ស្រីលង្កាដោះលែងអ្នកទោសជិត៨០០នាក់ ក្រោយពីគ្រូហោរាខ្វែងគំនិតគ្នាក្នុងការរៀបចំបុណ្យឆ្នាំថ្មី
ក្នុងឱកាសបុណ្យជាតិសំខាន់ៗ ការផ្សាយមេត្តាធម៌ដល់ជនកម្សត់ និងផ្តល់សេរីភាព ដោះលែងអ្នកជាប់ឃុំ ជាទម្លាប់ប្រពៃណីមួយរបស់ប្រទេសតំបន់អាស៊ីខាងត្បូង បែបយ៉ាង ស្រីលង្ហា ដែលនិយមប្រកាន់ពុទ្ធសាសនាថេរវាទយ៉ាងខ្ជាប់ខ្ជួន។ ដើម្បីជាការអបអរក្នុងឱកាសបុណ្យចូលឆ្នាំថ្មីនេះ ប្រមុខរដ្ឋស្រីលង្កាបានចេញក្រឹត្យប្រធានាធិបតីលើកលែងទោសដល់ទណ្ឌិត ចំនួនជិត ៨០០ នាក់។ ការប្រោសមេត្តាផ្តល់សេរីភាពដល់អ្នកទោសទាំងនេះ បន្ទាប់ពីក្រុមគ្រូហោរាស្រីលង្ហា ឈ្លោះទាស់ទែងខ្វែងគំនិតគ្នា ពាក់ព័ន្ធនឹង«ពេលា»រៀបចំពិធីបុណ្យឆ្លងឆ្នាំ។
ចុះផ្សាយនៅថ្ងៃ៖
ស្តាប់ - ០៣:៤៦
នៅរដ្ឋធានីកូឡុំបូ ថ្ងៃសៅរ៍ ទី១៣មេសា ក្រឹត្យប្រធានាធិបតីស្រីលង្កា Ranil Wickremesinghe បានសម្រេចដោះលែងអ្នកទោសចំនួន ៧៧៩ នាក់ ដើម្បីជាការអបអរក្នុងឱកាសបុណ្យចូលឆ្នាំថ្មី របស់ក្រុមជនជាតិតាមូលនិងសិង្ហាឡា។ កាលពីអំលុងឱកាសបុណ្យចូលឆ្នាំសកល២០២៤ រដ្ឋាភិបាលស្រីលង្កា ក៏បានអនុញ្ញាតដោះលែងអ្នកទោស ចំនួន ប្រមាណ ១ ពាន់នាក់ រួចហើយដែរ។ ការដោះលែងទណ្ឌិតផ្ទួនៗបែបនេះ ជាការសម្រាលបន្ទុករបស់មន្ទីរឃុំឃាំង បានយ៉ាងច្រើនដែរ។ ដ្បិតថា ក្នុងពន្ធនាគារស្រីលង្កា កំពុងតែជួបបញ្ហាកកស្ទះជាខ្លាំង។ ជនអ្នកជាប់ឃុំគរជើងនិង ត្រូវរស់នៅបញ្ជ្រៀតគ្នាយ៉ាងណែនណាន់តាន់តាប់។ នេះបើតាមអ្នកទទួលខុសត្រូវមន្ទីរឃុំឃាំងស្រីលង្កា ដែលបានថ្លែងប្រាប់ទីភ្នាក់ងារព័ត៌មានបារាំង អាអេហ្វប៉េ ដោយឆ្លៀតបន្ថែមថា គិតត្រឹមថ្ងៃសុក្រ ទី១២មេសា ជាមធ្យម អត្រាអ្នកទោស ៣០ ០០០នាក់ មានកន្លែងតែ ១១ ០០០កន្លែង។
ក្រឹត្យលើកលែងទោសធ្លាក់មកវេលានេះ អាចចាត់ទុកជាការរំដោះគ្រោះមួយ។ ដ្បិតថា បណ្តាពួកគ្រូហោរាបរោហិតស្រីលង្ហា មានគំនិតមិនមូលជាធ្លុងមួយសោះ។ ក្នុងចំណោមបណ្តាហោរា ៤២ រូប ដែលបានតាំងតាំងដោយក្រសួងវប្បធម៌និងកិច្ចការសាសនា មានគំនិតខ្វែងគ្នាចំពោះ«ពេលា»រៀបចំបុណ្យឆ្លងឆ្នាំ។ ទោះយ៉ាងនេះក្តី ហោរាស្រីលង្កាក្នុងសំឡេងភាគច្រើន ហើយនិងរដ្ឋាភិបាល ក៏យល់ស្របតាមដែរ បានអនុម័តសម្រេចជ្រើសរើសវេលាឲ្យឆ្លងឆ្នាំ នៅពេលាយប់ថ្ងៃទី១៣ឈានចូលថ្ងៃទី១៤មេសា ហើយការទទួលទានអាហារទី១ សម្រាប់ឆ្នាំថ្មី គឺចាប់ផ្តើមនៅវេលារំលងពាក់កណ្តាលអធ្រាត្រ។
ផ្ទុយទៅវិញ គ្រូហោរាផ្សេងទៀត ជាក្រុមជំទាស់ បានប្រកាន់គំនិតថា គួរតែត្រូវរៀបចំបុណ្យឆ្លងឆ្នាំ នៅព្រឹកថ្ងៃអាទិត្យ ទី១៤ វិញ ទើបមានសិរីមង្គល និងជៀសវៀងឆ្ងាយពីភាពចង្រៃឧបទ្រពអពមង្គលទាំងពួង។ ចំណែកឯ ការធ្វើពិធីយប់រំលងអធ្រាត្រនោះ ច្បាស់ជានាំគ្រោះមហន្តរាយហើយ ខណៈពេលដែលប្រទេសស្រីលង្កា កំពុងតែជួបវិបត្តិសេដ្ឋកិច្ចធ្ងន់ធ្ងរស្រាប់ផង។ នេះបើតាមមតិហោរាជំទាស់ នឹងការធ្វើពិធីឆ្លងឆ្នាំនៅវេលាយប់រំលងអធ្រាត្រ នៅស្រីលង្កា។
នៅស្រីលង្កា មិនថាក្នុងសហគមន៍ហិណ្ឌូ ឬសហគមន៍ពុទ្ធសាសនានោះឡើយ គឺ ទំនាយហោរា ត្រូវគេនិយមប្រកាន់ខ្ជាប់សម្បើមណាស់។ រាល់ការធ្វើអ្វីនីមួយៗ គេរមែងរត់ទៅរកគ្រូហោរាគន់គូរទូទាត់ទស្សន៍ទាញមើលជានិច្ច ជាក់ស្តែង ការរើសវេលាថ្ងៃល្អសម្រាប់ប្រារព្ធកិច្ចពិធីអ្វីមួយ, ការរៀបមង្គលអាពាហ៍ពិពាហ៍, និងចុះកិច្ចព្រមព្រៀងជំនួយជួញដូរ ផ្សេងៗ រហូតដល់ ការរៀបចំបោះឆ្នោតជាតិ ក៏អ្នកនយោបាយស្រីលង្កាសុំហោរាឲ្យទាយនិងកំណត់រកថ្ងៃពេលាល្អដែរ។ កាលពីឆ្នាំ២០១៥ អតីតប្រធានាធិបតីស្រីលង្កា Mahinda Rajapaksa មានៈចង់រៀបចំការបោះឆ្នោតមុនអាណត្តិ និងបានជ្រើសរើសថ្ងៃល្អពរជ័យសម្រាប់រៀបចំការបោះឆ្នោត។ គ្រូហោរាប្រចាំខ្លួនរបស់លោក បានរើសថ្ងៃពិសិទ្ធិពរសម្រាប់បោះឆ្នោតជាន់នោះដែរ តែទីបំផុត លោក Mahinda Rajapaksa បែរជាបរាជ័យចាញ់ឆ្នោតយ៉ាងអាម៉ាសទៅវិញ។ ចំណេរពេលកន្លងផុតទៅ គ្រូហោរាផ្ទាល់ខ្លួនរបស់ Rajapaksa បានសារភាពថា គ្រានោះ ពុំមែនជាវេលាល្អទេ ដែលត្រូវរៀបចំបោះឆ្នោតមុនអាណត្តិ តែលោកមិនហ៊ានជម្រាបទៅលោកប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ