អូស្ត្រាលីគ្មានសង្ឃឹមរកឃើញអ្នករួចពីស្លាប់ក្នុងគ្រោះធ្លាក់ឧទ្ធម្ភាគចក្រយោធា
អាជ្ញាធរអូស្ត្រាលី បានប្រកាសនៅថ្ងៃចន្ទទី ៣១កក្កដា២០២៣នេះ ថាលែងមានសង្ឃឹមនឹងអាចរកឃើញអ្នករួចពីស្លាប់ក្នុងគ្រោះធ្លាក់ឧទ្ទម្ភាគចក្រ ដែលកើតឡើងនៅយប់ថ្ងៃសុក្រឆ្លងចូលថ្ងៃសៅរ៍ហើយ។ ឧទ្ធម្ភាគចក្រយោធានោះមានផ្ទុកទាហានបួននាក់ និងបានជួបគ្រោះថ្នាក់ធ្លាក់នៅពេលកំពុងធ្វើសមយុទ្ធដ៏ធំជាមួយសហរដ្ឋអាមេរិក ជប៉ុន បារាំង អាល្លឺម៉ង់និងកូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០១:៥៩
ការរកឃើញបំណែកឧទ្ធម្ភាគចក្រ បានមកលុបបំបាត់ក្តីសង្ឃឹមដែលថានឹងអាចរកឃើញទាហាននៅមានជីវិត។ ប៉ុន្តែដោយហេតុតែជាគ្រោះថ្នាក់ដ៏ធំ យើងសូមបង្វែរប្រតិបត្តិការសង្គ្រោះទៅជាប្រតិបត្តិការប្រមូលបំណែកវិញ។ នេះជាប្រសាសន៍របស់លោករដ្ឋមន្ត្រីការពារជាតិអូស្ត្រាលី លោក Richard Marles។ លោករដ្ឋមន្ត្រីបានអះអាងបន្ថែមទៀតថា កងពលទ័ពអាកាសដែលមានឧទ្ធម្ភាគចក្រជាង៤០គ្រឿង និងដែលត្រូវធ្វើកំណែទម្រង់នៅចុងឆ្នាំ២០២៤ មិនចេញហោះហើរ មិនប្តូរផ្លាស់ ឬបញ្ចេញសកម្មភាពអ្វីលើសនេះទេ ដរាបណាក្រុមអ្នកអង្កេតមិនទាន់រកឃើញមូលហេតុនៃគ្រោះថ្នាក់ធ្លាក់ឧទ្ធម្ភាគចក្រនោះ។
ឧទ្ធម្ភាគចក្រ ប្រភេទTaipan MRH-90 ផលិតដោយក្រុមហ៊ុនអឺរ៉ុប បានធ្លាក់ពេលកំពុងធ្វើសមយុទ្ធTalisman Sabre ជាមួយកងទ័ពសម្ព័ន្ធមិត្តអាមេរិក ជប៉ុន បារាំង អាល្លឺម៉ង់ និងកូរ៉េខាងត្បូង។ ជាសមយុទ្ធទ្រង់ទ្រាយធំ ដែលមានកងពលយោធាជើងគោក កងប្រតិបត្តិការអាកាស និងកងពលនាវាមុជទឹកចូលរួមសរុបប្រមាណបីម៉ឺននាក់។ តាមគម្រោង សមយុទ្ធក្នុងកម្មវត្ថុបង្អួតកម្លាំងយោធារបស់ក្រុមសម្ព័ន្ធមិត្តលោកខាងលិច មានរយៈពេលពីរសប្តាហ៍ ពោលគឺនៅថ្ងៃទី៤សីហា ប៉ុន្តែគ្រោះធ្លាក់ឧទ្ធម្ភាគចក្រ បានមកព្យួរផ្អាកសមយុទ្ធភ្លាមមួយរំពេច។
អ្នកទទួលខុសត្រូវអូស្ត្រាលីធ្លាប់បានរអ៊ូ ជាច្រើនលើកច្រើនសាមកហើយអំពីការបញ្ឈប់ ការហោះហើរឧទ្ធម្ភាគចក្រTaipanដើម្បីជួសជុលនិងប្តូរគ្រឿងបន្លាស់។ ជាក់ស្តែងកាលពីដើមឆ្នាំ កងឧទ្ធម្ភាគចក្រត្រូវសំចតយានយន្តរបស់ខ្លួនចោលរយៈពេលមួយខែក្រោយពីមានឧទ្ធម្ភាគចក្រមួយគ្រឿងខូចម៉ាស៊ីន។
មុនគ្រោះថ្នាក់បន្តិច អូស្ត្រាលីបានប្រកាសចេតនាចង់បំពាក់ឧទ្ធម្ភាគចក្រថ្មី ប្រភេទBlack Hawks របស់អាមេរិក ជំនួសឧទ្ធម្ភាគចក្រTaipanដែលចាស់ខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ