នាយករដ្ឋមន្រ្តីចិន រិះគន់ប្រទេសលោកខាងលិចដែលចង់កាត់បន្ថយការពឹងផ្អែកលើសេដ្ឋកិច្ចចិន
ថ្ងៃអង្គារ ទី២៧ ខែមិថុនា លោក លី ឈាំង នាយករដ្ឋមន្រ្តីចិន រិះគន់ចំពោះចេតនារបស់ថ្នាក់ដឹកនាំប្រទេសលោកខាងលិច ដែលចង់កាត់បន្ថយការពឹងផ្អែកលើសេដ្ឋកិច្ចចិន ថាជា«សំណើមិនត្រឹមត្រូវ»។ ក្រៅពីឆ្លើយតបបែបនេះ ថ្នាក់ដឹកនាំលេខ២ចិន បានពន្យល់ទៀតថា ពិភពលោកចាំបាច់ត្រូវសហការគ្នា និងពឹងពាក់គ្នាទៅវិញទៅមក ដើម្បី ការរីកចម្រើនរួមគ្នា។
ចុះផ្សាយនៅថ្ងៃ៖
ស្តាប់ - ០២:១៧
សេដ្ឋកិច្ចប្រទេសក្នុងពិភព គឺជាសហគមន៍សេដ្ឋកិច្ចរួមគ្នា ដែលត្រូវសហការពឹងផ្អែកគ្នាទៅវិញមក ដើម្បីវិបុលភាព និងការអភិវឌ្ឍរួមគ្នា។ នេះជាមូលដ្ឋានល្អត្រឹមត្រូវ និងគ្មានអ្វីអាក្រក់សោះ។ ទាំងនេះខ្លឹមសារប្រសាសន៍របស់ នាយករដ្ឋមន្រ្តីចិន លី ឈាំង នៅពេលធ្វើសុន្ទរកថា បើកវេទិកាសេដ្ឋកិច្ចពិភពលោករដូវក្តៅ នៅទីក្រុងធានជីន (Tianjin) ។
ពីប៉ែកខាងជើងប្រទេសចិននេះហើយ ដែល នាយករដ្ឋមន្ត្រីចិន បានស្តីបន្ទោសរិះគន់ត្រង់ៗចំពោះប្រទេសលោកខាងលិច ថា មានមនុស្សមួយចំនួននៅប្រទេសបច្ចិមលោក បញ្ចេញទ្រឹស្តីនិងបង្ហាញចេតនាចង់កាត់បន្ថយការពឹងផ្អែកផ្នែកសេដ្ឋកិច្ច ដើម្បីកាត់បន្ថយហានិភ័យ។ ការយល់ឃើញបែបនេះ គឺមិនត្រឹមត្រូវសោះ។ នាយករដ្ឋមន្រ្តីចិន លី ឈាំង បានចង្អុរបង្ហាញជាច្រើនលើកច្រើនសា ដោយសង្កត់ធ្ងន់លើពាក្យ «ត្រូវសហការគ្នាៗ»។
ប្រសាសន៍ឆ្លើយតបនិងការពន្យល់ទាំងនេះ គឺឆ្លើយតបទៅនឹងសហភាពអឺរ៉ុប ដែលកាលពីសប្តាហ៍មុននេះ ប្រទេសសមាជិកក្រុមប្រឹក្សាសហភាពអឺរ៉ុប បានបង្ហាញយុទ្ធសាស្ត្ររបស់ខ្លួន ដើម្បីបញ្ជៀសហានិភ័យជុំវិញសុវត្ថិភាពស្ថិរភាពសេដ្ឋកិច្ច។ ដែលក្នុងនោះ គឺ សហភាពអឺរ៉ុប បានព្រមានដាស់តឿនឲ្យប្រយ័ត្នប្រយែងខ្ពស់ក្នុងការដឹកនាំសេដ្ឋកិច្ចដែលពឹងផ្អែកខ្លាំងជ្រុលពេកនឹងសេដ្ឋកិច្ចរបស់ ចិន។
ចរន្តផ្នត់គំនិតរបស់សម្ព័ន្ធមិត្តលោកខាងលិច គឺដើរតាមលំនាំរបស់សហរដ្ឋអាមេរិកដែរ ដែលពួកប្រទេសលោកខាងលិច បានទាញសញ្ញាអាសន្នព្រមៗគ្នា ចំពោះការទាក់ទង់រកស៊ីជួញដូរសេដ្ឋកិច្ចពាណិជ្ជកម្មជាមួយចិន ជាពិសេសក្នុងវិស័យបច្ចេកវិទ្យា គឺត្រូវតែប្រយ័ត្នខ្លាំង។ ត្រូវតែប្រុងប្រយ័ត្នខ្លាំង គឺដើម្បីរក្សាសន្តិសុខសុវត្ថិភាពជាតិខ្លួន។
សូមជ្រាបថា វេទិកាសេដ្ឋកិច្ចពិភពលោករដូវក្តៅនៅក្រុងធានជីន ត្រូវបន្តពិភាក្សាគ្នារហូតដល់ថ្ងៃព្រហស្បតិ៍។ ថ្ងៃថ្លែងបើកវេទិកា នាយករដ្ឋមន្ត្រីចិន បានគូសបង្ហាញជាថ្មីទៀត ពីកំណើនសេដ្ឋកិច្ចក្នុងស្រុកចិនសរុប ថាបានកើនឡើង ៣% កាលពីឆ្នាំទៅមិញ។ នេះគឺតិចជាងនិងខុសពីការរំពឹងទុក ថា៥,៥% នៅឆ្នាំ២០២២។ ទោះជាម្តេចក្តី រដ្ឋអំណាចចិន បានកំណត់ព្យាករនិងដាក់កម្មវត្ថុជាថ្មីចំពោះកំណើនសេដ្ឋកិច្ចក្នុងស្រុកចិនសរុប នាឆ្នាំ២០២៣នេះ ថាប្រហែលនឹងអាចកើនឡើង ប្រមាណ៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ