Covid-១៩៖រដ្ឋាភិបាលបារាំងចេញវិធានការថ្មីដើម្បីកាត់បន្ថយល្បឿននៃមេរោគកូរ៉ូណាថ្មី
នៅក្នុងប្រទេសបារាំង ចំនួនមនុស្សស្លាប់ដោយជំងឺ Covid-១៩ មាន ៩១នាក់ និងអ្នកឈឺបានកើនដល់ ៤ ៥០០នាក់ ក្នុងនោះមាន ៣០០នាក់កំពុងស្ថិតក្នុងស្ថានភាពធ្ងន់ធ្ងរ។ តួលេខនេះបានប្រកាសដោយអគ្គនាយកសុខាភិបាលលោកយេរ៉ូម សាលឡូម៉ុងដែលឈរក្បែរនាយករដ្ឋមន្រ្តីលោកអេឌ័រ ហ្វីលីបនាយប់ថ្ងៃសៅរ៍ ទី១៤ មីនា។ ទន្ទឹមនឹងប្រកាសពីតុល្យការជនរងគ្រោះដោយ Covid-១៩ លោកសាលឡូម៉ុងក៏បានប្រកាសពីការឈានចូលដំណាក់កាលទី៣ នៃការឆ្លងរាលដាលនៃ Covid-១៩។ តែអ្វីដែលបានធ្វើឲ្យពលរដ្ឋបារាំងទូទៅភ្ញាក់ផ្អើល និងមិនបានរង់ចាំ គឺការប្រកាសរបស់លោកអេឌ័រ ហ្វីលីបនូវវិធានការបន្ថែមដើម្បីទប់ស្កាត់ការឆ្លងរាលនៃមេរោគកូរ៉ូណាថ្មី។ លោកហ្វីលីបមានជំនឿលើសមត្ថភាពរបស់ពលរដ្ឋបារាំងគ្រប់រូបដែលយល់ពីស្ថានភាពធ្ងន់ធ្ងន់ពេលនេះ ហើយប្រកាន់ខ្ជាប់នូវឥរិយាបទជាពលរដ្ឋប្រកបដោយការទទួលខុសត្រូវ និងសាមគ្គីភាព។
ចុះផ្សាយនៅថ្ងៃ៖
ស្តាប់ - ០១:២៦
« ដោយបានជជែកជាមួយប្រធានាធិបតី ខ្ញុំបានសម្រេចចិត្តបិទទ្វាររហូតដល់មានសេចក្តីសម្រេចថ្មីចាប់ពីរំលងអធ្រាតយប់ថ្ងៃសៅរ៍ ទី១៤ មីនាទៅ គ្រប់ទីកន្លែងសាធារណៈទាំងអស់ដែលមិនចាំបាច់សម្រាប់ជីវិតរបស់ប្រទេស។ ទីកន្លែងសាធារណៈមិនចាំបាច់ទាំងនោះមានជាពិសេស ភោជនីយដ្ឋាន ហាងកាហ្វេ រោងកុន និងរង្គសាល។
ទីកន្លែងសាសនាបន្តបើកទ្វារ តែការប្រមូលផ្តុំ និងការប្រារព្ធពិធីផ្សេងៗត្រូវលើកពេលទៅថ្ងៃក្រោយវិញ។ ហាងលក់ទំនិញទាំងអស់ក៏ត្រូវបិទទ្វារដែរ វាលើកលែងតែហាងលក់ទំនិញចាំបាច់ប្រចាំថ្ងៃមួយចំនួនដែលបន្តបើកទ្វារ រួមមាន ហាងលក់គ្រឿងឧបភោគ បរិភោគ ឳសថស្ថាន ស្ថានីយ៍លក់ប្រេង ធនាគារ និងហាងលក់បារី កាសែត ទស្សនាវដ្តី។ ចំណែកសេវាសាធារណៈសំខាន់ៗសម្រាប់បម្រើពលរដ្ឋបារាំងក៏បន្តដំណើរការដែរ។
ទន្ទឹមគ្នានេះ មធ្យោបាយដឹកជញ្ជូនសាធារណៈបន្តដំណើរការធម្មតា។ តែខ្ញុំសូមអំពាវនាវដល់ពលរដ្ឋទាំងអស់កាត់បន្ថយការធ្វើដំណើររបស់ខ្លួន ពិសេសចៀសវាងការធ្វើដំណើរពីក្រុងមួយទៅក្រុងមួយ ពីខេត្តមួយទៅខេត្តមួយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ