បង់ក្លាដែស៖កៅអីនាយករដ្ឋមន្រ្តីរបស់លោកស្រីឆេក ហាស៊ីណាផ្តើមរង្គើ?
នៅក្នុងប្រទេសបង់ក្លាដែស មានមនុស្សជាង ១០០ ០០០នាក់បានជួបជុំគ្នាធ្វើបាតុកម្មទាមទារឲ្យនាយករដ្ឋមន្រ្តីលោកស្រីឆេក ហាស៊ីណាចុះចេញពីតំណែង។ បាតុករទាំងជាង ១០០ ០០០នាក់ជាសកម្មជនរបស់គណបក្សប្រឆាំងសំខាន់ចំនួនពីរគឺគណបក្សជាតិនិយមបង់ក្លាដែស BNP និងគណបក្សហ្សាម៉ាត អ៊ី អ៊ីស្លាមីដែលជាគណបក្សអ៊ីស្លាមធំជាងគេនៅបង់ក្លាដែស។ រដ្ឋអំណាចបានដាក់ពង្រាយកម្លាំងប៉ូលិសយ៉ាងតិច ១០ ០០០នាក់។
ចុះផ្សាយនៅថ្ងៃ៖
ស្តាប់ - ០២:៣៥
ការជួបជុំរួមគ្នារវាងសកម្មជននៃគណបក្សជាតិនិយមបង់ក្លាដែស BNP និងគណបក្សហ្សាម៉ាត អ៊ី អ៊ីស្លាមីពេលនេះមានទ្រង់ទ្រាយធំខ្លាំងគិតតាំងពីដើមឆ្នាំ ២០២៣។ មួយវិញទៀត ការបន្តជួបជុំរបស់ក្រុមសកម្មជនបក្សប្រឆាំងពេលនេះបានធ្វើឡើង ៣ខែមុនការរៀបចំបោះឆ្នោតសភាដែលគ្រោងធ្វើនៅដំណាច់ខែមករា ឆ្នាំ ២០២៤ ខាងមុខ។ ក្រុមបាតុករបានបន្តទាមទារឲ្យនាយករដ្ឋមន្រ្តីលោកស្រីឆេក ហាស៊ីណាចុះចេញពីតំណែង។ មានអាយុ ៧៦ឆ្នាំ និងជាកូនស្រីរបស់ប្រធានាធិបតីទី១ របស់ប្រទេស លោកស្រីឆេក ហាស៊ីណាបានឡើងកាន់តំណែងនាយករដ្ឋមន្រ្តីតាំងពី ១៥ឆ្នាំ និងបានដឹកនាំប្រទេសទទួលបានកំណើនសេដ្ឋកិច្ចយ៉ាងឆាប់រហ័សគួរឲ្យកត់សម្គាល់។
ស្នាដៃមួយនេះរបស់លោកស្រីបានទទួលស្គាល់ដោយពលរដ្ឋបង់ក្លាដែសទូទៅ។ តែរដ្ឋាភិបាលរបស់លោកស្រី និងរូបលោកស្រីផ្ទាល់បានជាប់ចោទពីបទអំពើពុករលួយ និងការរំលោភសិទ្ធិមនុស្ស។ គឺកំហុសឆ្គងនេះហើយដែលគណបក្សជាតិនិយមបង់ក្លាដែស BNP បានរៀបចំបាតុកម្មតាំងពីច្រើនខែដើម្បីទាមទារឲ្យលោកស្រីចុះចេញពីតំណែង និងទុកឲ្យរដ្ឋាភិបាលអព្យាក្រឹត្យមួយដើម្បីរៀបចំ និងចាត់ចែងការបោះឆ្នោតខាងមុខ។ កំណត់សម្គាល់មួយទៀត ការបន្តរៀបចំបាតុកម្មរបស់គណបក្ស BNP បានធ្វើឡើង ខណៈប្រធានបក្សលោកស្រី ខាលីដា ហ្សីយ៉ាកំពុងជាប់ឃុំក្នុងផ្ទះក្រោយពីលោកស្រីត្រូវបានកាត់ទោសក្នុងបទពុករលួយ។
មានអាយុ ៧៨ឆ្នាំ និងកំពុងមានជំងឺ លោកស្រី ខាលីដា ហ្សីយ៉ាដែលធ្លាប់កាន់តំណែងនាយករដ្ឋមន្រ្តីចំនួនពីរអាណត្តិជាសត្រូវចាស់របស់លោកស្រីឆេក ហាស៊ីណា។ សម្រាប់ក្រុមសកម្មជនរបស់គណបក្ស BNP លោកស្រីឆេក ហាស៊ីណាជាចោរលួចសន្លឹកឆ្នោត និងបានទាមទារឲ្យដោះលែងលោកស្រី ខាលីដា ហ្សីយ៉ាជាបន្ទាន់។ ការប៉ះទង្គិចគ្នាបានកើតឡើងរវាងបាតុករ និងប៉ូលិសដោយប៉ូលិសបានបាញ់ឧស្ម័នបង្ហូរទឹកភ្នែក និងគ្រាប់កំាភ្លើងជ័របំបែកហ្វូងបាតុករ។ តាមអ្នកនាំពាក្យគណបក្ស BNP មានមនុស្សជាងកន្លះលាននាក់បានចូលរួមនៅក្នុងបាតុកម្ម និងមានសកម្មជនយ៉ាងតិច ២ ៩០០នាក់ត្រូវបានចាប់ខ្លួនក្នុងសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ