ក្រុមប្រទេសអាស៊ាន សម្រេចធ្វើសមយុទ្ធយោធារួមគ្នាជាលើកទី១ ក្នុងសមុទ្រចិនខាងត្បូង
ក្រុមប្រទេសសមាជិកទាំង១០របស់អាស៊ាន រួមជាមួយទីម័រខាងកើត បានសម្រេចរួមគ្នា ថានឹងរៀបចំកម្មវិធីសមយុទ្ធយោធារួមគ្នា នៅរវាងខែកញ្ញាខាងមុខ។ សមយុទ្ធ ដែលនឹងធ្វើនៅក្នុងសមុទ្រចិនខាងត្បូងនេះ នឹងផ្តោតជាពិសេស ទៅលើប្រតិបត្តិការការពារសន្តិសុខ និងការសង្គ្រោះផ្លូវសមុទ្រ។
ចុះផ្សាយនៅថ្ងៃ៖
ស្តាប់ - ០២:១១
យោងតាមការចុះផ្សាយ របស់បណ្ដាញព័ត៌មាន Antara លោកអគ្គមេបញ្ជាការកងទ័ពជើងទឹកឥណ្ឌូណេស៊ី Yudo Margono បានឲ្យដឹងថា បន្ទាប់ពីបានជួបប្រជុំគ្នានៅបាលី តំណាងកងទ័ពប្រទេសទាំង១០របស់អាស៊ាន រួមជាមួយទីម័រខាងកើត បានសម្រេចថានឹងធ្វើសមយុទ្ធយោធារួមគ្នា នៅខែកញ្ញា។ សមយុទ្ធនេះ នឹងប្រព្រឹត្តិធ្វើទៅ នៅតំបន់សមុទ្រ Natuna ដែនទឹករបស់ឥណ្ឌូណេស៊ី។ លោកអគ្គមេបញ្ជាការឥណ្ឌូណេស៊ី បានបញ្ជាក់បន្ថែមថា សមយុទ្ធនេះ មិនមែនជាការហាត់សមប្រយុទ្ធអ្វីទេ តែជាការហាត់សមក្នុងការយាមល្បាតការពារសន្តិសុខក្នុងសមុទ្រ និងហាត់សមក្នុងការជួយសង្គ្រោះតាមផ្លូវសមុទ្រ។
គួរកត់សំគាល់ថា ជានិច្ចជាកាល ប្រទេសសមាជិកអាស៊ានខ្លះ តែងបានចូលរួមធ្វើសមយុទ្ធយោធារួមគ្នា ជាមួយកងទ័ពអាមេរិក។ តែនេះជាលើកទី១ហើយ ដែលប្រទេសអាស៊ានទាំង១០ រួមគ្នាធ្វើសមយុទ្ធកងទ័ពជើងទឹក ដាច់ដោយឡែក ក្នុងក្របខណ្ឌអាស៊ាន។
ការប្រកាសពីសមយុទ្ធនេះ ត្រូវបានធ្វើឡើង បន្ទាប់ពីអាមេរិក បានអំពាវនាវឲ្យចិន ត្រូវតែបញ្ឈប់ជាបន្ទាន់ នូវសកម្មភាពវាតទីអាងយ៉ាង និងរករឿង នៅក្នុងតំបន់សមុទ្រចិនខាងត្បូង។ កាលពីពេលថ្មីៗនេះ វិះតែនឹងមានការប៉ះទង្គិចគ្នា រវាងឆ្មាំសមុទ្រហ្វ៊ីលីពីន និងកងទ័ពជើងទឹកចិន ហើយនិងមានករណី យន្តហោះចម្បាំងចិន ហោះមកប្រកៀក ចង់សំឡុតយន្តហោះស៊ើបការណ៍របស់អាមេរិក។
សូមរំលឹកថា ប្រទេសអាស៊ាន មានដូចជា ឥណ្ឌូណេស៊ី ម៉ាឡេស៊ី វៀតណាម និងហ្វ៊ីលីពីន សុទ្ធតែមានវិវាទដែនទឹកជាមួយចិន នៅក្នុងតំបន់សមុទ្រចិនខាងត្បូង។ យ៉ាងណាមិញ តំបន់ប្រជុំកោះ Natuna របស់ឥណ្ឌូណេស៊ី តែងតែត្រូវបាននាវាកងទ័ពចិនចូលមកជារឿយៗ។ នៅក្នុងក្របខណ្ឌជំនួបកំពូលកាលពីខែឧសភាកន្លងទៅ ក្រុមប្រទេសអាសាន បាននិយាយគ្នាអំពី ការប៉ះទង្គិចគ្នាធ្ងន់ធ្ងរ និងរិះរកវិធានការ ដើម្បីបង្កើតជាបទបញ្ជាផ្ទៃក្នុង ដែលត្រូវគោរព ដើម្បីបញ្ចៀសបញ្ហាជម្លោះវិវាទនៅក្នុងតំបន់នេះ។ ច្រកសមុទ្រតំបន់នេះ គឺជាច្រកផ្លូវឆ្លងកាត់ដ៏សំខាន់បំផុត របស់នាវាដឹកទំនិញអន្តរជាតិ។ បរិបទតានតឹងជុំវិញកោះតៃវ៉ាន់ ក៏បានធ្វើឲ្យប្រទេសអាស៊ានត្រូវបង្កើនការប្រុងប្រយ័ត្នផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ