និស្សិតឥណ្ឌូណេស៊ីនៅខេត្តអាឆេ ធ្វើបាតុកម្មបណ្តេញជនភៀសខ្លួនរ៉ូហ៊ីងយ៉ា
គ្មានឡើយការអាណិតអាសូរ ក្នុងនាមជាអ្នកកាន់សាសនាអ៊ីស្លាមដូចគ្នា។ ក្រុមនិស្សិតឥណ្ឌូណេស៊ី នៅខេត្តអាឆេ (Aceh) ជាច្រើនរយនាក់ បានធ្វើបាតុកម្ម សំរុកចូលទៅបណ្តេញជនភៀសខ្លួនរ៉ូហ៊ីងយ៉ា ឲ្យចាកចេញពីកន្លែងស្នាក់នៅបណ្តោះអាសន្ន កាលពីថ្ងៃទី២៧ធ្នូ។ ក្នុងទឹកមុខភ័យតក់ស្លុត ជាមួយនឹងសំឡេងស្រែកទ្រហោយំ ជនភៀសខ្លួនរ៉ូហ៊ីងយ៉ា ដែលភាគច្រើនជាស្ត្រីនិងកុមារ ត្រូវបានគេចាប់បញ្ជូនយកទៅទីតាំងអាជ្ញាធរអន្តោប្រវេសន៍ ដើម្បីរងចាំនីតិវិធីបណ្តេញចេញពីខេត្តអាឆេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៤
និស្សិតឥណ្ឌូណេស៊ី នៅខេត្តអាឆេជាច្រើនរយនាក់ បានប្រមូលផ្តុំគ្នា ធ្វើបាតុកម្មបណ្តេញជនភៀសខ្លួនរ៉ូហ៊ីងយ៉ា។ ក្រុមនិស្សិតបានសំរុកចូលទៅក្នុងអគារមួយ ដែលអាជ្ញាធរខេត្តបានអនុញ្ញាតឲ្យជនភៀសខ្លួនរ៉ូហ៊ីងយ៉ា ភាគច្រើនសុទ្ធតែជាស្ត្រីនិងកុមារ ចំនួន១៣៧នាក់ ស្នាក់នៅជាបណ្តោះអាសន្ន។ យោងតាមវីដេអូថតក្នុងហេតុការណ៍នេះផ្ទាល់ គឺឃើញក្រុមនិស្សិតឥណ្ឌូណេស៊ី ស្រែកជេរបណ្តេញ ស្រែកគំរាមយ៉ាងកម្រោលបំផុត។ ក្រុមនិស្សិតខ្លះទៀត បានយកជើងទាត់បង្វិចខោអាវ និងសម្ភារៈរបស់ជនភៀសខ្លូនរ៉ូហ៊ីងយ៉ា ដែលស្រែកទ្រហោរយំ ដោយក្តីភិតភ័យរន្ធត់។
ក្រុមនិស្សិតមកពីសាលាផ្សេងៗគ្នា បានដុតកង់ឡាន និងបានបញ្ជូនរថយន្តកាមីញ៉ុងជាច្រើនគ្រឿង យកមកដឹកជនភៀសខ្លួន។ ផ្អែកតាមអ្នកយកព័ត៌មានបារាំង AFP ដែលនៅទីតាំងផ្ទាល់ ក្រុមនិស្សិតបានវាយប្រវាយប្រតប់ ជាមួយអ្នកក្រុមនគរបាល ហើយនៅទីបំផុត នគរបាលបានសម្រេចធ្វើតាមការទាមទាររបស់ពួកនិស្សិត ដោយបានបញ្ជូនជនជៀសខ្លួនរ៉ូហ៊ីយ៉ាឡើងឡាន យកទៅទុកនៅការិយាល័យអន្តោប្រវេសន៍ ដើម្បីរងចាំនីតិវិធីបណ្តេញចេញ។
ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួន បានចេញលិខិតប្រកាសមួយ ដោយបានថ្លែងការសោកស្តាយនិងបារម្ភបំផុត ចំពោះទង្វើនេះដែលបានបង្កឲ្យជនភៀសខ្លួនរ៉ូហ៊ីងយ៉ា មានការភ័យតក់ស្លុតជាខ្លាំង។ អង្គការUNHCR សូមអំពាវនាវឲ្យអាជ្ញាធរឥណ្ឌូណេស៊ី ត្រូវតែចាត់វិធានការចាំបាច់ជាបន្ទាន់ ដើម្បីការពារសន្តិសុខជនភៀសខ្លួនដែលកំពុងតែស្ថិតនៅក្នុងស្ថានភាពលំបាក តែលតោលអស់សង្ឃឹម។ យោងតាមលិខិតរបស់ UNHCR គឺសកម្មភាពហិង្សារបស់ក្រុមនិស្សិតឥណ្ឌូណេស៊ីនៅខេត្តអាឆេ ជាលទ្ធផលនៃការឃោសនាផ្សព្វផ្សាយព័ត៌មានមិនពិត និងពង្វក់នៅតាមបណ្តាញសង្គម អមដោយពាក្យសំដីលាបពណ៌ ប្រមាថមើលងាយ រើសអើងជាតិសាសន៍ ចោទប្រកាន់ទៅលើជនភៀសខ្លួនរ៉ូហ៊ីងយ៉ា។
សូមបញ្ជាក់ថា ចាប់តាំងពីពាក់កណ្តាលខែវិច្ឆិកាមក មានជនភៀសខ្លួនរ៉ូហ៊ីងយ៉ា យ៉ាងហោច១៥០០នាក់ ដែលបានផ្សងជីវិត ជិះទូកចេញពីជំរំនៅបង់ក្លាដែស ឆ្លងសមុទ្រអង់ដាម៉ាន់ ឆ្ពោះទៅកាន់ខេត្តអាឆេ ភាគខាងលិចឥណ្ឌូណេស៊ី។ វត្តមានរបស់ជនភៀសខ្លួនរ៉ូហ៊ីងយ៉ា បានបង្កឲ្យមានមតិយល់ឃើញខុសគ្នា នៅក្នុងខេត្តអាឆេ ខ្លះអាណិតអាសូរ ក្នុងនាមជាអ្នកកាន់សាសនាអ៊ីស្លាមដូចគ្នា ឯខ្លះទៀតបានប្រឆាំងដាច់ខាត ព្រោះខ្លាចក្រុមជនរ៉ូហ៊ីងយ៉ា មកដណ្តើមការងារនិងធនធានក្នុងខេត្តនេះ ដែលក្រីក្រស្រាប់ទៅហើយ។ និស្សិតម្នាក់ បានអះអាងថា គេប្រឆាំងដាច់ខាត ចំពោះការមកតាំងទីរបស់ជនភៀសខ្លួនរ៉ូហ៊ីងយ៉ា ដែលមកតាមរយៈពួកឈ្មួញទុច្ចរិត រកស៊ីដឹកជញ្ជូនជនភៀសខ្លួន។ ប៉ុន្មានថ្ងៃមកនេះ ប្រជាជនខេត្តអាឆេ បានធ្វើបាតុកម្មជាបន្តបន្ទាប់ ទាមទារឲ្យអាជ្ញាធរបណ្តេញជនភៀសខ្លួនរ៉ូហ៊ីងយ៉ា។
គួរបញ្ជាក់ដែរថា ឥណ្ឌូណេស៊ី មិនមែនជាប្រទេសហត្ថលេខី នៃសន្ធិសញ្ញាអង្គការសហប្រជាជាតិ ស្តីពីជនភៀសខ្លួនឡើយ។ កន្លងមក រដ្ឋាភិបាលឥណ្ឌូណេស៊ី ធ្លាប់បានអះអាងថា គេពុំមានកាតព្វកិច្ចអ្វី ត្រូវទទួលយកជនភៀសខ្លួនរ៉ូហ៊ីងយ៉ានោះទេ។ ទន្ទឹមគ្នានេះ ឥណ្ឌូណេស៊ី បានបរិហាររិះគន់ប្រទេសផ្សេងទៀតក្នុងតំបន់ ថាបានបិទទ្វារខ្ទប់ មិនឲ្យជនភៀសខ្លួនរ៉ូហ៊ីងយ៉ាចូលទៅស្នាក់នៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ