ក្រុមជនជាតិដើមភាគតិច នៅកោះចាវ៉ាទាមទារឲ្យរដ្ឋាភិបាលកាត់ផ្តាច់បណ្តាញអ៊ីនធ័រនែត
ក្រុមជនជាតិដើមភាគតិចមួយ ប្រទេសឥណ្ឌូណេស៊ីទាមទារឲ្យរដ្ឋាភិបាលកាត់ផ្តាច់បណ្តាញអ៊ីនធ័រនែត នៅក្នុងសហគមន៍របស់នៅរបស់ពួកគេ នៅនៅកោះចាវ៉ា។ ផ្ទុយអ្នកផ្សេងដែលទាមទារចង់បានប្រព័ន្ធអ៊ីនធ័រនែត សហគមន៍ជនជាតិដើមភាគតិច ឈ្មោះ Baduy ចង់ឲ្យអាជ្ញាធរកាត់ផ្តាច់អ៊ីនធ័រនែត ដើម្បីកាត់បន្ថយផលប៉ះពាល់អាក្រក់ ដែលកើតចេញមកពីអ៊ីនធ័រនែត។
ចុះផ្សាយនៅថ្ងៃ៖ កែប្រែថ្ងៃទី៖
អាជ្ញាធរឥណ្ឌូណេស៊ី នៅលើកោះចាវ៉ា ស្តាប់មិនច្រលំនោះទេ។ ខណៈពេលប្រជាជនឥណ្ឌូណេស៊ី ជាង ៩០លាននាក់ គ្មានសេវាអ៊ីនធ័រនែត តាមទូរស័ព្ទដៃ ក្រុមជនជាតិដើមភាគតិច Baduy ក្នុងខេត្តBanten បែរជាទទូចសុំឲ្យអាជ្ញាធរកាត់ផ្តាច់បណ្តាញអ៊ីនធ័រនែត នៅក្នុងតំបន់រស់នៅរបស់ពួកគេ។ នៅក្នុងលិខិតស្នើសុំទៅកាន់អាជ្ញាធរមានសមត្ថកិច្ច នៅថ្ងៃចន្ទ ដើមសប្តាហ៍ សហគមន៍ជនជាតិដើមភាគតិចBaduy បានពន្យល់ថា ពួកគេទាមទារចង់ឲ្យផ្តាច់អ៊ីនធ័រនែត ដើម្បីកាត់បន្ថយផលប៉ះពាល់អាក្រក់នៃទូរស័ព្ទដៃ ស្មាតហ្វូន ទៅលើប្រជាជនក្នុងសហគមន៍ Baduy។ តាមអ្នកតំណាងរបស់សហគមន៍ជនជាតិដើមភាគតិច បង្គោលខ្សែកាបអ៊ីនធ័រនែត អាចគំរាមកំហែងជីវភាពរស់នៅ និងសីលធម៌របស់យុវជន Baduyដែលងាយនឹងទាក់ទាញ ទៅប្រើអ៊ីនធ័រនែត។
មានសមាជិក ជាង២៦០០០នាក់ សហគមន៍ជនជាតិដើមភាគតិច Baduy រស់នៅខេត្ត Banten ចម្ងាយជាង ៨០គីឡូម៉ែត្រពីទីក្រុងហ្សាកាតា។ សហគមន៍ Baduy ផ្ទាល់បានបែងចែកគ្នាជាពីរក្រុម គឺ សហគមន៍Baduy ខាងក្រៅ និងសហគមន៍Baduyខាងក្នុង ដែលរស់ជាប់នឹងធម្មជាតិ កាត់ផ្តាច់ពីពិភពលោកខាងក្រៅ។ ជនជាតិដើមBaduy ខាងក្នុង រស់នៅតាមទម្លាប់ចាស់បុរាណ គ្មានភ្លើង និងបដិសេធ មិនទទួលយកសេវាអប់រំរបស់រដ្ឋាភិបាល និងជាអ្នកទាមទារឲ្យគេកាត់ផ្តាច់អ៊ីនធ័រនែត។
នៅថ្ងៃសុក្រ មន្រ្តីស្រុក Lebak របស់ខេត្តBanten និយាយប្រាប់ទីភ្នាក់ងារព័ត៌មានបារាំង AFP ថា រដ្ឋាភិបាលចង់ផ្គត់ផ្គង់គ្រប់យ៉ាង ដែលសហគមន៍ជនជាតិដើមភាគតិច Baduy ចង់បាន និងត្រូវការដើម្បីធានារក្សាទំនៀមទម្លាប់ និងសតិបញ្ញារបស់ប្រជាជនម្ចាស់ស្រុក។ តាមមន្រ្តីឥណ្ឌូណេស៊ី ដដែល សហគមន៍ ជនជាតិដើមBaduy ខាងក្រៅ ត្រូវការអ៊ីនធ័នែត សម្រាប់ការលក់ទំនិញតាមអនឡាញ ប៉ុន្តែ គេក៏បារម្ភដែរថា អ្នកទេសចរអាចប្រើសេវាអ៊ីនធ័រនែត នៅក្បែរភូម និងបង្ហាញរូបភាពមិនសមរម្យ ដែលធ្វើឲ្យប៉ះពាល់ដល់ជីវិតរស់នៅស្ងប់សុខរបស់ជនជាតិដើមភាគតិច Baduy ខាងក្នុង។
រស់នៅក្នុងភូមិចំនួន៣ ដែលមានផ្ទៃដី ៤០០០ហិចតា ជនជាតិដើមភាគតិច Baduy ខាងក្នុងជ្រើសរើសយកជីវិតរស់នៅ ក្នុងព្រៃ កាត់ផ្តាច់ពីលោកខាងក្រៅ និងបដិសេធមិនប្រើបច្ចេកវិទ្យា ចាយក្រដាសប្រាក់។
ឥណ្ឌូណេស៊ីមានក្រុមជនជាតិដើមភាគតិចជាង ១៣០០ក្រុម។ នៅឆ្នាំ ១៩៩០ រដ្ឋាភិបាលបានប្រកាសដាក់បញ្ចូល តំបន់រស់នៅរបស់ជនជាតិដើមភាគតិច Baduy នៅក្នុងតំបន់អភិរក្សវប្បធម៌របស់ប្រទេសឥណ្ឌូណេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ