អាជ្ញាធរម៉ាឡេស៊ីចាប់ជនភៀសខ្លួនរ៉ូហ៊ីងយ៉ាជាង៤០នាក់ ដែលបានរត់គេចពីមណ្ឌលឃុំឃាំង
យ៉ាងហោចណាស់ មានជនភៀសខ្លួនរ៉ូហ៊ីងយ៉ា ចំនួនជាង៤០នាក់ ដែលត្រូវបាននគរបាលម៉ាឡេស៊ី ចាប់ឃាត់ខ្លួន និងយកមកដាក់មណ្ឌលឃុំឃាំងវិញ បន្ទាប់ពីពួកគេបានរត់គេចចេញ កាលពីថ្ងៃព្រហស្បតិ៍។ យោងតាមអាជ្ញាធរម៉ាឡេស៊ី ជនរ៉ូហ៊ីងយ៉ាទាំងនោះ មានអាការស្លេកស្លាំង ហេវហត់ខ្លាំង ព្រោះគ្មានចំណីអាហារបរិភោគ។ ប្រភពដដែលអះអាងថា នៅមានជនភៀសខ្លួនរ៉ូហ៊ីងយ៉ា ប្រមាណជិត១០០នាក់ទៀត ដែលបានរត់គេចពីមណ្ឌលឃុំឃាំង ហើយកំពុងសំងំពួននៅក្នុងព្រៃ។
ចុះផ្សាយនៅថ្ងៃ៖
ស្តាប់ - ០៣:០៤
កាលពីថ្ងៃព្រហស្បតិ៍ ទី១កុម្ភៈ មានករណីផ្ទុះអំពើហិង្សាចលាចល នៅក្នុងមណ្ឌលឃុំឃាំងមួយ នៅភាគខាងជើងម៉ាឡេស៊ី ក្នុងក្រុង Bidor រដ្ឋ Perak ជាមណ្ឌលដែលម៉ាឡេស៊ីឃាត់បង្ឃាំងទុក នូវជនភៀសខ្លួនរ៉ូហ៊ីងយ៉ា ជាច្រើនរយនាក់។ ផ្អែកតាមអាជ្ញាធរម៉ាឡេស៊ី ក្រោយហេតុការណ៍តវ៉ាចលាចលនេះ មានជនភៀសខ្លួនរ៉ូហ៊ីងយ៉ា ចំនួន១៣១នាក់ បានរត់គេចចេញពីមណ្ឌលឃុំឃាំងនេះ។
ឆ្លងកាត់ប្រតិបត្តិការរុករក ដោយមានការចូលរួមពីនគរបាលច្រើនរយនាក់ និងមន្ត្រីអន្តោប្រវេសន៍ផង នៅព្រឹកថ្ងៃអាទិត្យទី៤កុម្ភៈ គេបានឃាត់បានត្រលប់មកវិញ នូវជនភៀសខ្លួនរ៉ូហ៊ីងយ៉ា ចំនួន៤១នាក់ នៅក្នុងចំការដូចប្រេងនិងក្នុងព្រៃ មិនឆ្ងាយប៉ុន្មានពីក្រុង Tapah និងក្រុង Bidor ។ នគរបាលម៉ាឡេស៊ី បញ្ជាក់ថា ជនរ៉ូហ៊ីងយ៉ាដែលគេចាប់បានមកវិញនេះ គឺសុទ្ធតែភេទប្រុស ហើយមានអាការហេវហត់ ស្លេងស្លាំងអស់កម្លាំងខ្លាំងណាស់ ដោយសារតែពួកគេ គ្មានអ្វីបរិភោគច្រើនថ្ងៃហើយ។
លោកនាយស្នងការនគរបាលរដ្ឋPerak បានអះអាងថា នៅមានជនភៀសខ្លួនរ៉ូហ៊ីងយ៉ា ជិត១០០នាក់ទៀត ដែលទំនងជាពួនសំងំនៅក្នុងព្រៃ ហើយដែលសមត្ថកិច្ចកំពុងតែស្វែងរកពួកគេ ដើម្បីចាប់យកមទុកក្នុងមណ្ឌលវិញ។ ដោយឡែក កាលពីយប់ថ្ងៃព្រហស្បតិ៍ គេបានប្រទះឃើញសាកសពបុរសរ៉ូហ៊ីងយ៉ាម្នាក់ ដែលត្រូវបានរថយន្តមួយបុកស្លាប់ ក្នុងពេលបុរសនេះ ដើរឆ្លងផ្លូវល្បឿនលឿនក្នុងយប់ងងឹត។
ផ្អែកតាមអង្គការការពារសិទ្ធិមនុស្ស គឺស្ថានភាពរស់នៅរបស់ជនភៀសខ្លួនរ៉ូហ៊ីងយ៉ា នៅតាមមណ្ឌលឃុំឃាំងម៉ាឡេស៊ី មានការលំបាកខ្លាំងណាស់។ ក្រៅពីមិនអាចចេញក្រៅមានសេរីភាព ពួកគេត្រូវរស់នៅកកកុញប្រជ្រៀតគ្នា គ្មានចំណីអាហារគ្រប់គ្រាន់ និងគ្មានលក្ខខណ្ឌអនាម័យត្រឹមត្រូវ។ ហេតុដូចឆ្នេះហើយ បានជាមានការផ្ទុះការតវ៉ា ឈានទៅកើតអំពើហិង្សា ហើយមានអ្នកខ្លះរត់គេចចេញពីមណ្ឌល។
កាលពីឆ្នាំ២០២២ មានជនភៀសខ្លួនរ៉ូហ៊ីងយ៉ា ចំនួន៥២៨នាក់ បានរត់គេចពីមណ្ឌលឃុំឃាំង នៅក្នុងរដ្ឋប៉េណាំង ភាគខាងជើងម៉ាឡេស៊ី។ ហើយនៅក្នុងឆ្នាំ២០២២ដែរ ផ្អែកតាមអង្គការUNHCR យ៉ាងហោចណាស់ មានជនភៀសខ្លួនរ៉ូហ៊ីងយ៉ា ចំនួន៣៥០០នាក់ បានធ្វើដំណើរតាមទូកផ្សងជីវិត ឆ្ពោះទៅកាន់ប្រទេសអាស៊ីអាគ្នេយ៍មួយចំនួន ហើយក្នុងនោះ យ៉ាងហោចជិត១០០០នាក់ ដែលបានស្លាប់ឬបាត់ខ្លួន។
គិតរវាងពីខែវិច្ឆិកាឆ្នាំមុន ដល់ខែមករាឆ្នាំ២០២៤នេះ មានជនភៀសខ្លួនរ៉ូហ៊ីងយ៉ា ចំនួន១៧៥២នាក់ បានធ្វើដំណើរមកដល់ឥណ្ឌូណេស៊ី។ វត្តមានជនភៀសខ្លួនរ៉ូហ៊ីងយ៉ា បានបង្កឲ្យផ្ទុះការតវ៉ាពីសំណាក់ប្រជាជនឥណ្ឌូណេស៊ីខេត្តអាឆេ អមជាមួយនឹងពាក្យពេជន៍ជេរប្រមាថ ស្អប់ខ្ពើមរើសអើង យ៉ាងព្រោងព្រាតពេញបណ្តាញសង្គម។ នៅម៉ាឡេស៊ីវិញ យោងតាមតួលេខផ្លូវការ គឺមានជនភៀសខ្លួនរ៉ូហ៊ីងយ៉ាប្រមាណ១សែននាក់រស់នៅ ដែលជាទូទៅ គឺពួកគេរស់នៅក្រៅសង្គម ត្រូវបានគេរើសអើងមើលងាយ ហើយភាគច្រើនធ្វើការជាកម្មករខុសច្បាប់ ក្នុងវិស័យសំណង់ និងការងារប្រើកម្លាំងផ្សេងទៀត ដែលបានប្រាក់កម្រៃទាបបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ