កូរ៉េខាងជើងបាញ់បង្ហោះ “មីស៊ីលបណ្តែតយុទ្ធសាស្ត្រ” មុនពេលអាមេរិកនិងកូរ៉េខាងត្បូងធ្វើសមយុទ្ធយោធា
មេដឹកនាំរបបផ្តាច់ការកូរ៉េខាងជើង គីម ជុងអ៊ុន បានទៅត្រួតពិនិត្យមើល កងពលទាហានជើងទឹក ព្រមទាំងបានមើលការបាញ់បង្ហោះសាកល្បង នូវ “មីស៊ីលបណ្តែតយុទ្ធសាស្ត្រ” ដ៏ទំនើបចុងក្រោយបង្អស់។ នេះបើផ្អែកតាមចុះផ្សាយ របស់បណ្តាញព័ត៌មានផ្លូវការកូរ៉េខាងជើង KCNA នៅថ្ងៃចន្ទទី២១សីហា។ ជាការបាញ់សាកល្បងមីស៊ីលរបស់កូរ៉េខាងជើង មុនពេលដែលកងទ័ពកូរ៉េខាងត្បូង និងកងទ័ពអាមេរិក ចាប់ផ្តើមបើកសមយុទ្ធយោធាដ៏ធំប្រចាំឆ្នាំ។
ចុះផ្សាយនៅថ្ងៃ៖
ស្តាប់ - ០៣:២២
ដោយមិនបញ្ជាក់ កាលបរិច្ឆេទឲ្យច្បាស់ ទីភ្នាក់ងារព័ត៌មានកូរ៉េខាងជើង បានផ្សាយថា លោកប្រមុខដឹកនាំ គីម ជុងអ៊ុន បានចុះទៅពិនិត្យមើលកងទ័ព នៅលើនាវាចម្បាំងក្នុងសមុទ្រខាងកើត ព្រមទាំងបានមើលការរៀបចំបាញ់សាកល្បងមីស៊ីលបណ្តែតយុទ្ធសាស្ត្រជាច្រើនគ្រាប់។ ការបាញ់សាកល្បង ដែលទីភ្នាក់ងារនេះអះអាងថា បានជោគជ័យយ៉ាងត្រចះត្រចង់ ដោយបានបាញ់ចំគោលដៅគ្រោងទុក មិនឲ្យខុសសូម្បីបន្តិចណាឡើយ។
ដោយឡែក យោងតាមភាគីកូរ៉េខាងត្បូង គឺកូរ៉េខាងជើងបំផ្លើសព័ត៌មានបន្តិចហើយ ព្រោះការពិតជាក់ស្តែង គឺ វាមិនអស្ចារ្យនិងជោគជ័យ ដូចអ្វីដែលទីភ្នាក់ងារព័ត៌មានកូរ៉េខាងជើងអួតនោះទេ។ លោកអគ្គបញ្ជការអន្តរកងទ័ពកូរ៉េខាងត្បូង បានអះអាងថា កងទ័ពកូរ៉េខាងត្បូងនិងអាមេរិក បានតាមដានប្រមូលទិន្នន័យយ៉ាងម៉ដ្ឋចត់បំផុត ស្តីអំពីសកម្មភាពបាញ់សាកល្បងសព្វាវុធ របស់កូរ៉េខាងជើង។ លោកអគ្គបញ្ជការកូរ៉េខាងត្បូងដដែល បានអះអាងថា កងទ័ពអាមេរិកនិងកូរ៉េខាងត្បូង នឹងបន្តរក្សាគោលជំហរ ត្រៀម ប្រុងប្រយ័ត្ន ហាត់សម យ៉ាងម៉ដ្ឋចត់បំផុត ដើម្បីឆ្លើយតបចំពោះការគំរាមកំញើញពីសំណាក់ របបផ្តាច់ការព្យុងយ៉ាង។
សូមបញ្ជាក់ថា ការប្រកាសរបស់កូរ៉េខាងជើង ថាបានបាញ់មីស៊ីលបណ្តែតយុទ្ធសាស្ត្រ បានជោគជ័យនេះ គឺចំពេលដែលកងទ័ពអាមេរិកនិងកូរ៉េខាងត្បូងចាប់ផ្តើមបើកការធ្វើសមយុទ្ធយោធាប្រចាំឆ្នាំ ឈ្មោះ Ulchi Freedom Shield ពីពេលនេះរហូតដល់ថ្ងៃទី៣១សីហា។ សម្រាប់កូរ៉េខាងជើង សមយុទ្ធនេះគឺគ្មានអ្វីក្រៅតែពីការត្រៀមហាត់សមចូលឈ្លានពានកូរ៉េខាងជើងប៉ុណ្ណោះទេ ហើយដែលតម្រូវឲ្យខ្លួនត្រូវតែគំរាមតបវិញ។ យ៉ាងណាមិញ នរគបាលកូរ៉េខាងត្បូងបានឲ្យដឹងថា ប៉ុន្មានថ្ងៃមកនេះ កូរ៉េខាងជើងបានបើកការវាយប្រហារតាមប្រព័ន្ធបច្ចេកវិទ្យាអ៊ីនធ័រនិត មកលើក្រុមហ៊ុនកូរ៉េខាងត្បូងដែលចូលរួម នៅក្នុងមជ្ឈមណ្ឌលហាត់សមធ្វើសង្គ្រាម។
គួរកត់សំគាល់ដែរថា ការគំរាមជាថ្មីរបស់ព្យុងយ៉ានេះ គឺធ្វើឡើង៣ថ្ងៃ បន្ទាប់ពីលោកចូ បៃដិន បានជួបលោកប្រធានាធិបតីកូរ៉េខាងត្បូងនិងលោកនាយករដ្ឋមន្ត្រីជប៉ុន នៅក្នុងជំនួបកំពូលត្រីភាគីជាប្រវត្តិសាស្ត្រ។ ជាជំនួបដ៏កម្រ ដែលភាគីទាំង៣ អះអាងថានឹងរួមកម្លាំងសហការគ្នាក្នុងវិស័យសន្តិសុខ ការពារជាតិ តាមរយៈការបែងចែកទិន្នន័យគ្នា ការធ្វើសមយុទ្ធយោធារួមគ្នាជាប្រចាំ និងបើកបណ្តាញទាក់ទងគ្នាដោយផ្ទាល់ ក្នុងករណីមានវិបត្តិ។
លោក Leif Eric Easley សាស្ត្រាចារ្យនៅ សកលវិទ្យាល័យEwha ក្រុងសេអ៊ូល បានលើកឡើងថា ការរួមកម្លាំងគ្នាកាន់តែស្អិតរមួត រវាងអាមេរិក កូរ៉េខាងត្បូង និងជប៉ុន វាអាចជះឥទ្ធិពលល្អ ជំរុញការចរចាការទូត ព្រោះវានឹងបង្ខំឲ្យចិនគ្មានជម្រើសផ្សេង ក្រៅពីដាក់សំពាធលើកូរ៉េខាងជើង ឲ្យបើកផ្លូវចរចា។ តែយ៉ាងណា សម្រាប់ពេលនេះ កូរ៉េខាងជើងនឹងបន្តគម្រាមកំញើញសិន តាមរយៈការបាញ់សាកល្បងមីស៊ីលជាបន្តបន្ទាប់ ដើម្បីទារថ្លៃខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ