ប្រធានបក្សប្រឆាំងកូរ៉េខាងត្បូងត្រូវខ្មាន់កាំបិតចាក់ឲ្យរបួសត្រង់ ក
នៅកូរ៉េខាងត្បូង ប្រធានបក្សប្រឆាំង លោក លី ចែម្ញុងត្រូវខ្មាន់កាំបិតម្នាក់ចាក់ឲ្យរបួសនៅត្រង់ក នៅថ្ងៃអង្គារទី២មករា ក្នុងអំឡុងពេលលោកធ្វើទស្សនកិច្ចនៅទីតាំង ដែលជាអនាគតព្រលានយន្តហោះថ្មីនៅទីក្រុងប៊ូសាន ភាគអាគ្នេយ៍ ទីក្រុងសេអ៊ូល។ ឃាតករត្រូវប៉ូលិសសង្កត់ចាប់ខ្លួនភ្លាមៗ ប៉ុន្តែ បដិសេធមិនឆ្លើយប្រាប់មូលហេតុដែលធ្វើឲ្យរូបគេចាក់សម្លាប់ប្រធានបក្សប្រឆាំងកូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០៣:២១
លោកលី ចែម្ញុង ប្រធានគណបក្សប្រជាធិបតេយ្យត្រូវឃាតកររុលចូលទៅចាក់សម្លាប់ នៅពេលលោកកំពុងឆ្លើយសំនួររបស់អ្នកកាសែត នៅក្នុងពេលធ្វើទស្សនកិច្ចនៅទីតាំងដែលជាអនាគតការដ្ឋានសាងសង់ព្រលានយន្តហោះ ក្រុងប៊ូសាន។
តាមសាក្សីនៅកន្លែងកើតហេតុ ខ្មាន់កាំបិតក្នុងវ័យប្រមាណ ៦០ឆ្នាំបាននិយាយសុំហត្ថលេខាពីលោកលី ចែម្ញុង មុននឹងហក់ទៅចាក់លោកទាំងកម្រោល។ ភ្លាមៗ មនុស្សជុំវិញ លោកលី ចែម្ញុង ដែលនៅក្នុងនោះ មានប៉ូលិសឯកសណ្ឋានស៊ីវិលបានសង្រ្គុប ផ្តួលផ្ទុចឃាតករទៅនឹងដី ចំណែកលោកលី ចែម្ញុង បិទភ្នែកត្រូវគេផ្តេកទៅលើដី ដោយមានអ្នកយកកន្សែងខ្ទប់ឃាត់ឈាម។
យោងតាមប៉ូលិសកូរ៉េខាងត្បូង លោកលី ចែម្ញុងត្រូវឃាតករចាក់ឲ្យរបួសនៅត្រង់ក ជម្រៅ១សង់ទីម៉ែត្រ។ បន្ទាប់ពីដឹកទៅសង្រ្គោះបន្ទាន់នៅមន្ទីរពេទ្យប៊ូសាន លោកលី ចែម្ញុង ដែលត្រូវឃាតករចាក់ចំសរសៃរឈាមនៅត្រង់ក ត្រូវគេបញ្ជូន តាមឧទ្ធម្ភាគចក្រ ទៅកាន់មន្ទីរពេទ្យ នៅសេអ៊ូល។ អ្នកតំណាងគណបក្សប្រជាធិបតេយ្យរបស់លោកលី ចែម្ញុងបាននិយាយប្រាប់អ្នកកាសែតនៅថ្ងៃអង្គារថា នៅក្រោយការវះកាត់២ម៉ោង លោកលី ចែម្ញុង រួចផុតពីគ្រោះថ្នាក់ដល់ជីវិត និងកំពុងទទួលបានការព្យាយាមយ៉ាងយកចិត្តទុកដាក់ពីក្រុមគ្រូពេទ្យ។
និយាយពីឃាតករវិញ ដែលប៉ូលិសអះអាងថា មានអាយុ៦៧ឆ្នាំ បាននិយាយសារភាពថា គេបានទិញកាំបិតតាមអ៊ីនធ័រនែត ប៉ុន្តែ បដិសេធមិនឆ្លើយប្រាប់ប៉ូលិសពីមូលហេតុដែលធ្វើឲ្យគេលើកដៃចាក់សម្លាប់លោកលី ចេម្ញុង។
នៅក្រោយទទួលដំណឹងចាក់សម្លាប់មេបក្សប្រឆាំង លោកប្រធានាធិបតី យូន សុខយោលសំដែងក្តីបារម្ភពីសុវត្ថិភាពរបស់លោកលី ចែម្ញុង និងថ្កោលទោសការវាយប្រហារទៅលើមេដឹកនាំបក្សប្រឆាំង។
មានអាយុ ៥៩ឆ្នាំ លោកលី ចែម្ញុងធ្លាប់ជាបេក្ខជនប្រជែងយ៉ាងកៀកកិត ដោយចាញ់លោកប្រធានាធិបតី យូន សុខយោលតែប៉ុន្មានសំឡេងប៉ុណ្ណោះ នៅក្នុងការបោះឆ្នោតប្រធានាធិបតី កាលពីឆ្នាំ២០២២។ ម្យ៉ាង ដោយមកពីលោកលី ចែម្ញុង រួបរឹតដោយរឿងអាស្រូវពុករលួយជាច្រើន នៅក្នុងពេលលោកកាន់តំណែង ជាចៅហ្វាយក្រុង Gyonggi។
នៅខែកញ្ញាឆ្នាំមុន ប្រធានបក្សប្រឆាំងកូរ៉េខាងត្បូងរូបនេះ បានរួចផុតដោយប្រផិតប្រផើយពីការចាប់ខ្លួន បន្ទាប់ពីចៅក្រមបដិសេធមិនចេញដីកាចាប់ខ្លួនតាមការទាមទាររបស់អាយ្យការ។ រងបទចោទប្រកាន់ប្រព្រឹត្តអំពើពុករលួយ និងមានទំនាក់ទំនងជាមួយម៉ាហ្វា រហូតធ្វើឲ្យក្រុមហ៊ុនរដ្ឋខាតបង់ប្រាក់ជាង ១៥លានដុល្លារ លោកលី ចែម្ញុងកំពុងប្រឈមនឹងការជំនុំជម្រះនៅតុលាការ ខណៈពេលភរិយារបស់លោក ជាប់ចោទពីបទគៃបន្លំលុយរដ្ឋ។
ទោះបរាជ័យ នៅក្នុងការបោះឆ្នោតប្រធានាធិបតី និងជាប់សំណាញ់តុលាការដោយសាររឿងអាស្រូវពុករលួយ លោកលី ចែម្ញុង នៅតែមានប្រជាប្រិយភាព នៅកូរ៉េខាងត្បូង ដោយមកពីគោលនយោបាយរបស់លោកដែលចង់បង្កើនប្រាក់ចំណូលសកលជាអប្បបរមាសម្រាប់ប្រជាជនកូរ៉េខាងត្បូង។ តាមការស្ទង់មតិចុងក្រោយនៅកូរ៉េខាងត្បូង លោកលី ចែម្ញុងសង្ឃឹមទទួលសំឡេងច្រើន នៅក្នុងការបោះឆ្នោត ប្រធានាធិបតីអាណត្តិក្រោយ នៅឆ្នាំ ២០២៧។ ម្យ៉ាង ដំណើរទស្សនកិច្ចរបស់លោកនៅទីតាំងអនាគតការដ្ឋានសាងសង់ព្រលានយន្តហោះ ពោលគឺមុនត្រូវខ្មាន់កាំបិតចាក់ឲ្យរបួស ធ្វើឡើងនៅក្នុងបរិបទដែលកូរ៉េខាងត្បូងត្រៀមរៀបចំការបោះឆ្នោតសភា នៅខែមេសាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ