អតីតរដ្ឋមន្ត្រីមហាផ្ទៃនៃរបបសិកភូមា ត្រូវតុលាការផ្តន្ទាទោសជាប់ពន្ធនាគារ៥ឆ្នាំ
អតីតរដ្ឋមន្ត្រីក្រសួងមហាផ្ទៃ និងជាមនុស្សដ៏ស្និទ្ធម្នាក់នឹងមេដឹកនាំរបបសិកភូមា ត្រូវបានតុលាការផ្តន្ទាទោស ឲ្យជាប់ពន្ធនាគារចំនួន៥ឆ្នាំ ពីបទប្រព្រឹត្តិអំពើពុករលួយ។ នេះបើផ្អែកតាមការផ្សាយ របស់បណ្តាញព័ត៌មានផ្លូវការភូមា នៅថ្ងៃសៅរ័ទី១១វិច្ឆិកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
យោងតាមសារព័ត៌មាន Global New Light of Myanmar លោក Soe Htut ត្រូវបានគេដកហូតចេញពីតំណែង ពីសមាជិកក្រុមប្រឹក្សាគ្រប់គ្រងជាតិ កាលពីខែកញ្ញា ដោយសារតែលោក បានក្លាយជាកម្មវត្ថុនៃការស៊ើបអង្កេតមួយ ស្តីអំពីករណីពុករលួយ។ ការដកតំណែង ដោយអនុឡោមតាមច្បាប់ ហើយតុលាការយោធាភូមា បានបើកសវនាការកាត់ទោសលោក ឲ្យជាប់ពន្ធនាគារ៥ឆ្នាំ។
បណ្តាញព័ត៌មានខាងលើបានចុះផ្សាយថា កាលពីពេលធ្វើជារដ្ឋមន្ត្រីក្រសួងមហាផ្ទៃ លោក Soe Htut បានធ្វើបំពាននឹងមុខនាទីការងារខ្លួន ដោយបានបញ្ជាឲ្យមន្ត្រីក្រោមបង្គាប់ ចេញលិខិតឆ្លងដែនជាច្រើនច្បាប់ ទៅឲ្យក្រុមហ៊ុនដែលរកស៊ីក្នុងវិស័យនេះ។ មិនត្រឹមតែប៉ុណ្ណោះ លោកបានទទួលប្រាក់សំណូក ហើយផ្ទុយទៅវិញ បែរជាគ្មានសមត្ថភាព តាមដានត្រួតពិនិត្យសកម្មភាពធ្វើជំនួញរបស់ក្រុមហ៊ុនទាំងនោះ ថាតើវាស្របឬមិនស្រប ទៅនឹងវិធានច្បាប់ហិរញ្ញវត្ថុស្តីពីបុគ្គលិកក្រសួងមហាផ្ទៃ។
គួរកត់សំគាល់ថា ប៉ុន្មានខែមកនេះ របបសិកភូមា ដឹកនាំដោយលោក មីញ អ៊ុងឡាំង បានចាប់ឃាត់ខ្លួនថ្នាក់ដឹកនាំធំៗជាច្រើននាក់។ ការឃាត់ខ្លួន ដែលអាចមានទម្រង់ជាការជម្រុះចោល នូវមនុស្សដែលមិនស្មោះនឹងរបបសិក ស្របពេលដែលកងទ័ពភូមា កំពុងតែរងការលំបាកខ្លាំងឡើង ទប់ទល់នឹងការវាយប្រយុទ្ធរបស់កងកម្លាំងបះបោរ សឹងតែលែងជាប់។
គួរបញ្ជាក់ថា ប៉ុន្មានថ្ងៃមកនេះ ភូមាហាក់កំពុងឈានជើងចូលទៅក្នុងសង្គ្រាមស៊ីវីល កាន់តែខ្លាំងឡើង ដោយកងកម្លាំងបះបោរជនជាតិភាគតិចជាច្រើនក្រុមនៅភាគខាងជើង បានបើកការវាយប្រហារ និងបានកាត់ផ្តាច់ផ្លូវចរាចរណ៍សំខាន់ៗ រវាងភូមានិងចិន។ ការកាត់ផ្តាច់ចរាចរណ៍ដឹកទំនិញនេះ បានធ្វើឲ្យទំនិញឡើងថ្លៃ មិនថាអង្ករ បន្លែផ្លែឈើ។ ច្រកព្រំដែនមួយចំនួនរវាងភូមា និងខេត្តយូណានរបស់ចិន ត្រូវបិទទ្វារទាំងស្រុង ដោយសារតែបាញ់ប្លោងគ្រាប់។ កងទ័ពភូមាបានទទួលស្គាល់ថា ខ្លួនបានបាត់បង់ការគ្រប់គ្រងទីក្រុង Chinshwehaw ដែលជាច្រកព្រំដែនដ៏សំខាន់បំផុតមួយជាមួយខេត្តយូណាន។
យោងតាមលោក Richard Horsey អ្នកវិភាគម្នាក់នៅអង្គការ International Crisis Group ប្រសិនបើផ្លូវចរាចរណ៍ទំនិញរវាងភូមានិងចិន ត្រូវបិទរាំងខ្ទប់យូរខែទៀត នោះវានឹងបង្កការលំបាកខ្លាំង ដល់របបសិកភូមា។ បញ្ហានេះ នឹងវាយបំបាក់ជញ្ជីងពាណិជ្ជកម្មភូមា ធ្វើឲ្យរបបសិកភូមាគ្មានប្រាក់ចំណូល ដើម្បីចំណាយធ្វើសង្គ្រាមជាមួយកងកម្លាំងបះបោរជនជាតិភាគតិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ