ខួប៧៥ឆ្នាំនៃការរំដោះជំរំលត់ដំណាហ្ស៊ី Auschwitz
ចុះផ្សាយនៅថ្ងៃ៖
ស្តាប់ - ០៤:៤១
នៅថ្ងៃទី ២៣មករា ២០២០ ប្រមុខរដ្ឋ-រដ្ឋាភិបាល ជាង៤០ប្រទេស ត្រូវមកជួបជុំគ្នានៅទីក្រុង ហ្សេរុយសាឡិម ដើម្បីចូលរួមក្នុងពិធីរំលឹកខួប៧៥ឆ្នាំនៃការរំដោះជំរំលត់ដំ Auschwitz នៅប្រទេសប៉ូឡូញរបស់ពួកណាហ្ស៊ី។ ពិធីរំលឹកប្រវត្តិសាស្ត្រ ជាឱកាសបង្ហាញនូវការរួបរួមនិងស្រុះស្រួលគ្នា។ ប៉ុន្តែពិធីឧទ្ទិសវិញ្ញាណក្ខន្ធ ដែលរៀបចំធ្វើនៅស្តូប Yad Vashem ប្រទេសអ៊ីស្រាអែល បានក្លាយជាវេទិកាពង្រឹងនយោបាយជាតិ ប្រជែងកាច់គ្នារវាងរុស្ស៊ី ប៉ូឡូញ និងអ៊ីស្រាអែល ទៅវិញ។
ប្រធានាធិបតីរុស្ស៊ី វ្លាដេមៀរ ពូទីន ប្រធានាធិបតីបារាំង អេម៉ានុយអែល ម៉ាក្រុង ប្រមុខរដ្ឋអាល្លឺម៉ង់ អ៊ីតាលី អូទ្រីស ... កំពុងជួបជុំគ្នានៅប្រទេសអ៊ីស្រាអែល ដើម្បីចូលរួមក្នុងកម្មវិធីដ៏ធំ ដែលពុំធ្លាប់មានរៀបចំឡើងទេ ពីមុនមក។ នោះគឺការ រំលឹកខួប៧៥ឆ្នាំនៃការរំដោះជំរំAuschwitz ជំរំលត់ដំដ៏ធំមួយរបស់ពួកណាហ្ស៊ី។
តាមរយៈការប្រារព្ធខួបនៃការរំដោះជំរំ Auschwitz អ៊ីស្រាអែលចង់ឧទ្ទិសសប្តាហ៍នេះដល់ការប្រយុទ្ធប្រឆាំងនឹងការស្អប់ខ្ពើមជនជាតិជ្វីហ្វ និងចង់ឱ្យពិភពលោកពិចារណារកវិធី ផ្ទេរការចងចាំដល់ក្មេងជំនាន់ក្រោយៗ ថាមានទង្វើប្រល័យពូជសាសន៍លើជនជាតិជ្វីហ្វ ពីសំណាក់ពួកណាហ្ស៊ី។ រក្សាប្រវត្តិសាស្ត្រនិងផ្ទេរការចងចាំ ទៅឱ្យក្មេងជំនាន់ក្រោយ ជាកង្វល់របស់ពិភពលោកទាំងមូល ព្រោះសន្ទុះនៃការស្អប់ខ្ពើមជនជាតិជ្វីហ្វ នៅតែផុសផុលជានិច្ច និងកំពុងកើនឡើង មិនថានៅអាល្លឺម៉ង់ឬនៅបារាំងទេ។ ម្យ៉ាងវិញទៀត សោកនាដកម្មកន្លងទៅទើបតែ៧៥ឆ្នាំទេ តែបើតាមការស្រាវជ្រាវរបស់ការិយាល័យ Schoen Consulting បច្ចុប្បន្ននេះមានពលរដ្ឋអាមេរិកពេញវ័យដល់ទៅ៤១% មិនដឹងថា ជំរំលត់ដំរបស់ពួកណាហ្ស៊ី Auschwitz នៅទីណាទេ និង១១% (ឬ១ភាគ៥នៃពលរដ្ឋអាមេរិកអាយុពី១៨ទៅ៣៤ឆ្នាំ) មិនដែលបានដឹង មិនដែលបានឮ គេនិយាយសោះអំពីជំរំAuschwitz។
ចុះនៅពេលផុតពីមនុស្សចាស់ជំនាន់មុន ដែលបានឆ្លងកាត់ហេតុការណ៍ផ្ទាល់ទៅ តើប្រវត្តិសាស្ត្រនៃការចង់សម្លាប់ផ្តាច់ពូជជ្វីហ្វពីសំណាក់ពួកណាហ្ស៊ីនឹងទៅជាយ៉ាងណា ? មានតែរក្សាប្រវត្តិសាស្ត្រ ទទួលស្គាល់ឱ្យមានការសិក្សាអំពីអំពើប្រល័យពូជសាសន៍អ៊ីស្រាអែលដោយពួកអាល្លឺម៉ង់ណាហ្ស៊ី ទើបអាចធានាបានថាក្មេងជំនាន់ក្រោយនឹងយល់អំពីថាតើអ្វីទៅជាការស្អប់ខ្ពើមដល់ឫសគល់ និងការប៉ុនប៉ងរបស់ពួកណាហ្ស៊ីចង់កម្ចាត់ពូជជ្វីហ្វឱ្យអស់លែងកកើតវិញបាននៅអឺរ៉ុបនោះ។ នេះបើតាមប្រសាសន៍របស់ប្រធានក្រុមប្រឹក្សាជនជាតិជ្វីហ្វពិភពលោក។
ជំរំប្រល័យពូជសាសន៍ជ្វីហ្វ
ជំរំ Auschwitz មានទីតាំងនៅក្នុងប្រទេសប៉ូឡូញ ដែលពួកអាល្លឺម៉ង់ណាហ្ស៊ីបានចូលឈ្លានពាននិងគ្រប់គ្រងនៅសម័យសង្គ្រាមលោកលើកទីពីរ។ Auschwitz ជាជំរំលត់ដំ ឃុំឃាំង និងមណ្ឌលប្រល័យជីវិតមនុស្សទាំងហ្វូងៗ របស់ពួកអាល្លឺម៉ង់ណាហ្ស៊ី ដែលបានបើកទ្វារនៅឆ្នាំ១៩៤០ និងរំដោះបាននៅថ្ងៃទី ២៧មករា ១៩៤៥ ដោយកងទ័ពរុស្ស៊ី។
ក្នុងរយៈពេល៥ឆ្នាំ មានជីវិតមនុស្ស ក្មេង ចាស់ ប្រុស ស្រី ជាងមួយលាននាក់ ១សែននាក់ដែលគេដឹកមកទាំងហ្វូងៗតាមរថភ្លើងមកដាក់ក្នុងជំរំនេះ ត្រូវបានសម្លាប់ ដោយហ្កាស ដោយបាញ់នឹងកាំភ្លើង និងខ្លះដោយជំងឺ ដោយអត់អាហារ ឬទារុណកម្ម ក្រោមមូលហេតុតែមួយ គឺពួកគេជាជនជាតិជ្វីហ្វ (អ៊ីស្រាអែល)។ យោលលើទំហំនៃជំរំ និងចំនួនជនរងគ្រោះ Auschwitz បានក្លាយជានិម្មិត្តរូបនៃអំពើប្រល័យពូជសាសន៍ជ្វីហ្វ ពីសំណាក់ពួកអាល្លឺម៉ង់ណាហ្ស៊ី ដែលក្នុងអំឡុងពេលកាន់អំណាច បានសម្លាប់ជីវិតជនជាតិជ្វីហ្វអស់ជាង៦លាននាក់។ ដើម្បីប្រវត្តិសាស្ត្រនិងការចងចាំ ជំរំAuschwitz ត្រូវបានយូណេស្កូ ចាត់បញ្ចូលជាបេតិកភណ្ឌមនុស្សជាតិនៅឆ្នាំ១៩៧៩។
ប៉ុន្តែ៧៥ឆ្នាំក្រោយ ការរំលឹកប្រវត្តិសាស្ត្រ ត្រូវបានជ្រៀតជ្រែកដោយនយោបាយ។ ប្រធានាធិបតីប៉ូឡូញ លោក Andrzej Duda បានបដិសេធមិនមកចូលរួមក្នុងកម្មវិធី ដែលរៀបចំឡើងដោយអ៊ីស្រាអែល នៅថ្ងៃព្រហស្បតិ៍ ទី ២៣មករា ២០២០ នៅបូជនីយស្ថាន Yad Vashem ទេ។ មូលហេតុមកពីអ៊ីស្រាអែលជាម្ចាស់ផ្ទះ ជ្រើសរើសយកប្រធានាធិបតីរុស្ស៊ីឱ្យដើរជាតួអង្គសំខាន់រំលឹកពីតួនាទីរបស់សហភាពសូវៀតក្នុងសង្គ្រាម តែមិនផ្តល់ឱកាសឱ្យប៉ូឡូញ ដែលជាប្រទេសរងគ្រោះផ្ទាល់ បានចេញស្តីទេ។ ប៉ូឡូញខ្លាចក្រែងថាលោកពូទីនដែលទើបបានធ្វើការចោទប្រកាន់កាលពីថ្មីៗថា ប៉ូឡូញស្អប់ខ្ពើមជនជាតិជ្វីហ្វ ថ្លែងពាក្យចោទប្រកាន់បែបនេះជាថ្មីទៀត ដោយប៉ូឡូញមិនអាចតបតអ្វីបាន ទើបសុខចិត្តមិនអញ្ជើញទៅចូលរួមក្នុងពិធីរំលឹកខួបតែម្តង។
តាមរបៀបវារៈ សុន្ទរកថាសំខាន់ៗ ត្រូវ ត្រៀមប្រគល់ទៅជូនប្រមុខដឹកនាំ បារាំង រុស្ស៊ី អង់គ្លេស សហរដ្ឋអាមេរិក និងអ៊ីស្រាអែល។
នៅថ្ងៃទី ២៧មករា ២០២០ ប៉ូឡូញនឹងប្រារព្វពិធីរំលឹកខួបនៃការរំដោះជំរំពីដៃពួកណាហ្ស៊ី តាមទម្លាប់ នៅក្នុងជំរំAuschwitz តែម្តង ប៉ុន្តែប៉ូឡូញ មិនអញ្ជើញលោកវ្លាដេមៀរ ពូទីនទេ។ ឯខាងបារាំង នឹងតំណាងដោយនាយករដ្ឋមន្ត្រី សហរដ្ឋអាមេរិកដោយរដ្ឋមន្ត្រីក្រសួងហិរញ្ញវត្ថុ អាល្លឺម៉ង់និងអ៊ីស្រាអែលដោយប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ