កូវីដ១៩ ៖ ហេតុអ្វីបារាំង ព្រមាន មិនឱ្យប្រើពពួកថ្នាំ ប្រឆាំងនឹងការរលាក Ibuprofène ?
រដ្ឋមន្ត្រីក្រសួងសុខាភិបាលបារាំង លោក អូលីវីយ៉េ វេរ៉ង់ (Olivier Véran) បានចេញសារព្រមាននៅថ្ងៃ សៅរ៍ទី ១៤មីនា ២០២០នេះ ប្រឆាំងនឹងការប្រើប្រាស់ពពួកថ្នាំ Ibuprofène។ ក្នុងខណៈដែលប្រទេសបារាំងកំពុងប្រយុទ្ធប្រឆាំងទប់ស្កាត់ការរាតត្បាតនៃវីរុសកូរ៉ូណាថ្មី លោករដ្ឋមន្ត្រីបានណែនាំមិនឱ្យអ្នកមានអាការៈក្តៅខ្លួនផ្តាសាយ ទទួលទានពពួកថ្នាំ ប្រឆាំងនឹងការរលាកបង្កឡើងដោយមេរោគ ដូចយ៉ាង Advil ឬ Nurofenទេ។ ហេតុអ្វី ?
ចុះផ្សាយនៅថ្ងៃ៖
ស្តាប់ - ០២:០២
“ការប្រើថ្នាំ ពពួកប្រឆាំងនឹងការរលាក (បង្កឡើងដោយមេរោគ) ដូចជាពពួកថ្នាំ Ibuprofène ឬ Cortisone … អាចជាកត្តានាំឱ្យមានការបង្ករោគកាន់តែធ្ងន់ធ្ងរ។ ក្នុងករណីមានអាការៈក្តៅខ្លួន សូមទទួលទានពពួកថ្នាំ ប៉ារ៉ាសេតាម៉ុល ! ហើយបើអ្នកកំពុងទទួលទានថ្នាំប្រឆាំងនឹងការរលាក និងមានការសង្ស័យ សូមទៅពិគ្រោះជាមួយគ្រូពេទ្យ”។ នេះជាសារណែនាំរបស់លោករដ្ឋមន្ត្រីក្រសួងសុខាភិបាលបារាំង Olivier Véran។
សារណែនាំរបស់លោករដ្ឋមន្ត្រីធ្លាក់មក ក្រោយពីមានគ្រូពេទ្យជាច្រើននាក់បានលើកឡើងថាមានករណីអ្នកជំងឺកូវីដ១៩ វ័យក្មេង មានសុខភាពល្អ គ្មានកត្តាហានិភ័យ តែបែរធ្លាក់ខ្លួនឈឺធ្ងន់ខ្លាំង គឺក្រោយពីបានទទួលទានថ្នាំពពួក Ibuprofène នៅពេលក្តៅខ្លួន។
សូមបញ្ជាក់ថាពពួកថ្នាំ Ibuprofène ដែលមានដាក់លក់លើទីផ្សារ និងអាចរកទិញបានសេរី ដោយគ្មានវេជ្ជបញ្ជា ក្រោមឈ្មោះផ្សេងៗជាច្រើន ដូចជា Advil ឬ Nurofen អាចបង្កផលវិបាកខ្លាំង ជាយថាហេតុណាមួយ ព្រោះពពួកថ្នាំនេះអាចធ្វើឱ្យការបង្ករោគដែលមានស្រាប់ក្នុងសរីរាង្គកាយ កាន់តែធ្ងន់ធ្ងរ។ ដោយសារតែមូលហេតុនេះហើយបានជា តាំងពីពាក់កណ្តាលខែមករាមក អាជ្ញាធរផ្នែកសុវត្ថិភាពសុខាភិបាលបារាំង បានចេញបម្រាម មិនឱ្យតាំងពពួកថ្នាំ Ibuprofene Paracetamol (Doliprane Efferalgan …) នៅក្បែរដៃដែលអ្នកទិញអាចលូកយកដោយខ្លួនបានដោយសេរី។ Ibuprofène ក៏ដូចជាពពួkថ្នាំparacétamol និង Aspirine ដែរ អាចបង្កឱ្យខូចថ្លើម ដល់ស្លាប់ប្រសិនបើអ្នកទទួលទានហួសកំរិត។
ជាមួយនឹងការណែនាំមិនឱ្យប្រើពពួកថ្នាំ Ibuprofène នេះ ក្នុងពេលសង្ស័យមានឆ្លងកូវីដ១៩ លោករដ្ឋមន្ត្រីសង្ឃឹមលើស្មារតីរបស់ប្រជាពលរដ្ឋគ្រប់រូប ក្នុងការសម្របខ្លួននិងគោរពតាមបទបញ្ជារបស់អាជ្ញាធរ ដើម្បីការពារខ្លួនឯងផង និងការពារសមូហភាពផង ពីកូរ៉ូណាវីរុសថ្មី ព្រោះបារាំងកំពុងស្ថិតក្នុងដំណាក់កាលដំបូងនៃរាតត្បាតរបស់វីរុសតែប៉ុណ្ណោះ។ នេះបើតាមប្រសាសន៍របស់លោករដ្ឋមន្ត្រីដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ