សហភាពអឺរ៉ុប៖ អ្នកផលិតទឹកឃ្មុំ បារម្ភពីការនាំចូលទឹកឃ្មុំពីបរទេស និងលក់ក្នុងតម្លៃថោក
ចុះផ្សាយនៅថ្ងៃ៖
នៅក្នុងរង្វង់សហភាពអឺរ៉ុប អ្នកផលិតទឹកឃ្មុំ កំពុងសម្តែងក្តីព្រួយបារម្ភជាខ្លាំងចំពោះការនាំចូលទឹកឃ្មុំពីបរទេស ពិសេសពីទ្វីបអាស៊ី។ ទឹកឃ្មុំពីអាស៊ីដាក់លក់លើទីផ្សារអឺរ៉ុបក្នុងតម្លៃថោកខ្លាំង ដែលក្រុមអ្នកផលិតទឹកឃ្មុំនៅអឺរ៉ុប យល់ថា មានការប្រកួតប្រជែងដោយមិនស្មោះត្រង់។ ប្រឈមនឹងបញ្ហានេះ ក្រុមអ្នកផលិតទឹកឃ្មុំ ស្នើឱ្យសហភាពអឺរ៉ុប ត្រូវរកវិធានការនិងដំណោះស្រាយជាបន្ទាន់។
សហភាពអឺរ៉ុប នាំចូលទឹកឃ្មុំពីបរទេស ក៏ព្រោះតែ មិនអាចផលិតទឹកឃ្មុំ បានគ្រប់តាមតម្រូវការ និងមិនអាចបំពេញចិត្តអ្នកប្រើប្រាស់ ទាំងរសជាតិនិងទាំងបរិមាណ។ ដូច្នេះ ការនាំចូលផលិតផលទឹកឃ្មុំ ជារឿងជៀសមិនផុត។ អឺរ៉ុបនាំចូលទឹកឃ្មុំប្រមាណជាង៤០ភាគរយ នៃតម្រូវការប្រើប្រាស់ ហើយជាងពាក់កណ្តាល នាំចូលមកពីស្រុកចិន ហើយនិងប្រទេសមួយចំនួនទៀត នៅអាស៊ី។
ប៉ុន្មានឆ្នាំចុងក្រោយនេះ អ៊ុយក្រែន និង ចិន ប្រជែងគ្នា នាំចូលទឹកឃ្មុំចូលមកទីផ្សារសហភាពអឺរ៉ុប។ អ៊ុយក្រែន មានអាទិភាពមួយ ដោយបានការអនុគ្រោះពន្ធនាំចូល តែចិនវិញ ចិនអាចមានលទ្ធភាពផ្គត់ផ្គង់ទីផ្សារ បានបរិមាណច្រើនជាងអ៊ុយក្រែន។ ក៏ប៉ុន្តែ បញ្ហានៅត្រង់ថា ផលិតផលទឹកឃ្មុំរបស់ចិន ទំនង«មិនសូវសុទ្ធ»។
«ជាទូទៅ ទឹកឃ្មុំនាំចូលពីប្រទេសអាស៊ី ដាក់លក់នៅលើទីផ្សារអឺរ៉ុប ក្នុងតម្លៃថោកជាងច្រើនណាស់ បើធៀបនឹងទឹកឃ្មុំផលិតនៅក្នុងស្រុកអឺរ៉ុប។ ហេតុផលមួយដែលអាចពន្យល់បានយ៉ាងងាយបំផុតនោះ ក៏ព្រោះតែទឹកឃ្មុំនោះ មិនសុទ្ធល្អ ហើយក៏គេលំបាកនឹងរកមើលឱ្យបានត្រឹមត្រូវពីដំណើរការផលិត ទៅទៀត។» នេះជាការពន្យល់របស់លោក Etienne Bruneau ប្រធានក្រុមការងារផ្នែកទឹកឃ្មុំ នៃគណៈកម្មការជំនាញកសិកម្ម របស់សហភាពអឺរ៉ុប។
តាមអ្នកជំនាញរូបនេះ នៅលើទីផ្សារអឺរ៉ុប គេអាចរកឃើញទឹកឃ្មុំមិនសុទ្ធ ក្នុងនោះ មានលាយ ទឹកស៊ីរ៉ូ ទឹកស្ករ ៧០ភាគរយ ហើយទឹកឃ្មុំ មានតែ៣០ភាគរយប៉ុណ្ណោះ។ ទឹកឃ្មុំមិនសុទ្ធ១០០ភាគរយប្រភេទបែបនេះ មានដាក់លក់លើទីផ្សារ ក្នុងតម្លៃថោកមែនទែន ដែលធ្វើឱ្យក្រុមអ្នកផលិតទឹកឃ្មុំនៅអឺរ៉ុប ចោទប្រកាន់ពីការប្រកួតប្រជែងដោយមិនស្មោះត្រង់។ ការរកស៊ីប្រកួតប្រជែងមិនស្មោះត្រង់នេះ ធ្វើអ្នកផលិតទឹកឃ្មុំអឺរ៉ុប ក្តៅក្រហាយ ហើយនិងព្រួយបារម្ភ។ ករណីនេះ បានធ្វើឱ្យអ្នកចិញ្ចឹមទឹកឃ្មុំនៅអឺរ៉ុប មិនអាចបន្តទ្រាំរកស៊ីលក់ទឹកឃ្មុំតទៅទៀត។ អ្នកខ្លះ បានសម្រេចចិត្តឈប់ចិញ្ចឹមឃ្មុំ។ ជាក់ស្តែង នៅអាល្លឺម៉ង់ដើមឆ្នាំ២០១៩ ចំនួនកសិករអ្នកចិញ្ចឹមឃ្មុំ បានថយចុះ ប្រមាណ៤ភាគរយ។
ការប្រកួតប្រជែកទីផ្សារមិនស្មោះត្រង់ ជារឿងមួយ តែការសម្លាប់ឃ្មុំអឺរ៉ុប ក៏ជារឿងធ្ងន់បន្ថែមទៀត។ ការប្រែប្រួលអាកាសធាតុ និងភ្លើងឆេះព្រៃ ក៏ជាផ្នែកមួយនៃការកាត់បន្ថយចំនួនសត្វឃ្មុំ។ ក្នុងវិស័យកសិកម្ម ការបាញ់ថ្នាំគីមីសម្លាប់សត្វល្អិតឬដង្កូវ ក៏សម្លាប់សត្វឃ្មុំដែរ។ នៅបារាំង រដូវវងាម្តងៗ ឃ្មុំងាប់អស់ប្រមាណ៣០ភាគរយ ហើយឃ្មុំងាប់ ក៏ច្រើនដែរ ដោយសារតែថ្នាំគីមីកសិកម្ម។ អ្នកការពារបរិស្ថាន និងអ្នកធ្វើការវិស័យចំណីអាហារ ទាមទារជាយូរមកហើយ ឱ្យបណ្តារដ្ឋសមាជិកសហភាពអឺរ៉ុប បញ្ឈប់ឬកាត់បន្ថយ ការប្រើប្រាស់សារធាតុគីមីនិងថ្នាំសម្លាប់សត្វល្អិតក្នុងវិស័យកសិកម្ម ។
តាមការសង្កេតរបស់អ្នកជំនាញបារាំង ប្រសិនបើស្ថានការណ៍នៅបន្តដុនដាបធ្ងន់ធ្ងរបែបនេះ ហើយបើគេគ្មានដំណោះស្រាយសមរម្យនោះទេ សម្បុកឃ្មុំចំនួនប្រមាណពីរភាគបី នៅអឺរ៉ុប អាចនឹងត្រូវបាត់បង់។ ការកាត់បង់ជម្រកឃ្មុំ នឹងបណ្តាលឱ្យ ប៉ះពាល់ដល់ប្រព័ន្ធជីវចម្រុះ និងបរិស្ថាន។
ប្រឈមនឹងវិបត្តិ សមាគមអ្នកចិញ្ចឹមឃ្មុំអឺរ៉ុប ស្នើសុំឱ្យគណៈកម្មាការសហភាពអឺរ៉ុប ចេញវិធានការ ដើម្បីការពារសត្វឃ្មុំ និងផលិតផលទឹកឃ្មុំរបស់អឺរ៉ុប។ ពោល ត្រូវចេញចំណាត់ការឱ្យតឹងតែងនិងច្បាស់លាស់ ពីការតាមដានពីប្រភេទនិងប្រភពទឹកឃ្មុំ, រឹតបន្តឹងការត្រួតពិនិត្យ ផលិតផលទឹកឃ្មុំនាំចូល នៅតាមបន្ទាត់ព្រំដែន ព្រមទាំង បិទស្ទីកឃ័រសម្គាល់ផលិតផលទឹកឃ្មុំឱ្យបានត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ