អតីតនាយករដ្ឋមន្រ្តីថៃ លោកថាក់ស៊ីន នឹងត្រូវដោះលែងឲ្យមានសេរីភាពក្នុងពេលឆាប់ៗ
បន្ទាប់ពីត្រូវព្រះមហាក្សត្រថៃបន្ធូរបន្ថយទោសជាប់ពន្ធនាគារ ពី៨ឆ្នាំ មកនៅ១ឆ្នាំ អតីតនាយករដ្ឋមន្រ្តី លោកថាក់ស៊ីន ស៊ីណាវ៉ាត្រនឹងត្រូវដោះលែងឲ្យមានសេរីភាពក្នុងប៉ុន្មានថ្ងៃខាងមុខ។ នេះបើតាមការប្រកាសរបស់រដ្ឋមន្រ្តីក្រសួងយុត្តិធម៌ថៃ នៅថ្ងៃអង្គារទី ១៣កុម្ភៈ។ រត់និរទេសខ្លួននៅបរទេសជាង១៥ឆ្នាំ ដើម្បីគេចចេញពីការដាក់ទោសពន្ធនាគារ នៅក្រោយរដ្ឋប្រហារយោធាឆ្នាំ ២០០៦ លោកថាក់ស៊ីន ស៊ីណាវ៉ាត្រ មហាសេដ្ឋីវ័យ៧៤ ទើបត្រលប់ចូលប្រទេសវិញ នៅក្នុងខណៈពេលដែលគណបក្សភឿថៃរបស់លោកឈ្នះឆ្នោត ដឹកនាំរដ្ឋាភិបាលថៃថ្មី។ ប៉ុន្តែ ចាប់តាំងពីត្រលប់ចូលប្រទេសថៃ លោកថាក់ស៊ីនចំណាយពេលវេលា នៅមន្ទីរពេទ្យ ច្រើនជាងនៅក្នុងពន្ធនាគារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៧
ចាប់តាំងពីវិលត្រលប់ចូលប្រទេសថៃ នៅ៦ខែមកនេះ លោកថាក់ស៊ីន ស៊ីណាវ៉ាត្រដែលត្រូវអនុវត្តទោសជាប់ពន្ធនាគារ៨ឆ្នាំ ក្នុងសំណុំរឿងប្រព្រឹត្តអំពើពុករលួយ និងរំលោភអំណាច ស្គាល់រសជាតិពន្ធនាគារតែប៉ុន្មានម៉ោងប៉ុណ្ណោះ។ ប៉ុន្មានម៉ោង ព្រោះថា នៅថ្ងៃវិលចូលមាតុប្រទេស ថ្ងៃទី ២២សីហា បន្ទាប់ពីនិរទេសគេចខ្លួន ទៅនៅបរទេសអស់ ១៥ឆ្នាំ លោកថាក់ស៊ីន ត្រូវប៉ូលិសដឹកទៅដាក់ពន្ធនាគារបានតែមួយភ្លែត ក៏ស្រាប់តែត្រូវបញ្ជូនទៅកាន់មន្ទីរពេទ្យយោធា។
កាសែតក្នុងស្រុកថៃ រាយការណ៍ថា នៅពេលបញ្ជូនទៅកាន់មន្ទីរពេទ្យ លោកថាក់ស៊ីនមានអាការៈចុកណែនទ្រូង និងមានបញ្ហាលើសឈាម ចំណែកក្រុមគ្រួសាររបស់លោក និយាយថា លោកថាក់ស៊ីនទទួលវះកាត់២ដង។
នៅក្នុងអំឡុងពេលសម្រាកព្យាបាល នៅមន្ទីរពេទ្យ លោកថាក់ស៊ីនបានបញ្ជូនលិខិតសុំការលើកលែងទោសពីព្រះមហាក្សត្រមហាវិជ្ជរ៉ាឡុងកន ប៉ុន្តែ ព្រះមហាក្សត្រថៃ បានសម្រេចត្រឹមបន្ធូរបន្ថយទោសជាប់ពន្ធនាគាររបស់លោកថាក់ស៊ីន ពី៨ឆ្នាំ មកនៅមួយឆ្នាំ។
ជាអ្នកទោសជាប់ព្យាបាលក្នុងមន្ទីរពេទ្យ លោកថាក់ស៊ីន ស៊ីណាវ៉ាត្រនឹងត្រូវដោះលែងឲ្យមានសេរីភាពក្នុងពេលឆាប់ៗ ចាប់តាំងពីថ្ងៃសៅរ៍ចុងសប្តាហ៍នេះ។
តាមការប្រកាសរបស់រដ្ឋមន្រ្តីក្រសួងយុត្តិធម៌ លោកថាវី សាសង នៅថ្ងៃអង្គារទី ១៣កុម្ភៈនេះ ក្នុងវ័យ ៧៤ឆ្នាំ លោកថាក់ស៊ីន ស្ថិតក្នុងចំណោមអ្នកទោស ៩៣០នាក់ ដែលត្រូវដោះលែងឲ្យមានសេរីភាព នៅក្នុងហេតុផលបញ្ហាសុខភាពធ្ងន់ធ្ងរ និងអាយុច្រើនជាង៧០ឆ្នាំ។
បើតាមរដ្ឋមន្រ្តីក្រសួងយុត្តិធម៌ថៃ លោកថាក់ស៊ីននឹងត្រូវដោះលែង ជាស្វ័យប្រវត្តិ នៅបន្ទាប់ពីជាប់ពន្ធនាគារ៦ខែ។ គេមិនទាន់ដឹងលម្អិតពីលក្ខខណ្ឌដោះលែងលោកថាក់ស៊ីន ប៉ុន្តែ អ្នកជំនាញច្បាប់ថៃបានប្រាប់ទីភ្នាក់ងារព័ត៌មានបារាំង AFP ថា ពេលនៅក្រៅឃុំ លោកថាក់ស៊ីនអាចត្រូវពាក់ខ្សែអេឡិចត្រូនិកតាមដាន នៅកដៃ ឬធ្វើដំណើរដោយមានកំណត់។
ការសម្រេចរបស់ព្រះមហាក្សត្រក្នុងការបន្ថយទោសរបស់លោកថាក់ស៊ីន ពី៨ឆ្នាំ មកនៅ១ឆ្នាំ ដើម្បីឲ្យលោកថាក់ស៊ីនចែករំលែកបទពិសោធន៍ ដើម្បីអភិវឌ្ឍប្រទេស។ ជាប់ទោសមិនទាន់បានប៉ុន្មានខែផង លោកថាក់ស៊ីនក៏ត្រូវដោះលែងឲ្យមានសេរីភាព ក្នុងហេតុផលជរា និងបញ្ហាសុខភាព។ ការណ៍នេះរឹតតែទៅពង្រឹងពាក្យចចាមអារ៉ាមស្តីពីការចងសម្ព័ន្ធភាពរវាងគណបក្សភឿថៃ របស់ក្រុមលោកថាក់ស៊ីន និងក្រុមយោធាដែលធ្លាប់ជាគូប្រជែង ជាអ្នកធ្វើរដ្ឋប្រហារទម្លាក់រដ្ឋាភិបាលរបស់ត្រកូលលោកថាក់ស៊ីន។ ដើម្បីជំនះទៅបង្កើតរដ្ឋាភិបាលថ្មី គណបក្សភឿថៃដឹកនាំដោយកូនស្រីរបស់លោកថាក់ស៊ីន បានងាកទៅចាប់ដៃ ជាមួយគណបក្ស គាំទ្រដោយពួកយោធាថៃ ដោយសុខចិត្តដោះដៃពីគណបក្ស Move Forward របស់លោកភិថា លីមចៈរើនរ៉ាត់ ដែលជាគណបក្សចម្រើននិយម និងទទួលបានសំឡេងច្រើននៅក្នុងការបោះឆ្នោតជាតិ។
ប៉ុន្តែ លោកនាយករដុ្ឋមន្រ្តី សេដ្ឋា ថៈវីស៊ីន មកពីគណបក្សភឿថៃរបស់លោកថាក់ស៊ីន អះអាង បញ្ជាក់សាជាថ្មីថា ការសម្រេចដោះលែងលោកថាក់ស៊ីនធ្វើឡើងទៅតាមច្បាប់របស់នាយកដ្ឋានពន្ធនាគារ។ ម្យ៉ាងបើតាម សេដ្ឋា ថៈវីស៊ីន លោកថាក់ស៊ីនដែលធ្លាប់ជានាយករដ្ឋមន្រ្តីថៃជាច្រើនឆ្នាំ នៅតែមានប្រជាប្រិយភាពនៅក្នុងចំណោមប្រជាជន។ ដូច្នេះ លោកជឿជាក់ថា លោកថាក់ស៊ីនអាចផ្តល់យោបល់ ប្រឹក្សាល្អសម្រាប់រដ្ឋាភិបាល។
ទោះត្រូវដោះលែងឲ្យមានសេរីភាពលើកនេះ លោកថាក់ស៊ីននៅមិនទាន់លាងខ្លួនជ្រះរួចផុតពីសំណុំរឿងតុលាការ ព្រោះលោកកំពុងជាប់ក្នុងបញ្ជីខ្មៅរបស់ព្រះរាជអាជ្ញាថៃ ដែលចោទលោកពីបទជេរប្រមាថព្រះមហាក្សត្រ នៅឆ្នាំ ២០១៥ នៅពេលលោកកំពុងស្ថិតនៅបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ