បង់ក្លាដែស៖ គណបក្សប្រឆាំង BNP ធ្វើពហិការមិនចូលរួមការបោះឆ្នោត នៅឆ្នាំ២០២៤ខាងមុខនេះ
កាលពីថ្ងៃព្រហស្បតិ៍ទី៣០ វិច្ឆិកា គណបក្សជាតិនិយមបង់ក្លាដេស BNP ដែលជាបក្សប្រឆាំងធំជាងគេនៅក្នុងប្រទេសនេះ បានប្រកាសថានឹងមិនចូលរួមការបោះឆ្នោតសភា ដែលនឹងប្រព្រឹត្តទៅនៅថ្ងៃទី០៧មករាឆ្នាំ២០២៤ ទេ។ គួរបញ្ជាក់ថា បក្សប្រឆាំងនេះទំនងជាគូរប្រជែងតែមួយគត់នឹងបក្សកាន់អំណាចរបស់លោកស្រី Sheikh Hashina ដែលដឹកនាំបង់ក្លាដែសបីអាណត្តិជាប់គ្នា ហើយដែលត្រូវគេវាយតម្លៃថា អាចនឹងឈ្នះឆ្នោតសាជាថ្មីដើម្បីដឹកនាំប្រទេសមួយអាណត្តិបន្ថែមទៀត ពោលគឺនៅអាណត្តិទី៤។
ចុះផ្សាយនៅថ្ងៃ៖
គណបក្ស BNP បានចោទអាជ្ញាធរបង់ក្លាដែស ថាបានចាប់ខ្លួនសមាជិកបក្សរបស់ខ្លួនរាប់ពាន់នាក់ នៅក្នុងក្របខណ្ឌបង្រ្កាបទ្រង់ទ្រាយធំ។ គណបក្សនេះ ក៏មិនដាក់ឯកសារស្នើបេក្ខភាព សម្រាប់ការបោះឆ្នោតខាងមុខនេះដែរ។ លោក Wahiduzzaman អ្នកនាំពាក្យគណបក្ស BNP បានប្រាប់សារព័ត៌មាន AFP ថានៅតែរក្សាជំហររបស់ខ្លួនមិនចូលរួមការបោះឆ្នោតជាមួយ នឹងលោកស្រី Sheikh Hashina។
អង្គការឃ្លាំមើលសិទ្ធិមនុស្ស HRW បានបញ្ជាក់កាលពីថ្ងៃច័ន្ទ ទី២៧វិច្ឆិកា ថាសកម្មជនបក្សប្រឆាំងប្រមាណ ១ម៉ឺននាក់ ត្រូវបានគេចាប់ខ្លួន ហើយយ៉ាងហោចណាស់មនុស្ស១៦នាក់ ក្នុងនោះមានប៉ូលីសពីររូប បានស្លាប់បាត់បង់ជីវិត ចាប់តាំងពីខែតុលាឆ្នាំនេះមក។ យោងតាមអង្គការដដែលនេះ ការចាប់ខ្លួនអ្នកនយោបាយគណបក្សប្រឆាំងជាច្រើនរូប គឺដើម្បីកម្ទេចគណបក្សប្រឆាំង ព្រមទាំងជម្រុះគូរប្រជែងរបស់គណបក្សកាន់អំណាច។ ប៉ុន្តេ បើតាមតួលេខរបស់គណបក្សប្រឆាំងវិញ ការចាប់ខ្លួនមេដឹកនាំនិងសកម្មជនគណបក្សរបស់ខ្លួន គឺមានចំនួនរហូតដល់ ១ ៨០៩០ នាក់។
លោក Shariful Alam អ្នកនាំពាក្យគណកម្មាធិការរៀបចំការបោះឆ្នោត បានថ្លែងថាបញ្ជីឈ្នោះគណបក្សដែលបានដាក់បេក្ខភាពរបស់ខ្លួន នឹងត្រូវបង្ហាញជាសាធារណៈ នៅថ្ងៃព្រហស្បតិ៍ទី០៧ ខែធ្នូ ខាងមុននេះ។
គណបក្ស BNP និងគណបក្សផ្សេងទៀត បានធ្វើបាតុកម្មទាមទារឲ្យលោកស្រីនាយករដ្ឋមន្រ្តី Sheikh Hashina ចុះចេញពីតំណែង និងប្រគល់អំណាចទៅឲ្យរដ្ឋាភិបាលបណ្តោះអាសន្នមួយ ដើម្បីចាត់ចែងរៀបចំការបោះឆ្នោតសភា។
គួររំលឹកថា គណបក្សប្រឆាំងផ្សេងទៀត រួមមានគណបក្ស Jamaat-e-Islami ដែលជាគណបក្សអ៊ីស្លាមនិយមធំជាងគេនៅបង់ក្លាដែស និងគណបក្ស Islami Andolon Bangladesh ក៏ធ្វើពហិការមិនចូលរួមបោះឆ្នោតសភានៅខែមករាឆ្នាំក្រោយនេះដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ