ឥណ្ឌូណេស៊ីបញ្ជាទិញរ៉ាដាកងទ័ពការពារផ្លូវអាកាស ពីក្រុមហ៊ុនបារាំង ចំនួន១៣គ្រឿង
ឥណ្ឌូណេស៊ី បានបញ្ជាទិញប្រព័ន្ធរ៉ាដាកងទ័ព ដើម្បីការពារផ្លូវអាកាស ចំនួន១៣គ្រឿង ពីក្រុមហ៊ុនបច្ចេកវិទ្យាបារាំង Thales International។ ប្រព័ន្ធរ៉ាដាទំនើបទាំងនេះ នឹងជាមធ្យោបាយដ៏សំខាន់សម្រាប់ឥណ្ឌូណេស៊ី នៅក្នុងការការពារផ្លូវអាកាស លើលំហរដ៏ធំមហិមា នៃទឹកដីខ្លួន ដែលផ្តុំដោយកោះជំនួន១៧០០០កោះ។
ចុះផ្សាយនៅថ្ងៃ៖
ស្តាប់ - ០៣:០១
យោងតាមលិខិតប្រកាសរួមគ្នា ចេញផ្សាយថ្ងៃអាទិត្យ ទី១៨មិថុនា គឺក្រុមហ៊ុនរដ្ឋឥណ្ឌូណេស៊ី PT Len Industri បានចុះកិច្ចសន្យាទិញរ៉ាដាការពារផ្លូវអាកាស ចំនួន១៣គ្រឿង ពីក្រុមហ៊ុនបារាំង Thales International។ លិខិតនេះ បញ្ជាក់ថា រ៉ាដាដែលឥណ្ឌូណេស៊ីទិញ គឺជាប្រភេទរ៉ាដា Ground Master 400 alpha (GM400α) ដែលនឹងបំពាក់ដោយបច្ចេកវិទ្យាទំនើប អាចចាប់យករូបភាពយ៉ាងច្បាស់នៅលើអាកាស ស្តីពីសកម្មភាពគំរាមកំហែងគ្រប់ទម្រង់ទាំងអស់ មិនថាយន្តហោះប្រតិកម្ម ជាមីស៊ីល ជាដ្រូន ឬជាឧត្ថម្ភាគចក្រហោះសំកាំងជាដើម។
ទឹកប្រាក់សរុបនៃកិច្ចសន្យានេះ មិនត្រូវបានបញ្ជាក់ឲ្យដឹង នៅក្នុងលិខិតប្រកាសនេះទេ។ ផ្អែកតាមប្រភពផ្សេងទៀត រ៉ាដានីមួយៗ អាចមានតម្លៃច្រើនសិបលានដុល្លារ ហើយដែលភាគីឥណ្ឌូណេស៊ី នឹងបង់ប្រាក់ជាដំណាក់កាលច្រើនឆ្នាំ។
យោងតាមលោកស្រី Pascale Sourisse អគ្គនាយិកាក្រុមហ៊ុន Thales International ប្រព័ន្ធរ៉ាដា GM400αគឺជារ៉ាដាចល័ត ដែលមានសមត្ថភាពចាប់រូបភាព និងរលកសញ្ញានានា ក្នុងចម្ងាយដល់ទៅ៥១៥គីឡូម៉ែត្រ។ រ៉ាដានេះ គឺមានបំពាក់ដោយបច្ចេកវិទ្យាបញ្ញាសិប្បនិម្មិតទំនើបចុងក្រោយបំផុត ដែលអាចប្រមូល និងវិភាគទិន្នន័យដ៏ច្រើនសន្ធឹក។ លោកស្រីបន្ថែមថា ការទិញរ៉ាដាការពារផ្លូវអាកាស ដ៏ទំនើបចុងក្រោយបំផុតចំនួន១៣គ្រឿងនេះ គឺបង្ហាញថាឥណ្ឌូណេស៊ី កំពុងតែព្រួយបារម្ភខ្លាំង អំពីសន្តិសុខផ្លូវអាកាសរបស់ខ្លួន។ ជាប្រទេសប្រជុំកោះធំជាគេបំផុតក្នុងពិភពលោក ឥណ្ឌូណេស៊ីមានដែនលំហសមុទ្រធំល្វឹងល្វើយ ហើយស្ថិតនៅក្នុងស្ថានការណ៍តំបន់ឥណ្ឌូប៉ាស៊ីហ្វិក ជាទីដែលចិនកំពុងតែបញ្ចេញសាច់ដុំកំញើញ។
សូមបញ្ជាក់ថា កិច្ចសន្យានេះបានកំណត់ថា គឺក្រុមហ៊ុន Thales ដែលជាអ្នកផលិតរ៉ាដាទាំងស្រុង ហើយជាអ្នកបង្កើតប្រព័ន្ធបច្ចេកវិទ្យាព័ត៌មានវិទ្យាសម្រាប់គ្រប់គ្រងទិន្នន័យរបស់រ៉ាដានេះ។ ដោយឡែក ក្រុមហ៊ុនឥណ្ឌូណេស៊ី PT Len Industri គឺជាអ្នកស្ថាបនាជើងទម្រ សម្រាប់ដាក់បញ្ឈររ៉ាដា ព្រមទាំងគ្រឿងផ្សំមួយចំនួនផង សម្រាប់រ៉ាដានេះ។
ផ្អែកតាលលោកស្រី Pascale Sourisse ស្ថានភាពភូមិសាស្ត្រនយោបាយបច្ចុប្បន្នកាន់តែតានតឹង ធ្វើឲ្យប្រទេសជាច្រើនព្រួយបារម្ភពីសន្តិសុខ ហើយដែលបានជំរុញ ឲ្យតម្រូវការប្រព័ន្ធរ៉ាដាការពារកាន់តែស្ទុះខ្លាំងឡើង។ ក្រុមហ៊ុន Thales International បានលើកការផលិតផ្នែកខ្លះ ទៅក្រៅប្រទេសបារាំង ដើម្បីឆ្លើយតបទៅនឹងទំហំនៃការផលិតផង ព្រមទាំងឆ្លើយតបទៅនឹងការចង់បានរបស់ប្រទេសអតិថិជនផង។ ប្រទេសខ្លះចង់ទទួលផលផ្នែកសេដ្ឋកិច្ចខ្លះពីកិច្ចសន្យាទិញរ៉ាដា ហើយថែមទាំងអាចទទួលបានចំណេះជំនាញបច្ចេកវិទ្យា ពីក្រុមហ៊ុនបារាំងផងដែរ។ ផ្អែកតាម Thales គិតមកទល់ពេលនេះ រ៉ាដាប្រភេទGM400ទាំងសេរីចាស់ និងសេរីថ្មីAlpha ត្រូវបានលក់អស់ ជាង៨០គ្រឿងហើយ ទៅកាន់ប្រទេសចំនួន១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ