដល់១០០០នាក់ នៅទូទាំងប្រទេស។
ការរឹបអូសម៉ាសពីឈ្មួញងងឹត បានក្លាយទៅជារឿងប្លន់ លួចយកម៉ាសដែលប្រទេសចិន ផ្ញើទៅឲ្យអ៊ីតាលី។ គឺអ្នកស្រាវជ្រាវឆែក ម្នាក់ ដែលជាទីប្រឹក្សារបស់សមាជិកសភាមកពីគណបក្សប្រឆាំង ដែលជាអ្នកទាញសញ្ញាអាសន្នពីភាពមិនប្រក្រតីលើកនេះ ព្រោះថា នៅលើកេស ម៉ាស ដែលគេថតបង្ហោះផ្សព្វផ្សាយ គេឃើញ ស្លាកសញ្ញាយ៉ាងច្បាស់ ទង់ជាតិ ចិន និងអ៊ីតាលី និងសារគាំទ្រ របស់ប្រជាជនចិន សម្រាប់អ៊ីតាលី។ អ្នកស្រាវជ្រាវឆែកបានបញ្ជូនបន្ត រូបភាពនិងវីដេអេទៅអង្គការក្រៅរដ្ឋាភិបាលនៅក្នុងសហភាពអឺរ៉ុប ដែលបានទាមទារការស្រាយបំភ្លឺរបស់រដ្ឋាភិបាលឆែក។ តាមកាសែតបារាំង Le Parisien កេសម៉ាសដែលអាជ្ញាធរឆែករឹបអូស និងចែកចាយ ទៅតាមមន្ទីរពេទ្យ ឆែក តាមពិត ជាអំណោយរបស់កាកបាទក្រហមចិន ប្រចាំខេត្ត Zhejiang សម្រាប់មន្ទីរពេទ្យអ៊ីតាលី។
រដ្ឋមន្រ្តីក្រសួងមហាផ្ទៃ ឆែក ដែលបានបញ្ជាឲ្យមានការស៊ើបអង្កេត ស៊ីជំរៅ នៅទីបំផុត បានទទួលស្គាល់កាលពីថ្ងៃសុក្រថា មួយផ្នែកនៃម៉ាស ដែលអាជ្ញាធរបានរឹបអូស ពិតជាកេសម៉ាស អំណោយរបស់ប្រទេសចិន សម្រាប់អ៊ីតាលី។ ប៉ុន្តែ អ្វីដែលគេនៅមិនទាន់ដឹងគឺថា ហេតុផលដែលធ្វើឲ្យកេសម៉ាស អំណោយរបស់ចិន មកស្ថិតក្នុងឃ្លាំង ខុសច្បាប់ ក្នុងប្រទេសឆែកនៅពេលនេះ។
តាមការអះអាងរបស់ រដ្ឋមន្រ្តីក្រសួងមហាផ្ទៃឆែក រដ្ឋាភិបាលឆែក គ្មានចេតនាចង់ចាប់រឹបអូសយកម៉ាស ដែលចិនផ្ញើទៅឲ្យអ៊ីតាលីនោះទេ។ លោកបញ្ជាក់ដែរថា អ៊ីតាលីនឹងមិនខាតបង់អ្វីនោះទេ ព្រោះថា នៅពេលនេះ ឆែកបានទាក់ទងទៅអាជ្ញាធរចិន នៅខេត្ត Zhejiang ដើម្បី ដោះស្រាយបញ្ហាយល់ច្រលំលើកនេះ។ គ្រាន់តែថា ម៉ាសដែលគួរទៅដល់មន្ទីរពេទ្យ អ៊ីតាលី ដែលកំពុងប្រឈមខ្លាំងនឹងការខ្វះម៉ាស និងសំភារៈពេទ្យ ត្រូវបានចែកចាយ អស់រួចទៅហើយ ទៅមន្ទីរពេទ្យនៅប្រទេសឆែក។ រឿងដណ្តើមម៉ាសគ្នាធ្លាប់កើតមានកន្លងមកហើយ រវាងអាជ្ញាធរខេត្ត នៅប្រទេសចិន នៅពេល អាជ្ញាធរខេត្ត បានរឹបអូសយកម៉ាស ពីកប៉ាល់ ដែលត្រូវធ្វើដំណើរសំដៅ ខេត្តមួយទៀត។ រឿងនេះធ្វើឲ្យគេនឹកទៅដល់ពាក្យរបស់នាយករដ្ឋមន្រ្តីបារាំង លោកអេឌ័រ ហ្វីលីព្វ ដែលថា នៅក្នុងបរិបទនៃការរាតត្បាតកូរ៉ូណាវីរុស មនុស្សជាតិនឹងបង្ហាញធាតុពិតរបស់ខ្លួន ដែលមួយអាចជារឿងល្អផូផង់ និងមួយទៀត អាចរឿងខ្មៅងងឹត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ