ម៉ាឡេស៊ីផ្តល់សន្ទុះឡើងវិញដល់គម្រោងសង់ផ្លូវរថភ្លើងល្បឿនលឿនភ្ជាប់ទៅសិង្ហបុរី
បន្ទាប់ពីផ្អាកអស់ពេលជាងពីរឆ្នាំ ដោយហេតុតែមានចំណុចខ្ទាស់គ្នាច្រើន គម្រោងផ្លូវដែកល្បឿនលឿន ម៉ាឡេស៊ី-សិង្ហបុរី ចាប់បន្តដំណើរការទៅមុខទៀត។ នៅសប្តាហ៍នេះ រដ្ឋាភិបាលម៉ាឡេស៊ី បានប្រកូកប្រកាសហៅក្រុមហ៊ុនឯកជនឱ្យមកដេញថ្លៃ គម្រោងវិនិយោគការសាងសង់ផ្លូវរថភ្លើងល្បឿនលឿន តភ្ជាប់ពីក្រុងកូឡាឡាំពួរ ទៅសិង្ហបុរី។
ចុះផ្សាយនៅថ្ងៃ៖
ស្តាប់ - ០១:៥២
ក្តីសង្ឃឹមរបស់ប្រជាពលរដ្ឋម៉ាឡេស៊ី ចង់មានរថភ្លើងល្បឿនលឿនមួយខ្សែដំបូងតភ្ជាប់ទៅប្រទេសសិង្ហបុរី អាចលេចជារូបរាងពិតនៅថ្ងៃណាមួយឬទេ ? គម្រោងផ្លូវដែកល្បឿនលឿន តភ្ជាប់រដ្ឋធានីនៃប្រទេសទាំងពីរ ត្រូវបានផ្អាកអស់រយៈពេលពីរឆ្នាំហើយ ដោយម៉ាឡេស៊ី បានផ្តល់សំណងជំងឺចិត្តជាប្រាក់១០២លានដុល្លារដល់សិង្ហបុរីដែលបានចំណាយពេលសិក្សាគម្រោងនេះផង។ បើតាមក្រសួងដឹកជញ្ជូន រដ្ឋាភិបាលម៉ាឡេស៊ី ត្រូវការពិចារណារកមធ្យោបាយនិងយន្តការហិរញ្ញប្បទានថ្មី ដែលទំនងជាយន្តការរដ្ឋសហការជាមួយដៃគូជាក្រុមហ៊ុនឯកជន។
កាលពីខែមីនា រដ្ឋាភិបាលបានជួបពិភាក្សាជាមួយក្រុមហ៊ុនឯកជនជាច្រើនដើម្បីវាយតម្លៃគម្រោងសាងសង់ផ្លូវរថភ្លើងល្បឿនលឿន ដែលមានឈ្មោះថា “HSR” តម្លៃ១៧ពាន់លានដុល្លារអាមេរិក។ ក្រុមហ៊ុនទាំងនោះគឺ MMC Corporation, Berjaya Group ou encore Malaysian Resources Corporation។
នៅសប្តាហ៍នេះ រដ្ឋាភិបាលម៉ាឡេស៊ីបានប្រកាសជាផ្លូវការបើកចំហឱ្យក្រុមហ៊ុនក្នុងស្រុកនិងក្រុមហ៊ុនអន្តរជាតិចូលដេញថ្លៃ ដើម្បីវាយតម្លៃអំពីសមត្ថភាពឧស្សាហកម្មនៃការវិនិយោគលើគម្រោងដ៏ធំមួយនេះទាំងស្រុង។ ចំណែកខាងសិង្ហបុរីវិញ ក្រសួងដឹកជញ្ជូនប្រកាសរក្សាទ្វារបើកចំហទទួលគ្រប់សំណើថ្មី ទាក់ទងនឹងគម្រោងHSR មកពីខាងម៉ាឡេស៊ីជានិច្ច។
សូមបញ្ជាក់ថា ចម្ងាយផ្លូវតភ្ជាប់ពីក្រុងកូឡាឡាំពួរ ទៅសិង្ហបុរី មានប្រវែងជិត៣៥០គីឡូម៉ែត្រ។ បច្ចុប្បន្ននេះ មធ្យោបាយធ្វើដំណើរដែលលឿនបំផុត គឺជិះយន្តហោះ ឬជិះរថយន្ត។ ឯផ្លូវដែកក៏មានដែរ តែជាមរតកសល់ពីសម័យអាណានិគមអង់គ្លេស និងត្រូវចុះប្តូរផ្លាស់រថភ្លើងជាច្រើនដំណាក់ ដែលជាហេតុធ្វើឱ្យការធ្វើដំណើរត្រូវចំណាយពេលវែងជាងជិះឡានក្រុងទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ