សេអ៊ូលបញ្ជូនយន្តហោះចម្បាំង នៅពេលយន្តហោះយោធាចិន និងរុស្ស៊ីហោះចូលដែនអាកាសកូរ៉េខាងត្បូង
កងទ័ពកូរ៉េខាងត្បូងបានប្រកាស ថា ខ្លួនបានបញ្ជូនយន្តហោះចម្បាំងទៅហោះល្បាត បន្ទាប់ពីយន្តហោះរបស់កងទ័ពចិន និងរុស្ស៊ីចំនួន៦គ្រឿងហោះចូលក្នុងតំបន់ការពារអាកាសរបស់កូរ៉េខាងត្បូង នៅថ្ងៃព្រហស្បតិ៍ទី១៤ធ្នូ។ ជាសម្ព័ន្ធមិត្តដ៏សំខាន់របស់អាមេរិក នៅក្នុងតំបន់ កូរ៉េខាងត្បូងតវ៉ាជាញយដងពីរឿងដែលថា យន្តហោះចម្បាំងចិន និងរុស្ស៊ី ឧស្សាហ៍ហោះចូលទៅក្នុងតំបន់ការពារដែនអាកាសរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:២០
កងទ័ពកូរ៉េខាងត្បូងបានបញ្ជូនភ្លាមភ្លែតយន្តហោះចម្បាំងរបស់ខ្លួនទៅហោះល្បាតនៅក្នុងដែនអាកាស នៅថ្ងៃព្រហស្បតិ៍នេះ ពោលគឺនៅបន្ទាប់ពីសេនាធិការដ្ឋានអន្តរកងទ័ព ចាប់បានសញ្ញាយន្តហោះចម្បាំងរបស់ចិន ២គ្រឿង និងយន្តហោះចម្បាំងរុស្ស៊ី៤គ្រឿងហោះចូលក្នុងតំបន់ការពារដែនអាកាសរបស់កូរ៉េខាងត្បូង។
យោងតាមសេនាធិការដ្ឋានអន្តរកងទ័ព នៅសេអ៊ូល គ្មានការឈ្លានពានដែនអាកាស ព្រោះថា យន្តហោះចម្បាំងរបស់ចិន និងរុស្ស៊ីហោះចូលតំបន់ការពារដែនអាកាសរបស់កូរ៉េខាងត្បូង នៅត្រង់សមុទ្រជប៉ុន តែប្រមាណ ១៧នាទីប៉ុណ្ណោះ មុននឹងហោះចេញទៅវិញ។
នៅថ្ងៃព្រហស្បតិ៍ កងទ័ពកូរ៉េខាងត្បូងចាប់បានសញ្ញាយន្តហោះចម្បាំងរបស់ចិន និងរុស្ស៊ី នៅមុនវាហោះចូលក្នុងតំបន់ការពារដែនអាកាស និងបានបញ្ជូនយន្តហោះចម្បាំងទៅហោះល្បាតនៅទីនោះ ដើម្បីត្រៀមទប់ទល់នឹងហេតុការណ៍ណាមួយ។
គិតចាប់តាំងពីចុងឆ្នាំ ២០២២ នេះជាលើកទី៣ដែលកូរ៉េខាងត្បូងតវ៉ាប្រឆាំង ចិន និងរុស្ស៊ី ដែលបានបញ្ជូនយន្តហោះចម្បាំងរបស់ខ្លួនទៅហោះចូលក្នុងតំបន់ការពារដែនអាកាសរបស់កូរ៉េខាងត្បូង។
នៅខែ មិថុនាកន្លងទៅ សេអ៊ូលបានបញ្ជូនយន្តហោះចម្បាំងដូចគ្នានេះ បន្ទាប់ពីយន្តហោះរបស់កងទ័ពចិន និងរុស្ស៊ីហោះទៅក្បែរតំបន់ការពារដែនអាកាសរបស់កូរ៉េខាងត្បូង នៅក្នុងអំឡុងសមយុទ្ធកងទ័ពជើងអាកាសរបស់ប្រទេសចិន និងរុស្ស៊ី នៅសមុទ្រជប៉ុន ឬសមុទ្រចិនខាងកើត។
វត្តមានយន្តហោះចម្បាំងចិន និងរុស្ស៊ី ហោះចូលតំបន់ការពារដែនអាកាសកូរ៉េខាងត្បូង កើតឡើងនៅមួយសប្តាហ៍ក្រោយដែល កូរ៉េខាងត្បូង ជាមួយសម្ព័ន្ធមិត្តរបស់អាមេរិក និងជប៉ុន ប្រកាសចាប់ដៃគ្នាដើម្បី ធានាស្ថិរភាពនៅច្រកសមុទ្រតៃវ៉ាន់ ដែលនេះមិនមែនជាដំណឹងល្អសម្រាប់ប៉េកាំង។ ជាសម្ព័ន្ធមិត្តរបស់កូរ៉េខាងជើងដែលជាបងប្អូនសត្រូវរបស់កូរ៉េខាងត្បូង ចិនបង្កើនការធ្វើសមយុទ្ធយោធាជាមួយរុស្ស៊ី នៅសមុទ្រ នៅសមុទ្រចិនខាងកើត នៅក្នុងគោលដៅបង្ហាញសាច់ដុំ ឆ្លើយតបសមយុទ្ធរបស់អាមេរិកជាមួយសម្ព័ន្ធមិត្ត នៅតំបន់អាស៊ីប៉ាស៊ីហ្វិក។ ថ្មីៗនេះ កូរ៉េខាងត្បូងក៏បានចេញមុខចោទប្រកាន់រុស្ស៊ីដែរថា បានចូលរួមជួយជំរុញឲ្យកូរ៉េខាងជើង ដែលទើបក្លាយជាមហាអំណាចនុយក្លេអ៊ែរ អាចបាញ់បញ្ជូនដោយជោគជ័យផ្កាយរណបចារកិច្ចយោធាទៅក្នុងគន្លងតារាវិថី កាលពីវិច្ឆិកាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ