អាហ្វហ្កានីស្ថានសាទរការបន្តជំនួយរបស់អង្គការសហប្រជាជាតិ ហើយសង្ឃឹមភ្ជាប់ទំនាក់ទំនងអន្តរជាតិ
អាជ្ញាធរតាលីបង់ បានថ្លែងអបអរសាទរថ្ងៃសៅរ៍ ទី១៦មីនា ក្រោយពីអង្គការសហប្រជាជាតិ សម្រេចបន្តជំនួយជួយអាហ្វហ្កានីស្ថាន។ ថ្នាក់ដឹកនាំតាលីបង់ ក៏សង្ឃឹមដែរ ថាវត្តមានរបស់បេសកម្មជំនួយរបស់អង្គការសហប្រជាជាតិ នឹងជួយភ្ជាប់ទំនាក់ទំនងអាហ្វហ្កានីស្ថាន ទៅនឹងសហគមអន្តរជាតិ។ ដ្បិតថា តាំងពីវាយប្រហារប្រយុទ្ធយកអំណាចរដ្ឋនិងបណ្តេញសហរដ្ឋអាមេរិកឲ្យចេញពីស្រុកមក, រហូតទល់ពេលនេះ គ្មានប្រទេសណាទទួលស្គាល់រដ្ឋាភិបាលតាលីបង់ ស្របច្បាប់ជាផ្លូវការនៅឡើយទេ។
ចុះផ្សាយនៅថ្ងៃ៖
ស្តាប់ - ០២:២៦
អ្នកនាំពាក្យអាជ្ញាធរតាលីបង់ លោក ហ្សាប៊ីហូឡាស់ មូចាហីដ បានអបអរសាទរចំពោះការពន្យារពេល១ឆ្នាំទៀត ដើម្បីបន្តបេសកម្មជំនួយអង្គការសហប្រជាជាតិនៅអាហ្វហ្កានីស្ថាន។ ថ្លែងតាមវិទ្យុជាតិRTA នៅថ្ងៃសៅរ៍ ទី១៦មីនា ថ្នាក់ដឹកនាំតាលីបង់រូបនេះ សង្កត់ធ្ងន់ថា ប្រទេសអាហ្វហ្កានីស្ថាន ត្រូវការទាក់ទងជាមួយសហគមអន្តរជាតិ។ អាស្រ័យហេតុដូច្នេះ ទើប អាជ្ញាធរតាលីបង់ ថ្លែងក្តីសង្ឃឹមថា បេសកម្មអង្គការសហប្រជាជាតិនេះ នឹងជួយដេរភ្ជាប់ទំនាក់ទំនង រវាង តាលីបង់ និង ឆាកអន្តរជាតិ ដែលបានដាច់ជាច្រើនឆ្នាំមកហើយ។
ក្រុមប្រដាប់តាលីបង់ បានត្រឡប់មកកាន់អំណាចនៅអាហ្វហ្កានីស្ថាន ក្រោយពីបានវាយបណ្តេញទ័ពសហរដ្ឋអាមេរិក ចេញពីប្រទេស នៅសីហា ឆ្នាំ២០២១។ ជាផ្លូវការរហូតទល់ពេលនេះ គ្មានប្រទេសណាទទួលស្គាល់រដ្ឋាភិបាលតាលីបង់ ស្របច្បាប់នោះឡើយ។ បញ្ហាមួយក្នុងចង្កោមបញ្ហាជាច្រើនដែលបរទេសមិនទទួលស្គាល់របបតាលីបង់ គឺការជាន់ឈ្លីរំលោភបំពានបំបិទសិទ្ធិស្ត្រីនិងកុមារី។
នៅអាហ្វហ្កានីស្ថាន បេសកម្មជំនួយអង្គការសហប្រជាជាតិ មានវត្តមាន ជាង២ទសវត្សរ៍មកហើយ តាំងតែពីឆ្នាំ២០០២មកម្ល៉េះ។ កាលពីថ្ងៃសុក្រ ក្រុមប្រឹក្សាសន្តិសុខអង្គការសហប្រជាជាតិ បានសម្រេចបោះឆ្នោតអនុម័តជាឯកច្ឆន្ទឲ្យបន្តបេសកម្មជំនួយនេះ រហូតដល់ថ្ងៃទី ១៧ មីនា ឆ្នាំ២០២៥។ ក្នុងឱកាសនោះ អ្នកតំណាងប្រទេសជប៉ុន ជាប្រធានអង្គប្រជុំ បានគូសបង្ហាញថា វត្តមានអង្គការសហប្រជាជាតិនៅអាហ្វហ្កានីស្ថាន មានសារៈសំខាន់ចាំបាច់ ដើម្បីនឹងអាចបន្តដើរតួនាទីជ្រោមជ្រែងសន្តិភាពនិងស្ថិរភាពនៅអាហ្វហ្កានីស្ថាន ស្របពេលដែលសហគមអន្តរជាតិចង់ចូលរួមជួយអាហ្វហ្កានីស្ថានឲ្យស៊ីជម្រៅ ហើយនិងចង់កសាងទំនុកចិត្តជាមួយក្រុមតាលីបង់ ។
ទោះជាយ៉ាងនេះក្តី អង្គការសហប្រជាជាតិ និងថ្នាក់ដឹកនាំតាលីបង់ នៅមានចំណុចខ្វែងគ្នា មិនយល់ស្របគ្នាច្រើនណាស់។ ជាក់ស្តែង ការតែងតាំង បេសកជនពិសេសនៃអង្គការសហប្រជាជាតិ ប្រចាំអាហ្វហ្កានីស្ថាន កាលពីខែធ្នូ ដើម្បីធ្វើជាអ្នកតំណាងចរចា ហើយនិងសម្របសម្រួលផ្តល់ជំនួយឲ្យមានប្រសិទ្ធភាព។ ក៏ប៉ុន្តែ ក្នុងខែមករាកន្លងទៅ ថ្នាក់ដឹកនាំតាលីបង់ តាមរយៈរដ្ឋមន្ត្រីការបរទេសអាហ្វហ្កានីស្ថាន Amir Khan Muttaqi យល់ឃើញថា តួនាទីនោះគ្មានការចាំបាច់ទេ ព្រោះថា អាហ្វហ្កានីស្ថានគ្មានសង្គ្រាមទៀតទេ។ ហេតុនេះ អាជ្ញាធរអាចបំពេញកិច្ចការបានដោយខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ