អវកាស៖ បន្ទាប់ពីព្រះចន្ទ ឥណ្ឌាបង្ហោះយានទៅសង្កេតព្រះអាទិត្យ
ឥណ្ឌាបានបោះជើងមួយជំហានថ្មីទៀតដ៏សំខាន់ក្នុងវិស័យអវកាស។ ១០ថ្ងៃក្រោយពីបានបង្ហោះដោយជោគជ័យនូវយានគ្មានមនុស្សទៅកាន់ប៉ូលខាងត្បូងរបស់ព្រះចន្ទ នៅថ្ងៃសៅរ៍ទី២កញ្ញានេះ ឥណ្ឌាបានបង្ហោះយានទៅសិក្សាប្រព័ន្ធព្រះអាទិត្យម្តង។ “Adithya-L1” ត្រូវធ្វើដំណើររយៈពេលបួនខែទើបទៅដល់ទិសដៅ គឺភពអាទិត្យ។
ចុះផ្សាយនៅថ្ងៃ៖
ស្តាប់ - ០២:៤៩
បន្ទាប់ពីទទួលបានជោគជ័យក្នុងការបង្ហោះយានទៅព្រះចន្ទ នៅថ្ងៃសៅរ៍ទី ២កញ្ញា២០២៣នេះ ឥណ្ឌាបានបង្ហោះកាំជ្រួចមួយទៀត មានពាំឧបករណ៍វិទ្យាសាស្ត្រសម្រាប់ទៅសិក្សាស្រទាប់ខាងក្រៅនៃភពអាទិត្យ។ បង្ហោះចេញពីផែនដីនៅវេលាម៉ោង១១និង៥០នាទីម៉ោងនៅក្នុងស្រុក ផ្កាយរណបដែលគេប្រសិទ្ធិនាមថា “Aditya-L1” ត្រូវធ្វើដំណើរ៤ខែទើបទៅដល់ទិសដៅ ដែលមានចម្ងាយ១,៥លានKm។
“ជាបេសកកម្មប្រកបដោយមហិច្ឆតារបស់ឥណ្ឌា” នេះជាប្រសាសន៍របស់លោក សូម៉ាក រៃចូឌុរី Somak Raychaudhury តារាវិទូរូបវិទ្យា ដោយពន្យល់លម្អិតថា ផ្កាយរណបAdithya-L1នឹងទៅសិក្សាអំពីបាតុភូតដែលបង្កើតជាភ្លើងនិងថាមពលម៉ាញ៉េទិក ដ៏ខ្លាំងក្លា នៅក្នុងបរិយាកាសនៃភពអាទិត្យតែជះដល់ភពផែនដី និងអាចរំខានដល់ដំណើរការរបស់ផ្កាយរណប។ ឧបករណ៍ “Adithya-L1” នឹងជួយព្យាករបាតុភូតនោះ និងដាស់ពញ្ញាក់ប្រាប់គ្រប់គ្នាជាមុន។ នេះបើតាមការពន្យល់របស់អ្នកវិទ្យាសាស្ត្រឥណ្ឌាដដែល។
ណាសា និងភ្នាក់ងារអវកាសអឺរ៉ុបធ្លាប់បានបង្ហោះយានទៅដាក់ក្នុងគន្លងតារាវិថីរបស់ភពអាទិត្យ ដើម្បីសិក្សាព្រះអាទិត្យ តាំងពីឆ្នាំ១៩៦០ ប៉ុន្តែនេះបេសកកម្មលើកទីមួយបង្អស់សម្រាប់ប្រទេសឥណ្ឌា។ ប្រសិនបើបេសកកម្មរបស់“Adithya”បានទទួលជោគជ័យ នោះឥណ្ឌានឹងក្លាយជាប្រទេសដំបូងគេប្រចាំតំបន់អាស៊ីដែលអាចយកផ្កាយរណបទៅដាក់ក្នុងគន្លងតារាវិថីភពអាទិត្យ។ ចិននិងជប៉ុន ក៏មានបេសកកម្មសង្កេតព្រះអាទិត្យដែរ តែជាផ្កាយរណបអង្កេតពីគន្លងតារាវិថីនៃភពផែនដី។
ជាងនេះទៅទៀត បើតាមអ្នកជំនាញ ឥណ្ឌាមានសមត្ថភាពអវកាសផ្ទាល់របស់ខ្លួនហើយ ក្នុងតម្លៃដ៏ទាបទៀត។ កាំជ្រួចដែលពាំផ្កាយរណបAdithya-L1 មានទម្ងន់៣២០តោន ផលិតដោយអង្គការអ្នកស្រាវជ្រាវវិទ្យាសាស្ត្រអវកាសឥណ្ឌាផ្ទាល់ ដែលមានវិស្វករជំនាញមានសមត្ថភាពខ្ពស់និងទទួលប្រាក់ខែទាបជាងអវកាសយានិកបរទេស។ អង្គការជាសរសរទ្រូងនៃកម្មវិធីអវកាសឥណ្ឌា ដែលបានបង្ហោះដោយជោគជ័យយានអវកាសទៅកាន់ឋានព្រះចន្ទនិងភពអង្គារ។ ការបង្ហោះយានគ្មានមនុស្សទៅព្រះចន្ទដែលពីមុនមានតែរុស្ស៊ី សហរដ្ឋអាមេរិក និងចិនធ្វើបាន ចំណាយថវិកាមិនដល់៧៥លានដុល្លារផង។
កាលពីឆ្នាំ២០១៤ ឥណ្ឌាជាប្រជាជាតិអាស៊ីដំបូងគេបង្អស់ដែលសម្រេចបញ្ជូនផ្កាយរណបទៅភពអង្គារ។ ឥណ្ឌាគ្រោងបញ្ជូនបេសកកម្មយានមានមនុស្សជិះ ហោះបីថ្ងៃជុំវិញផែនដី នៅឆ្នាំក្រោយ។ បេសកកម្មរួមជាមួយជប៉ុន ក្នុងការបញ្ជូនឧបករណ៍សិក្សាទៅឋានព្រះចន្ទ គ្រោងធ្វើនៅឆ្នាំ២០២៥ ឬទៅភពវេណុស្សនៅរវាងពីរឆ្នាំទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ