ចិនត្រូវក្រុមប្រទេសលោកខាងលិច រិះគន់ខ្លាំងៗ នៅក្រុមប្រឹក្សាសិទ្ធិមនុស្ស
នៅក្រុមប្រឹក្សាសិទ្ធិមនុស្ស នៃអង្គការសហប្រជាជាតិ កាលពីថ្ងៃអង្គការទី២៣មករា ចិនត្រូវបានក្រុមប្រទេសលោកខាងលិច សម្តែងមតិរិះគន់ខ្លាំងៗ។ ជាការរិះគន់ ដែលទាក់ទិននឹងការរំលោភបំពានសិទ្ធិមនុស្ស សិទ្ធិសេរីភាពបញ្ចេញមតិ និងជាពិសេសនោះ គឺទាក់ទិននឹងការធ្វើទុក្ខបុកម្នេញធ្ងន់ធ្ងរ ទៅលើប្រជាជនអ៊ុយហ្គួរ នៅខេត្តស៊ីនជាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៦
ចិនបានបញ្ជូនគណៈប្រតិភូ មានគ្នាច្រើនសន្ធឹកមកថ្លែងសារការពារខ្លួន ក្នុងក្រុមប្រឹក្សាសិទ្ធិមនុស្ស។ លោក Chen Xu ឯកអគ្គរដ្ឋទូតចិនប្រចាំនៅអង្គការសហប្រជាជាតិ ក្រុងហ្សឺណែវ បានឡើងថ្លែងថា ចិនបានបោះជំហានទៅមុខយ៉ាងល្អអស្ចារ្យ ទាក់ទិននឹងការគោរពសិទ្ធិមនុស្ស។ ប៉ុន្មានឆ្នាំមកនេះ រដ្ឋាភិបាលចិនបានធ្វើឲ្យជីវភាពរបស់ប្រជាជន កាន់តែល្អប្រសើរឡើង បានបិទបញ្ចប់ភាពក្រីក្រ និងបានការពារការគោរពសិទ្ធិមនុស្ស។ លោកអះអាងថា ចិនចាត់ទុកការគោរពសិទ្ធិមនុស្ស គឺជាការងារដ៏សំខាន់បំផុត នៃអភិបាលកិច្ចរបស់រដ្ឋចិន។
ចប់ពីសុន្ទរកថាអួតសរសើរខ្លួនឯង របស់គណៈប្រតិភូចិននេះ ដល់វេនប្រទេសផ្សេងៗទៀត ដែលត្រូវឡើងបញ្ចេញមតិទៅលើសា្ថនភាពនៃការគោរពសិទ្ធិមនុស្សនៅចិន។ តំណាងអង្គទូតនៃក្រុមប្រទេសលោកខាងលិច បានឡើងថ្លែងសុន្ទរកថាបន្តបន្ទាប់គ្នា រិះគន់រដ្ឋអំណាចចិនថាបានរំលោភបំពានសិទ្ធិមនុស្ស សិទ្ធិសេរីភាពបញ្ចេញមតិ និងសេរីភាពសាសនាថ។ ក្រុមប្រទេសលោកខាងលិច ចោទចិនថាបាននិងកំពុង លុបបំបាត់ប្រពៃណីវប្បធម៌ និងសាសនា របស់សហគមន៍ជនជាតិភាគតិច ជាក់ស្តែងជនជនជាតិអ៊ុយហ្គួរ និងជនជាតិទីបេ។
ឯកអគ្គរដ្ឋទូតអៀរឡង់ បានលើកឡើងថា ប្រទេសលោកមានព្រួយបារម្ភណាស់ ស្តីពីការកៀបសង្កត់អង្គការសង្គមស៊ីវីលនៅចិន។ លោកបានសង្កត់ធ្ងន់ ទៅលើសកម្មភាពធ្វើទុក្ខបុកម្នេញ រារាំងសិទ្ធិសេរីភាពបញ្ចេញមតិនៅហុងកុង និងជាពិសេសនោះ គឺការរំលោភបំពានដ៏ធ្ងន់ធ្ងរបំផុត ដែលអាជ្ញាធរចិន បានធ្វើទៅលើជនជាតិអ៊ុយហ្គួរ និងសហគមន៍អ្នកកាន់សាសនាអ៊ីស្លាមផ្សេងទៀត នៅខេត្តស៊ីនជាំង។
សូមរំលឹកថា កាលពីឆ្នាំ២០១៨ ចិនក៏ត្រូវបានគេរិះគន់ខ្លាំងៗដែរ នៅក្រុមប្រឹក្សាសិទ្ធិមនុស្ស ទាក់ទិននឹងការរំលោភសិទ្ធិមនុស្សនៅខេត្ដស៊ីនជាំង។ អង្គការក្រៅរដ្ឋាភិបាលជាច្រើន បានអះអាង ដោយមានភស្តុតាងជាក់ច្បាស់ ថាអាជ្ញាធរចិនបានចាប់ជនជាតិអ៊ុយហ្គួរប្រមាណជាង១លាននាក់ ដាក់ឃុំ បង្ខំឲ្យធ្វើការ ព្រមទាំងចាប់ក្រៀវឲ្យផុតពូជថែមទៀត។
នៅខែសីហា ឆ្នាំ២០២២ ឧត្តមស្នងការដ្ឋានសិទ្ធិមនុស្ស នៃអង្គការសហប្រជាជាតិ បានចេញរបាយការណ៍ថ្មីមួយ ជាមួយភស្តុតាងថ្មីៗបន្ថែមកាន់តែច្រើន។ យោងតាមរបាយការណ៍នេះ គឺចិនទំនងជាបានធ្វើអំពើ ឧក្រិដ្ឋកម្មប្រឆាំងមនុស្សជាតិទៅលើជនជាតិអ៊ុយហ្គួរ។ តែយ៉ាងណា ចិនបានប្រើយុទ្ធសាស្ត្រដាក់សំពាធទៅលើប្រទេសជាច្រើន ដើម្បីរារាំងមិនឲ្យមានការជជែកដេញដោល ស្តីអំពីរបាយការណ៍ថ្មីនេះ។
លោក Dolkun Isa ប្រធានសមាជពិភពលោកដើម្បីជនជាតិអ៊ុយហ្គួរ ដែលបច្ចុប្បន្នរស់នៅប្រទេសអាល្លឺម៉ង់ បានលើកឡើងថា យន្តការសួរឆ្លើយនៅក្រុមប្រឹក្សាសិទ្ធិមនុស្សថ្ងៃអង្គារទី២៣មករា គឺជាឱកាសដែលប្រទេសទាំងអស់ ចោទសួរទៅកាន់ចិន និងប្រាប់ចិនឲ្យច្បាស់ៗ ថាត្រូវតែបញ្ឈប់ជាបន្ទាន់ នូវផែនការធ្វើអំពើប្រល័យពូជសាសន៍ មកលើជនជាតិអ៊ុយហ្គួរ៕
គួរបញ្ជាក់ថា នៅក្រុមប្រឹក្សាសិទ្ធិមនុស្ស រៀងរាល់៥ឆ្នាំម្តង គេមានយន្តការពិសេសមួយ ដែលអនុញ្ញាតឲ្យប្រទេសសមាជិកនីមួយៗ ឡើងថ្លែងអំពីលទ្ធផលដែលខ្លួនសម្រេចបាន ស្តីការបញ្ហាសិទ្ធិមនុស្ស មុននឹងមានការសួរដេញដោល បញ្ចេញមតិ ពីសំណាក់ប្រទេសសមាជិកផ្សេងៗទៀត។ យ៉ាងណាក៏ដោយ មន្ត្រីទូតប្រទេសលោកខាងលិចម្នាក់ បានត្អូញត្អែរថា ពេលវេលាមានតែកន្លះថ្ងៃទេ តែមានប្រទេស១៦៣ ដែលបានចុះឈ្មោះឡើងថ្លែងសារ ម្នាក់៤៥វិនាទី ទាំងរិះគន់ចិនផង ទាំងគាំទ្រចិនផង។ ៤៥វិនាទី គឺវាខ្លីណាស់ ដើម្បីលើកអំណះអំណាងឲ្យបានក្បោះក្បាយ ស្តីពីបញ្ហាសិទ្ធិមនុស្សនៅចិនមួយទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ