ព្រះចៅអធិរាជជប៉ុន យាងបំពេញទស្សនកិច្ចផ្លូវរដ្ឋ ជាលើកទីមួយ នៅឥណ្ឌូណេស៊ី
តាំងពីឡើងគ្រងរាជ នៅឆ្នាំ២០១៩មក នេះជាលើកទីមួយ ដែលព្រះចៅអធិរាជជប៉ុន ណារ៉ូហ៊ីតូ យាងទៅបំពេញទស្សនកិច្ច ផ្លូវរដ្ឋនៅបរទេស គឺ ឥណ្ឌូណេស៊ី ដែលជាមហាអំណាចសេដ្ឋកិច្ចដ៏ធំជាងគេប្រចាំតំបន់អាស៊ីអាគ្នេយ៍។ ទទួលស្វាគមន៍ដោយប្រធានាធិបតីឥណ្ឌូណេស៊ី ចូកូ វីដូដូ ព្រះចៅអធិរាជ និងអធិរាជិនីជប៉ុន ត្រូវគង់នៅក្នុងប្រទេសឥណ្ឌូណេស៊ី ពីថ្ងៃទី ១៧ -២៣ មិថុនា។
ចុះផ្សាយនៅថ្ងៃ៖
ស្តាប់ - ០២:០៤
ទស្សនកិច្ចរបស់ព្រះចៅអធិរាជនិងអធិរាជិនី នៅក្នុងប្រទេសឥណ្ឌូណេស៊ី ជាការពង្រឹងមិត្តភាពរវាងប្រជាពលរដ្ឋទាំងពីរប្រទេស។ ពង្រឹងមិត្តភាព ជាមូលដ្ឋានគ្រឹះដ៏ចាំបាច់សម្រាប់អភិវឌ្ឍភាពជាដៃគូយុទ្ធសាស្ត្ររវាងជប៉ុននិងឥណ្ឌូណេស៊ី ជាពិសេសក្នុងវិស័យសេដ្ឋកិច្ច។ នេះជាប្រសាសន៍របស់លោកប្រធានាធិបតីឥណ្ឌូណេស៊ី ចូកូ វីដូដូ ទៅកាន់អ្នកសារព័ត៌មាន មុនផ្តើមកម្មវិធីពិសាភោជនីអាហារថ្ងៃត្រង់ នៅវិមានប្រធានាធិបតី Bogor។
តូក្យូនិងហ្សារកាតា ទើបបានរឹតចំណងទំនាក់ទំនងថែមទៀត ព្រោះជប៉ុនសំឡឹងឃើញភាពសំខាន់កាន់តែខ្លាំងឡើងៗរបស់ឥណ្ឌូណេស៊ី នៅក្នុងតំបន់ មិនថាក្នុងផ្នែកសេដ្ឋកិច្ចដែលកំពុងលូតលាស់ ឬដោយហេតុទីតាំងភូមិសាស្ត្រប្រកបដោយយុទ្ធសាស្ត្ររបស់ប្រទេសឥណ្ឌូណេស៊ី ដែលស្ថិតនៅចំកណ្តាលផ្លូវដឹកជញ្ជូនអន្តរជាតិ។
ឥណ្ឌូណេស៊ីធ្លាប់ស្ថិតនៅក្រោមការគ្រប់គ្រងរបស់ជប៉ុន រយៈពេលជាងបីឆ្នាំ ពោលគឺចាប់ពីឆ្នាំ១៩៤២ រហូតដល់ថ្ងៃជប៉ុនចាញ់សង្គ្រាមលោកលើកទីពីរ។ អំឡុងពេលត្រួតត្រាឥណ្ឌូណេស៊ី យោធាជប៉ុនបានច្បាំងប្រយុទ្ធជាមួយហូឡង់ ដែលដាក់អាណានិគមលើប្រទេសប្រជុំកោះនៅអាស៊ីអាគ្នេយ៍នេះអស់រយៈពេល៣០០ឆ្នាំ ដើម្បីបានឯករាជ្យ។ ហេតុដូច្នេះហើយបានជាព្រះចៅអធិរាជ និងអធិរាជិនី នឹងយាងទៅដាក់កម្រងផ្កានៅផ្នូរយុទ្ធជនជប៉ុនពលី ទាំង២៨នាក់ នៅក្រុងហ្សារកាតា នាថ្ងៃអង្គារស្អែក និងយាងទៅទស្សនាស្ថានីយ៍ចំណតរថភ្លើងក្រោមដីថ្មី ដែលជប៉ុនជាអ្នកផ្តល់ជំនួយសាងសង់ ព្រមទាំងស្ថានីយ៍បូមទឹក ដើម្បីបញ្ចៀសទឹកជំនន់។
ក្នុងដំណើរទស្សនកិច្ចផ្លូវរដ្ឋជាលើកទីមួយនេះ ព្រះចៅអធិរាជជប៉ុន ក៏នឹងយាងទៅក្រុងYogyakrta និងប្រាសាទ បូរ៉ូបូដូ ប្រាសាទឧទ្ទិសដល់ព្រះពុទ្ធសាសនាដ៏ធំជាងគេនៅលើពិភពលោក។
ក្រោយវិបត្តិកូវីដ អធិរាជជប៉ុនផ្តើមសកម្មភាពសាធារណៈបន្តិចម្តងៗឡើងវិញ។ កាលពីឆ្នាំទៅ ព្រះអង្គបានធ្វើដំណើរទៅបរទេស ជាផ្លូវការម្តង ដើម្បីចូលរួមក្នុងកម្មវិធីបញ្ចុះសពព្រះមហាក្សត្រីយានីអង់គ្លេស អេលីហ្សាប៊ែត ទីពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ