ភ្នំភ្លើងបីនៅជប៉ុន ឥណ្ឌូណេស៊ី និងអ៊ីស្លង់ បានផ្ទុះ ក្នុងថ្ងៃតែមួយដូចណាត់គ្នា
បន្ទាប់ពីជប៉ុន ភ្នំភ្លើងម៉ារ៉ាពី ដែលស្ថិតនៅលើកោះស៊ូម៉ាត្រាប្រទេសឥណ្ឌូណេស៊ី បានផ្ទុះជាថ្មីនៅព្រឹកថ្ងៃអាទិត្យទី១៤មករានេះ ដោយជះផ្សែងផេះគ្របពេញមេឃ។ អាជ្ញាធរឥណ្ឌូណេស៊ីបានជម្លៀសប្រជាពលរដ្ឋ តាំងពីប៉ុន្មានថ្ងៃមុន ប៉ុន្តែនៅអ៊ីស្លង់ ភ្នំភ្លើងមានសកម្មភាពលឿនខ្លាំងហួសពីការព្យាករ ទើបជំរុញឱ្យមានការជម្លៀសប្រជាជនជាបន្ទាន់ និងទាំងយប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ដូចណាត់គ្នា នៅថ្ងៃអាទិត្យនេះ មានគ្រោះភ្នំភ្លើងធំៗបីបានផ្ទុះឡើង។ ផ្តើមដំបូងគេ គឺភ្នំភ្លើងអូតាកេរបស់ជប៉ុន។ តែជាសំណាងល្អ ភ្នំភ្លើងមិនបង្កឱ្យមានជនរងគ្រោះរបួស ឬការខូចខាតអ្វីទេ ហើយក៏គ្មានការជម្លៀសប្រជាជនដែរ។
នៅឥណ្ឌូណេស៊ីវិញ ភ្នំភ្លើងម៉ារ៉ាពី ដែលចាប់ផ្តើមសកម្មខ្លាំងតាំងពីជាច្រើនសប្តាហ៍មកហើយ បានផ្ទុះនៅព្រឹកថ្ងៃអាទិត្យទី ១៤មករាវេលាម៉ោង៦និង២១នាទី ម៉ោងនៅក្នុងស្រុក ដោយបញ្ចេញផ្សែងនិងផេះក្រាសឃ្មឹក ពេញផ្ទៃមេឃក្នុងកម្ពស់ជាង១៣០០០ម៉ែត្រ ពីមាត់ភ្នំភ្លើង។
ប៉ុន្តែភ្នាក់ងារគ្រប់គ្រងភ្នំភ្លើងនិងហានិភ័យភូគព្ភសាស្ត្រឥណ្ឌូណេស៊ី បានត្រៀមលក្ខណៈជាមុន។ ប្រជាពលរដ្ឋដែលរស់នៅតាមជ្រលងភ្នំនិងទំនាបមាត់ស្ទឹង ជើងភ្នំម៉ារ៉ាពី បានទទួលដំណឹងស្តីអំពីគ្រោះផ្ទុះភ្នំភ្លើង និងហានិភ័យមានទឹកជំនន់។ ជាទឹកជំនន់បង្កឡើងដោយកំអែរភ្នំភ្លើងចូលទៅក្នុងស្ទឹង ដែលកំពុងជន់ជោរដោយទឹកភ្លៀងរដូវវស្សាស្រាប់។
អាជ្ញាធរឥណ្ឌូណេស៊ីបានដំឡើងអាសន្នដល់កំរិតទីបី តាំងពីនៅថ្ងៃអង្គារមក ហើយពង្រីករង្វង់សុវត្ថិភាពដល់៤គីឡូម៉ែត្រកន្លះពីមាត់ភ្នំភ្លើង ព្រមទាំងបានជម្លៀសប្រជាជន១៥៨នាក់ចេញពីតំបន់នោះ តាំងពីថ្ងៃសុក្រ។ កាលពីខែមុនភ្នំភ្លើងនេះបានផ្ទុះសម្លាប់ទេសចរអ្នកដើរភ្នំ ២៤នាក់រួចហើយ។
មានទីតាំងស្ថិតនៅចំខ្សែក្រវ៉ាត់ភ្នំភ្លើងប៉ាស៊ីហ្វិក ដែលមានសកម្មភាពភ្នំភ្លើងនិងរញ្ជួយដីខ្លាំង ឥណ្ឌូណេស៊ីមានភ្នំភ្លើងសកម្មប្រមាណជិត១៣០។ កាលពីថ្ងៃពុធ ឥណ្ឌូណេស៊ីបានចេញក្រិត្យប្រកាសអាសន្នខ្ពស់បំផុតមួយហើយដោយហេតុភ្នំភ្លើង Lewotobi Laki-Laki កោះនៅខាងកើតប្រទេស បានផ្ទុះដែរ។
ប៉ុន្មានម៉ោងក្រោយមក នៅវេលាម៉ោង៨ព្រឹកម៉ោងនៅក្នុងប្រទេសអ៊ីស្លង់ ភ្នំភ្លើងក្បែរកំពង់ផែនេសាទ Grindavick បានផ្ទុះឡើង និងបង្កការខូចខាតយ៉ាងខ្លាំង។ បើតាមរូបភាពផ្តល់ដោយភ្នាក់ងារឧតុនិយមអ៊ីស្លង់ ដីចាប់គ្រហឹមរញ្ជួយរង្គើយ៉ាងខ្លាំងនៅពេលយប់ និងយ៉ាងលឿន ប្រេះខ្ជាក់កំអែរភ្លើងបានហូរចេញមកតាមស្នាមដីប្រេះ ជាហេតុបង្កឱ្យមានការជម្លៀសប្រជាជនជាបន្ទាន់ទាំងកណ្តាលអាធ្រាត្រ។ ប្រជាជនក្នុងក្រុងGrindavickនេះ ទើបបានទទួលការអនុញ្ញាតឱ្យមករស់នៅជាធម្មតាឡើងវិញបន្ទាប់ជម្លៀសខ្លួនបង្ការតាំងពីថ្ងៃទី១១វិច្ឆិកា គេចពីការរញ្ជួយដីផ្ទុះភ្នំភ្លើង។ នេះជាការផ្ទុះភ្នំភ្លើងលើកទី៥ហើយសម្រាប់អ៊ីស្លង់ក្នុងរយៈពេលមិនដល់បីឆ្នាំផង។ ការផ្ទុះភ្នំភ្លើងលើកទីមុនបានកើតឡើងនៅថ្ងៃទី១៨ធ្នូ ក្នុងតំបន់Grindavickនេះដដែលដែលស្ថិតនៅចម្ងាយប្រមាណតែ៤០គីឡូម៉ែត្រពីរដ្ឋធានី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ