អ៊ីតាលីធ្លាក់ខ្លួនរងគ្រោះកាន់តែខ្លាំង ដោយសារកូវីដ ១៩
អ៊ីតាលីកាលពីថ្ងៃសុក្រម្សិលមិញ បានរាប់ឃើញមានមនុស្សស្លាប់ ច្រើនបំផុតមិនធ្លាប់ មាន ដល់ទៅ ៦២៧នាក់ ក្នុងរយៈពេលតែ២៤ម៉ោង។ ការណ៍នេះធ្វើឲ្យអ៊ីតាលីដែល មានអ្នកស្លាប់ដោយសារកូវីដ១៩ ច្រើនប្រទេសចិន តាំងពីថ្ងៃសុក្រម្សិលមិញ មានចំនួនមនុស្សស្លាប់សរុប ៤០៣២នាក់ ចំណែកករណីឆ្លងវិញ កើនឡើងដល់ជាង ៤ម៉ឺន ៧ពាន់នាក់ បន្ទាប់ គេរាប់ឃើញមានមនុស្សឆ្លងថ្មី ប្រមាណ ៦ពាន់នាក់ ក្នុងរយៈពេល តែមួយថ្ងៃ។ នៅពេលរដ្ឋាភិបាលគ្រោងពន្យារពេលក្រុងមនុស្សឲ្យនៅក្នុងផ្ទះ អាជ្ញាធរក្នុងតំបន់ភាគខាងជើង អ៊ីតាលី ដែលរងគ្រោះខ្លាំងជាងគេដោយសារកូវីដ ១៩ បានពង្រាយរួចហើយ ទាហានអ៊ីតាលី ដើម្បី ជួយប៉ូលិស ក្នុងការរឹតបន្តឹង ហាមមិនឲ្យមនុស្ស ដើរចេញក្រៅផ្ទះ។
ចុះផ្សាយនៅថ្ងៃ៖
ស្តាប់ - ០២:០៧
នៅអ៊ីតាលី វិធានការរបស់រដ្ឋាភិបាល ក្នុងការដាក់មនុស្សឲ្យនៅក្នុងផ្ទះ នៅមិនទាន់មានប្រសិទ្ធិភាព ជួយកាត់បន្ថយចំនួនមនុស្សឆ្លងមេរោគកូរ៉ូណានោះទេ។ តួលេខរបស់អាជ្ញាធរសុខាភិបាលអ៊ីតាលី បានបង្ហាញថា ករណីអ្នកឆ្លងកូរ៉ូណាវីរុសថ្មី បានកើនឡើង ជារៀងរាល់ថ្ងៃ។ ជាក់ស្តែង នៅក្នុងថ្ងៃសុក្រតែមួយ អ៊ីតាលី មានចំនួនមនុស្សផ្ទុកមេរោគកូរ៉ូណា ថ្មី ចំនួន ៦ពាន់នាក់ ដែលធ្វើឲ្យអ៊ីតាលី មានចំនួនមនុស្សឆ្លងមេរោគកូរ៉ូណា សរុប ជាង ៤៧០០០នាក់។ សម្រាប់អ្នកជំនាញ សុខភាព ចំនួនមនុស្សឆ្លងកូរ៉ូណាវីរុស អាចច្រើនតួលេខ របស់រដ្ឋាភិបាលដល់ទៅ ១០។ ដោយសារ ការធ្វើតេស្ត សំដៅតែអ្នកដែលមានជម្ងឺ មានរោគសញ្ញា រដ្ឋាភិបាលអ៊ីតាលី នៅមិនតែមិនដឹងច្បាស់ថា តើមានមនុស្សប៉ុន្មាននាក់ដែលកំពុងផ្ទុកមេរោគកូរ៉ូណាវីរុស ព្រោះថា នៅមានមនុស្សជាច្រើន នៅតែបន្តដើរចេញទៅក្រៅ ដែលទាំងពួកគេ អាចផ្ទុក និងចំលងទៅមនុស្សដទៃ។
នៅអ៊ីតាលី កូវីដ១៩បានសម្លាប់មនុស្សច្រើនជាងនៅប្រទេសចិន តាំងពីថ្ងៃព្រហស្បតិ៍។ នៅពេលមន្ទីរពេទ្យអ៊ីតាលី ចាប់ទ័ល ខ្វះសំភារៈ និងគ្រែសម្រាប់ទទួលអ្នកជំងឺ ទីភ្នាក់ងារវិភាគលើបណ្តាញទូរស័ព្ទ បង្ហាញថា គិតមកត្រឹមថ្ងៃព្រហស្បតិ៍ ប្រជាជនអ៊ីតាលី ប្រមាណ ៤០ភាគរយ នៅតែបន្ត ចេញដើរទៅក្រៅ ជិះរថភ្លើងក្រោមដី ពេញៗ ហាក់ដូចជាគ្មានរឿងអ្វីកើតឡើង។
ប្រឈមនឹងការរំលោភបំពានរបស់ប្រជាជនអ៊ីតាលី ដែលនៅតែបន្តដើរចេញ ទៅខាងក្រៅ អាជ្ញាធរគ្រប់គ្រងតំបន់ភាគខាងជើងអ៊ីតាលី ដែលរងគ្រោះខ្លាំងជាងគេដោយសារជំងឺរាតត្បាត កូវីដ ១៩ បានអំពាវនាវសុំឲ្យរដ្ឋាភិបាល បិទទីក្រុងទាំងស្រុង បិទហាងលក់ទំនិញ លើកលែងហាងលក់គ្រឿងបរិភោគ ហើយនិងហាមមិនឲ្យមនុស្សដើរចេញទៅក្រៅ សូម្បីទៅរត់ហាត់ប្រាណក៏ដោយ។ នៅមុនការសម្រេចថ្នាក់ជាតិ អាជ្ញាធរនៅតំបន់ឡំបាឌី បានចាត់វិធានការផ្ទាល់រួចហើយ ដូចជា ដាក់ពង្រាយ ទាហាន ជាង១០០នាក់ នៅទីក្រុងសេដ្ឋកិច្ច មីឡង់ Milan ដើម្បី ជួយពង្រឹងការងាររបស់ប៉ូលិស ក្នុងការរឹតបន្តឹង ហាមមិនឲ្យមានវត្តមានរបស់មនុស្សនៅតាមផ្លូវ សួនកំសាន្ត ឬ កន្លែងសាធារណៈផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ