ជប៉ុនកា្លយជាប្រទេសទី៥ក្នុងពិភពលោក ដែលបញ្ជូនយានទៅចុះចតដោយជោគជ័យលើឋានព្រះចន្ទ
ផ្ទុយពីក្រុមហ៊ុនអាមេរិកដែលបរាជ័យក្នុងបេសកកម្មបញ្ជូនយានទៅឋាន ព្រះចន្ទនៅខែមករានេះ ជប៉ុននៅថ្ងៃសៅរ៍ទី២០ មករា ២០២៤ អបអរយានរបស់ខ្លួនដែលចុះចតដោយជោគជ័យលើដីព្រះចន្ទ។ ការណ៍នេះធ្វើឲ្យជប៉ុនក្លាយជាប្រទេសទី៥ក្នុងពិភពលោកដែលមានសមត្ថភាព បញ្ជូនយានទៅចុះចតនៅឋានព្រះចន្ទ បន្ទាប់ពីអាមេរិក រុស្ស៊ីចិន និងឥណ្ឌា។ ម្យ៉ាង វាឆ្លុះបញ្ចាំងផងដែរពីសមត្ថភាពរបស់ជប៉ុន នៅក្នុងការប្រកួតប្រជែងបច្ចេកវិទ្យានៅក្នុងបេសកកម្មអវកាសអន្តរជាតិ។
ចុះផ្សាយនៅថ្ងៃ៖
ស្តាប់ - ០៤:៣៥
នៅថ្ងៃសៅរ៍ ទី ២០មករា ជប៉ុនត្រូវកត់ត្រាជាប្រទេសទី៥ ក្នុងប្រវត្តិសាស្រ្តពិភពលោក ដែលបញ្ជូនដោយជោគជ័យយានទៅចុះចតនៅលើឋានព្រះចន្ទ។ កូនយានតូច SLIM(Smart Lander for Investigation Moon)ចុះចតបានសម្រេច នៅលើដីព្រះចន្ទ នៅវេលាម៉ោង ០០ និង២០នាទី ម៉ោងនៅប្រទេសជប៉ុន និងចាប់ផ្តើមផ្តល់ព័ត៌មានមកផែនដី។ នេះបើតាមការប្រកាសរបស់មជ្ឈមណ្ឌលអវកាសជប៉ុន Jaxa។
ចុះចតដោយជោគជ័យលើដីព្រះចន្ទមែន ប៉ុន្តែ កូនយាន ឬម៉ូឌុលSLIM អាចខ្វះថាមពល ដោយសារបញ្ហាផ្ទាំងសូឡា។ បើតាមលោក Hitoshi Kuninaka អ្នកទទួលខុសត្រូវម្នាក់របស់មជ្ឈមណ្ឌល Jaxa ដោយសារតែផ្ទាំងស្រូបពន្លឺព្រះអាទិត្យជួបបញ្ហា មិនដំណើរការតាមការគ្រោងទុក កូនយាន SLIMនៅតែមានអាគុយសម្រាប់ធ្វើការប្រមូលទន្នន័យប៉ុន្មានម៉ោងដែរ នៅលើឋានព្រះចន្ទ។ យ៉ាងណាក៏ដោយ អ្នកទទួលខុសត្រូវខាងលើ នៅតែមានសុទិដ្ឋិនិយម និងសង្ឃឹមថា ផ្ទាំងសូឡាអាចដំណើរការឡើងវិញ។
ទោះកូនយាន SLIM អាចខ្វះថាមពល ដោយសារបញ្ហាផ្ទាំងស្រូបពន្លឺព្រះអាទិត្យ នាយករដ្ឋមន្រ្តីជប៉ុន លោកហ្វូមីអូ គីស៊ីដា បានសរសេរសារចាត់ទុកការចុះចតយាន SLIM នៅលើដីព្រះចន្ទ ជាដំណឹងគួរឲ្យស្វាគម។ ចំណែក ប្រធានទីភ្នាក់ងារអវកាស ណាសា លោកBill Nelson បានផ្ញើសារអបអរជប៉ុនដែលបានក្លាយជាប្រទេសទី៥ក្នុងពិភពលោក បន្ទាប់ពីអាមេរិក រុស្ស៊ី ចិន និងឥណ្ឌា ដែលបានបញ្ជូនយានទៅចុះចតដោយជោគជ័យ លើដីព្រះចន្ទ។
សម្រាប់មជ្ឈមណ្ឌលអវកាសជប៉ុន បេសកកម្មទៅឋានព្រះចន្ទអាចចាត់ទុកថា ជោគជ័យពេញលេញ ដរាបណាគេសម្រេចគោលដៅដែលគេចង់បាន ពោល គឺកូនយាន SLIMត្រូវចុះចតនៅលើទីតាំង ដែលគេបានដៅកំណត់ទុក។ ជាមួយទិន្នន័យដែលកូនយាន SLIMកំពុងបញ្ជូនមកផែនដី អ្នកវិទ្យាសាស្រ្តជប៉ុនកំពុងវិភាគ ដើម្បីដឹងថា តើយាន SLIMបានចុះចតនៅក្នុងរង្វង់ ១០០ម៉ែត្រពីចំណុចដែលគេដៅទុកឬទេ។ ១០០ម៉ែត្រនេះជាចម្ងាយជិតមែនទែន ព្រោះកន្លងមក ការចុះចតយាន ស្ថិតនៅឆ្ងាយពីកន្លែងកំណត់ ដល់ទៅរាប់សិបគីឡូម៉ែត្រ។ ក្នុងករណីដែលយាន SLIM របស់ជប៉ុន ចុះចតមិនឆ្ងាយប៉ុន្មានពីកន្លែងដៅទុក នោះជប៉ុន មិនត្រឹមគេចាត់ចូលក្នុងក្រុមប្រទេស៥ដែលមានសមត្ថភាពបញ្ជូនយានទៅចុះចតនៅឋានព្រះចន្ទតែប៉ុណ្ណោះទេ ប៉ុន្តែ ជប៉ុនជាប្រទេសទី១ លើកដំបូងគេ ដែលមានបច្ចេកវិទ្យាឈានមុខ ដើម្បីបញ្ជូនយានទៅចុះចតនៅកន្លែងជាក់ច្បាស់មួយ។
យោងតាមមជ្ឈមណ្ឌលអវកាសជប៉ុន Jaxa បេសកកម្មបញ្ជូនយាន SLIM ទៅឋានព្រះចន្ទលើកនេះ គឺជាការធ្វើតេស្តសាកល្បងបច្ចេកវិទ្យា ដែលនឹងអនុញ្ញាតឲ្យគេចុះចតនៅកន្លែងដែលគេចង់ចុះចត នៅលើឋានព្រះចន្ទ ពោលគឺមិនមែនចុះចត ដោយសារស្ថានភាពដីអនុគ្រោះ ងាយស្រួលចុះចតនោះទេ។
ក្រៅតែពីតេស្តសមត្ថភាព បច្ចេកវិទ្យាចុះចតនៅលើកន្លែងជាក់ច្បាស់ណាមួយ បេសកកម្មទៅឋានព្រះចន្ទរបស់ជប៉ុនលើកនេះ នឹងអាចឲ្យគេដឹងកាន់តែច្បាស់ពីរចនាសម្ព័ន្ធរបស់ព្រះចន្ទ ការកកើតឡើងនូវផ្កាយរណបរបស់ផែនដីមួយនេះ តាមរយៈការវិភាគដីរ៉ែដោយប្រើកាម៉េរ៉ាពិសេស។
ចាប់ផ្តើមចេញពីផែនដី នៅខែកញ្ញា និងចូលទៅក្នុងគន្លងតារាវិថីរបស់ព្រះចន្ទនៅចុងខែធ្នូកន្លងទៅ យានជប៉ុនសំដៅឋានព្រះចន្ទ បានក្លាយជាចំណាប់អារម្មណ៍ បន្ទាប់ពីយានអវកាសរបស់ក្រុមហ៊ុនអវកាសអាមេរិក មួយទៀត ទើបបរាជ័យ ដោយសារបញ្ហាលេចប្រេង។ព្រះចន្ទបានក្លាយជាគោលដៅចុះចតរបស់ប្រទេសមហាអំណាចអវកាស។ នៅខែសីហាឆ្នាំមុន ឥណ្ឌាទើបបញ្ជូនយានចល័ត ទៅចុះចតដោយជោគជ័យលើដីព្រះចន្ទលើកទី១ក្នុងប្រវត្តិសាស្រ្តរបស់ខ្លួន។ នៅមុនឥណ្ឌា គឺមានតែសហរដ្ឋអាមេរិក សហភាពសូវៀត និងប្រទេសចិនដែលទទួលបានជោគជ័យក្នុងការបញ្ជូនយានទៅចុះលើដីព្រះចន្ទ។
ជប៉ុនប្រាកដណាស់មានមោទនភាព បន្ទាប់ពីបរាជ័យពីរលើកនៅក្នុងបេសកកម្មបញ្ជូនយានទៅឋានព្រះចន្ទ កាលពីឆ្នាំ ២០២២ និងឆ្នាំ ២០២៣។ សម្រាប់អ្នកជំនាញជប៉ុន ក្នុងករណីដែលកូនយាន SLIM ចុះចតនៅមិនឆ្ងាយប៉ុន្មានពីកន្លែងដៅកំណត់ទុក ជប៉ុននឹងមានមោទនភាពមួយទៀតដើម្បីបង្ហាញដល់ពិភពលោកថា ជប៉ុនមានបច្ចេកវិទ្យាឈានមុខ ដែលគេមិនអាចបដិសេធបាន ហើយដែលគេត្រូវបញ្ចូលជប៉ុនទៅក្នុងក្រុមប្រទេសដែលអភិវឌ្ឍកម្មវិធីសម្រាប់បេសកកម្មឋានព្រះចន្ទ។ បេសកកម្មឋានព្រះចន្ទ សំខាន់ណាស់ដើម្បីរុករកធនធាន។ ម្យ៉ាងព្រះចន្ទនឹងត្រូវគេប្រើជាទីតាំង មូលដ្ឋានដើម្បីធ្វើដំណើរបន្តទៅកាន់ភពព្រះអង្គារ ឬភពផ្សេងទៀតក្នុងប្រព័ន្ធព្រះអាទិត្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ