តើការបោះឆ្នោតសភាឥណ្ឌាប្រព្រឹត្តទៅយ៉ាងដូចម្តេច?
ចាប់ពីថ្ងៃសុក្រទី ១៩មេសា២០២៤នេះទៅ ពលរដ្ឋឥណ្ឌាជិត៩៧០លាននាក់ត្រូវទៅបោះឆ្នោតជ្រើសរើសសមាជិកសភា ៥៤៣រូប។ គឺជាការបោះឆ្នោតសភាខ្នាតធំជាងគេបំផុតនៅលើពិភពលោក ដែលមានរយៈពេលដល់ទៅ៦សប្តាហ៍ និងចែកចេញជា៧ដំណាក់កាល។ លទ្ធផលនឹងត្រូវប្រកាសនៅថ្ងៃទី៤មិថុនា២០២៤។ តើការបោះឆ្នោតសភាឥណ្ឌានេះមានដំណើរបែបបទយ៉ាងណា និងទស្សនៈវិស័យសម្រាប់គណបក្សណាខ្លះ?
ចុះផ្សាយនៅថ្ងៃ៖
ស្តាប់ - ០២:៤៨
ជាប្រទេសដ៏ធំ ផ្គុំដោយ២៩រដ្ឋសហព័ន្ធ ហើយបែងចែកអាសនៈនៅក្នុងសភាជាតិ អាស្រ័យទៅលើក្បួនសមមាត្រប្រជាជនរបស់រដ្ឋនីមួយៗ ឥណ្ឌាប្រកាន់យកប្រព័ន្ធបោះឆ្នោតជាសកលនិងដោយផ្ទាល់។ នៅថ្ងៃនេះ ឥណ្ឌាដែលមានប្រជាជនច្រើនជាងគេបង្អស់នៅលើពិភពលោក រៀបចំការបោះឆ្នោតសភាលើកទី១៨ (ការបោះឆ្នោតសភាជាលើកទីមួយនៅឆ្នាំ១៩៥១) ក្នុងទ្រង់ទ្រាយធំហួសខ្នាត ជា៧ដំណាក់ រយៈពេល៦សប្តាហ៍ និងដោយមានការិយាល័យបោះឆ្នោតជាង១លានពីរសែនកន្លែង បំពាក់ដោយម៉ាស៊ីនបោះឆ្នោតអេឡិចត្រូនិក២លានគ្រឿង និងបុគ្គលិកគ្រប់គ្រងជាង១៥លាននាក់។ ជាងនេះទៅទៀត ពលរដ្ឋឥណ្ឌាមានជំនក់ចិត្តខាងបោះឆ្នោតណាស់ មិនញញើតនឹងរង់ចាំរាប់ម៉ោងក្រោមកម្តៅថ្ងៃស្ទើរឆេះទេ។ អត្រាអ្នកចូលរួមបោះឆ្នោតកើនឡើងជាលំដាប់ ពី៤៥,៧%នៅឆ្នាំ១៩៥១ ដល់៦៧,១%នៅឆ្នាំ២០១៩។ សម្រាប់ឆ្នាំ២០២៤នេះ ចំនួនពលរដ្ឋស្រីប្រុសក្នុងបញ្ជីបោះឆ្នោតបានឡើងដល់៩៧០លាននាក់ ទល់នឹងប្រមាណ៩០០លាននាក់នៅសម័យបោះឆ្នោត៥មុន។
ការរាប់សន្លឹកឆ្នោតនឹងប្រព្រឹត្តទៅនៅថ្ងៃទី៤មិថុនា អមដោយការប្រកាសលទ្ធផលភ្លាម ក្នុងថ្ងៃតែមួយ។ ក្នុងចំណោម២៣០០គណបក្ស ៧ទទួលស្គាល់កំរិតជាតិ និង៥៩កំរិតរដ្ឋសហព័ន្ធ ការបោះឆ្នោតសភាឆ្នាំនេះ ក៏ដូចលើកមុនប្រព្រឹត្តទៅក្នុងទម្រង់ការប្រកួតប្រជែងរវាងបក្សធំៗពីរ គឺបក្សកាន់អំណាចរបស់នាយករដ្ឋមន្ត្រីផុតអាណត្តិណារិនដ្រាម៉ូឌី និងគណបក្សសមាជដឹកនាំដោយលោករ៉ាអ៊ូល ហ្កាន់ឌី ដែលជាគណបក្សប្រឆាំង។
គណបក្សសមាជចាប់ផ្តើមឡើងសំឡេងមានអាសនៈកាន់តែច្រើនជាលំដាប់ ក្នុងការបោះឆ្នោតសភាប៉ុន្មានលើកចុងក្រោយនេះ ប៉ុន្តែនៅមានកម្លាំងតិចមិនអាចយកឈ្នះគណបក្សកាន់អំណាចបានទេ។ ទោះបីជាតុល្យការសេដ្ឋកិច្ចរបស់លោកនាយករដ្ឋមន្ត្រីមិនសូវល្អ អត្រាអ្នកអត់ការងារធ្វើឡើងខ្ពស់ អតិផរណាឡើងកប់ពពក និង ការប្រើអំណាចបង្ក្រាបគាបសង្កត់បក្សប្រឆាំងធ្វើឱ្យគំរូប្រជាធិបតេយ្យឥណ្ឌាការធ្លាក់ចុះក៏ដោយ ក៏បើជឿតាមការស្ទង់មតិនានា ប្រជាពលរដ្ឋឥណ្ឌាបន្តផ្តល់ទំនុកចិត្តលើរូបលោកម៉ូឌីដដែល ដែលក្រោមអាណត្តិរបស់លោកឥណ្ឌាបានក្លាយជាមហាអំណាចសេដ្ឋកិច្ចទី៥ពិភពលោក។ ការអង្កេតរបស់ភ្នាក់ងារPEW កាលពីឆ្នាំ២០២៣ បានបង្ហាញថានាយករដ្ឋមន្ត្រីម៉ូឌី វ័យ៧៣ឆ្នាំ មានប្រជាប្រិយភាពខ្ពស់ត្រដែតខ្លាំង ក្នុងចំណោម៨០%នៃប្រជាជន។ ឯអ្នកវិភាគនយោបាយបានផ្តល់ជ័យជំនះរួចស្រេចទៅហើយគណបក្សកាន់អំណាចលើសម្ព័ន្ធបក្សប្រឆាំងដែលមិនទាន់កំណត់ឈ្មោះបេក្ខជននាយករដ្ឋមន្ត្រីបានផង។ គណបក្សសមាជ មានប្រវត្តិធ្លាប់ដឹកនាំប្រទេសរាប់ទសវត្សរ៍ក្រោយពីឥណ្ឌាបានទទួលឯករាជ្យភ្លាម តែឥលូវនៅសល់តែស្រមោល និងគ្រប់គ្រងនយោបាយក្នុងបីរដ្ឋប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ