ប្រធានាធិបតីឥណ្ឌូណេស៊ី ប្រកាសរឹតបន្តឹងពាណិជ្ជកម្មតាមបណ្តាញសង្គម
ដើម្បីកុំឱ្យបណ្តាញសង្គមក្លាយជាកន្លែងធ្វើពាណិជ្ជកម្មអនឡាញ លោក ចូកូ វីដូដូ ប្រធានាធិបតីឥណ្ឌូណេស៊ី បានប្រកាសនៅថ្ងៃចន្ទទី ២៥កញ្ញា២០២៣ ថា វិធានគ្រប់គ្រងការរកស៊ីតាមបណ្តាញសង្គម នឹងត្រូវប្រកាសឱ្យដឹងនៅក្នុងសប្តាហ៍នេះតែម្តង។
ចុះផ្សាយនៅថ្ងៃ៖
ស្តាប់ - ០២:២១
ឥណ្ឌូណេស៊ីទើបបានសម្រេចចិត្ត នៅក្នុងជំនួបប្រជុំស្តីពីការប្រើបណ្តាញសង្គមសម្រាប់ធ្វើពាណិជ្ជកម្មអនឡាញ ដាក់ប្រើប្រាស់ច្បាប់ឃុំគ្រងការធ្វើពាណិជ្ជកម្មនៅលើបណ្តាញសង្គម ប្រហែលចាប់ពីថ្ងៃស្អែក(ថ្ងៃអង្គារទី ២៦កញ្ញា)ទៅតែម្តង។ នេះបើតាមសារវីដេអូរបស់លោកប្រធានាធិបតីឥណ្ឌូណេស៊ី លោក ចូកូ វីដូដូ ដោយមិនដៅចំឈ្មោះថាជាបណ្តាញសង្គមមួយណាទេ។ ច្បាប់ថ្មីដែលជាការធ្វើវិសោធនកម្មច្បាប់ឆ្នាំ២០២០ អាចមានសុពលភាពភ្លាម ក្រោយពីប្រធានាធិបតីចុះហត្ថលេខា និងមិនចាំបាច់ឆ្លងកាត់ការអនុម័តពីសភាឡើយ។
បើតាមប្រសាសន៍របស់រដ្ឋមន្ត្រីក្រសួងពាណិជ្ជកម្មក្រោយជំនួបប្រជុំជាមួយប្រធានាធិបតីរួច ពាណិជ្ជកម្មលើបណ្តាញសង្គមមានសិទ្ធិត្រឹមសម្រួលការឃោសនាបញ្ចុះតម្លៃពិសេសឬសម្រួលសេវា ប៉ុន្តែមិនមែនជាកន្លែងទិញដូរទូទាត់ទំនិញដោយផ្ទាល់បានឡើយ។ បណ្តាញសង្គម និងពាណិជ្ជកម្មអនឡាញ ត្រូវតែចែកឱ្យដាច់ពីគ្នា។
សេចក្តីសម្រេចនេះ ធ្វើឡើង ក្រោយពីមានសម្រែកអំពាវនាវរបស់អ្នកទទួលខុសត្រូវក្នុងរដ្ឋាភិបាលឥណ្ឌូណេស៊ីជាច្រើនរូប សុំឱ្យមានការបែងចែកឱ្យដាច់ពីគ្នារវាងសកម្មភាពរបស់បណ្តាញសង្គមនិងពាណិជ្ជកម្មអនឡាញ ព្រោះយល់ថាការដោះដូរទិញលក់តាមបណ្តាញសង្គមធំៗដូចយ៉ាងTiktok កំពុងគំរាមកំហែងពាណិជ្ជកម្មនិងការរកស៊ីតូចតាចក្នុងមូលដ្ឋានខ្លាំងណាស់។ ពាណិជ្ជករនិងអតិថិជនសុទ្ធតែខាតប្រយោជន៍ដូចគ្នា បើគ្មានការបែងចែកបណ្តាញសង្គមឱ្យដាច់ពីការធ្វើពាណិជ្ជកម្មតាមអនឡាញទេ។
ពលរដ្ឋឥណ្ឌូណេស៊ី និយមប្រើប្រាស់បណ្តាញសង្គមTiktok របស់ក្រុមហ៊ុនចិនណាស់ និង ជាអ្នកប្រើប្រាស់Tiktok ចម្បងគេនៅក្នុងតំបន់។ បើតាមក្រុមហ៊ុនTiktok ឥណ្ឌូណេស៊ីជាទីផ្សារធំសំខាន់ទីពីររបស់ខ្លួន ជាមួយអ្នកប្រើប្រាស់ចំនួនជាង១២៥លាននាក់។ Tiktok មិនធ្វើពាណិជ្ជកម្មតែម្នាក់ឯងនៅឥណ្ឌូណេស៊ីទេ ក្រុមហ៊ុនអាមេរិកMeta ក៏មានសេវាពាណិជ្ជកម្មអនឡាញនៅឥណ្ឌូណេស៊ីដែរ តាមរយៈបណ្តាញFacebookនិង Instagram។
អគ្គនាយកក្រុមហ៊ុនByteDance ឈ្មោះក្រុមហ៊ុនរបស់Tiktok បានប្រកាសកាលពីខែមិថុនា ពេលមកបំពេញទស្សនកិច្ចនៅក្រុងហ្សាការតា ថាក្រុមហ៊ុនគ្រោងចំណាយវិនិយោគរាប់ពាន់លានដុល្លារនៅអាស៊ីអាគ្នេយ៍ ដែលមានអ្នកប្រើប្រាស់ Tiktok សរុប៣២៥លាននាក់។ Tiktok ធ្លាប់បានអំពាវនាវឱ្យឥណ្ឌូណេស៊ីផ្តល់សមភាពដល់ក្រុមហ៊ុន តែគ្មានប្រតិកម្មអ្វីតបនឹងច្បាប់ថ្មីរបស់ឥណ្ឌូណេស៊ីទេ សម្រាប់ពេលភ្លាមៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ