តើកូរ៉េខាងជើងកំពុងត្រៀមខ្លួនធ្វើសង្រ្គាម?
កូរ៉េខាងជើងមិនបន្ថយដៃសាកល្បងសមត្ថភាពសព្វាវុធ។ នៅថ្ងៃសុក្រទី១៩មករាថា ព្យុងយ៉ាងបានប្រកាសថា ខ្លួនបានធ្វើតេស្តសាកល្បងប្រព័ន្ធអាវុធនុយក្លេអ៊ែរក្រោមទឹក ដើម្បីឆ្លើយតបទៅនឹងសមយុទ្ធជើងទឹករួម របស់កូរ៉េខាងត្បូង អាមេរិក និងជប៉ុន នៅសប្តាហ៍នេះ។ មានជំហរកាន់តែតឹងខ្លាំងជាមួយកូរ៉េខាងត្បូង ដែលមេដឹកនាំកូរ៉េខាងជើងចាត់ទុកជាសត្រូវចំបងរបស់កូរ៉េខាងជើង ការធ្វើតេស្តសាកល្បងប្រព័ន្ធអាវុធនុយក្លេអ៊ែររបស់កូរ៉េខាងជើងធ្វើឲ្យគេកាន់តែព្រួយបារម្ភខ្លាចថា នឹងអាចមានការប្រឈមអាវុធដាក់គ្នា នៅឧបទ្វីបកូរ៉េ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៣
នៅក្នុងសេចក្តីប្រកាសដែលទីភ្នាក់ងារព័ត៌មានរដ្ឋ KCNAចុះផ្សាយនៅថ្ងៃសុក្រនេះ ក្រសួងការពារជាតិកូរ៉េខាងជើងបានប្រកាសថា កូរ៉េខាងជើងបានធ្វើការសាកល្បងប្រព័ន្ធអាវុធនុយក្លេអ៊ែរក្រោមទឹក នៅសមុទ្រកូរ៉េខាងកើត។ សម្រាប់កងទ័ពកូរ៉េខាងជើង ការសាកល្បងប្រព័ន្ធអាវុធនុយក្លេអ៊ែរក្រោមទឹក ជាការឆ្លើយតបទៅនឹងសមយុទ្ធយោធារបស់អាមេរិក កូរ៉េខាងត្បូង និងជប៉ុន កាលពីថ្ងៃពុធ ដែលកូរ៉េខាងជើងចាត់ទុកថា ជាសមយុទ្ធគំរាមកំហែងធ្ងន់ធ្ងរដល់សន្តិសុខកូរ៉េខាងជើង។
យោងតាមអ្នកនាំពាក្យរបស់ក្រសួងការពារជាតិកូរ៉េខាងជើង ការធ្វើតេស្តលើកនេះអនុញ្ញាតឲ្យកូរ៉េខាងជើងពង្រឹងសមត្ថភាពប្រព័ន្ធអាវុធនុយក្លេអ៊ែរ ដើម្បីវាយបកទៅលើសត្រូវ។ ប្រព័ន្ធ អាវុធនុយក្លេអ៊ែរក្រោមទឹក ដែលកងទ័ពកូរ៉េខាងជើងសាកល្បងនៅសប្តាហ៍នេះ មានឈ្មោះ ថាHaeil 5 23។ Haeil ដែលមានន័យជាភាសាកូរ៉េថា រលកយក្ស គឺប្រភេទដ្រូនក្រោមទឹក ដែលមានបំពាក់ដោយក្បាលគ្រាប់នុយក្លេអ៊ែរ។ នៅក្នុងការសាកល្បងជាលើកទី១ នៅឆ្នាំមុន កូរ៉េខាងជើងធ្លាប់អះអាងថា ប្រព័ន្ធដ្រូនក្រោមទឹក មានសមត្ថភាពវាយប្រហារនុយក្លេអ៊ែរ នៅក្នុងដែនទឹករបស់សត្រូវ កម្ទេចកងនាវាចម្បាំង ឬមូលដ្ឋានប្រតិបត្តិការទ័ពសំខាន់ៗ តាមរយៈការបង្កើតរលកយក្សវិទ្យុសកម្ម ដោយការបំផ្ទុះក្រោមផ្ទៃទឹក។
សម្រាប់លោកHong Min អ្នកវិភាគនៅវិទ្យាស្ថានកូរ៉េដើម្បីការផ្សះផ្សាជាតិ នៅសេអ៊ូល ការប្រកាសរបស់កូរ៉េខាងជើងស្តីពីសាកល្បងប្រព័ន្ធអាវុធនុយក្លេអ៊ែរក្រោមទឹកជាសញ្ញាបញ្ជាក់ថា កូរ៉េខាងជើងមានគម្រោងប្រើប្រាស់ដ្រូនក្រោមទឹកឈ្មោះ Haeil ឬរលកយក្ស សម្រាប់ប្រតិបត្តិការកងទ័ពជើងទឹករបស់ខ្លួន។ ធ្លាប់រត់គេចចេញ ពីកូរ៉េខាងជើង និងក្លាយជាអ្នកស្រាវជ្រាវសម្រាប់វិទ្យាស្ថានពិភពលោកស្តីពីកូរ៉េខាងជើង លោកAhn Chan-ilពន្យល់ថា គេពិបាកនឹងប៉ាន់ស្មានពីសមត្ថភាពពិតប្រាកដរបស់ប្រព័ន្ធនុយក្លេអ៊ែរក្រោមទឹកកូរ៉េខាងជើង ព្រោះថា កម្រិតចំណេះដឹងវិទ្យាសាស្រ្តរបស់កូរ៉េខាងជើងនៅក្នុងការផលិតអាវុធប្រភេទនេះ កំពុងស្ថិតនៅក្នុងដំណាក់កាលអភិវឌ្ឍនៅឡើយ។
នៅមុនសាកល្បងដ្រូនក្រោមទឹក កូរ៉េខាងជើង ធ្លាប់បាញ់សាកល្បងជាញឹកញយ មីស៊ីលបាលីស្ទិក បាញ់ចេញពីនាវាមុជទឹក។ ក្លាយជាមហាអំណាចនុយក្លេអ៊ែរកាលពីឆ្នាំមុន កូរ៉េខាងជើងបានបោះជំហានកាន់តែលឿន នៅក្នុងបច្ចេកវិទ្យាផលិតសព្វាវុធ និងបង្កើតយុទ្ធសាស្រ្តយោធាថ្មី ដើម្បីអាចវាយប្រហារនៅទីកន្លែងឆ្ងាយៗ ដោយមិនឲ្យសត្រូវដឹងខ្លួនមុន ឬដើម្បីវាយបកវិញ ក្នុងករណីមូលដ្ឋានទ័ពរបស់ខ្លួនរងការវាយប្រហារពីសត្រូវ។
នៅថ្ងៃអាទិត្យកន្លងទៅ ព្យុងយ៉ាងបានបាញ់សាកល្បងមីស៊ីលបាលីស្ទិកដែលមានបំពាក់ដោយក្បាលគ្រាប់អ៊ីពែសូនិក ពោលគឺនៅតែប៉ុន្មានថ្ងៃក្រោយ ដែលកូរ៉េខាងជើងធ្វើសមយុទ្ធបាញ់គ្រាប់កាំភ្លើងពិតនៅក្បែរកោះរបស់កូរ៉េខាងត្បូង។ ខណៈដែលស្ថានការណ៍នៅឧបទ្វីបកូរ៉េកាន់តែតានតឹងខ្លាំង មេដឹកនាំកូរ៉េខាងជើងលោកគីម ជុងអ៊ុន ដែលចាត់កូរ៉េខាងត្បូងជាសត្រូវធំ ប្រឆាំងស្អប់ កូរ៉េខាងជើង បានប្រាប់ឲ្យសភានៅសប្តាហ៍នេះឲ្យសើរើរដ្ឋធម្មនុញ្ញ ដើម្បីកាត់យកកូរ៉េខាងត្បូងមកដាក់ក្នុងផែនទីរបស់កូរ៉េខាងជើង នៅក្នុងករណីផ្ទុះសង្រ្គាមនៅឧបទ្វីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ