លោកម៉ូឌីសន្យាដាក់ទោសអ្នកធ្វើឲ្យមានលើគ្រោះថ្នាក់រថភ្លើងបុកគ្នាដែលសម្លាប់មនុស្សជាង៣០០នាក់
នៅទីក្រុងBalasore ភាគខាងកើតប្រទេសឥណ្ឌា នៅមួយថ្ងៃក្រោយ គ្រោះថ្នាក់រថភ្លើងបុកគ្នាដែលសម្លាប់មនុស្សប្រមាណ ២៨០នាក់ និងរបួស ជាង ៩០០នាក់ កាលពីថ្ងៃសៅរ៍ គ្រួសារជនរងគ្រោះនៅតែបន្តស្វែងរកសាច់ញាតិរបស់ខ្លួន ដែលកំពុងបាត់ខ្លួន។ នៅក្នុងដំណើរទៅកាន់កន្លែងកើតហេតុ និងនៅមន្ទីរពេទ្យដើម្បី ជួបជនរងគ្រោះ នាយករដ្ឋមន្រ្តីឥណ្ឌា លោកណារិនដ្រា ម៉ូឌីបានសន្យាដាក់ទោសអ្នកដែលទទួលខុសត្រូវ លើហេតុការណ៍គ្រោះថ្នាក់រថភ្លើងបុកគ្នា កាលពីថ្ងៃសៅរ៍ម្សិលមិញ។
ចុះផ្សាយនៅថ្ងៃ៖
ស្តាប់ - ០២:៣១
មួយថ្ងៃក្រោយ គ្រោះថ្នាក់រថភ្លើងបុកគ្នា ដែលបានសម្លាប់អ្នកដំណើរយ៉ាងហោច ២៨០នាក់ និងរបួស ជាង៩០០នាក់ រដ្ឋមន្រ្តីក្រសួងដឹកជញ្ជូនផ្លូវដែកឥណ្ឌា លោក Ashwini Vaishnawបាននិយាយប្រាប់អ្នកកាសែតថា នៅក្រោយការស៊ើបអង្កេតបឋម គេបានរកឃើញមូលហេតុ និងកំណត់បានអត្តសញ្ញាណអ្នកដែលទទួលខុសត្រូវ ធ្វើឲ្យកើតមានគ្រោះថ្នាក់រថភ្លើងបុកគ្នា កាលពីថ្ងៃសៅរ៍។ រដ្ឋមន្រ្តីឥណ្ឌាមិនបានលម្អិតច្រើន ដោយប្រាប់ឲ្យគេរង់ចាំរបាយការណ៍ចុងក្រោយ ដែលត្រូវប្រកាសនាពេលខាងមុខ។ ប៉ុន្តែ នៅក្នុងសន្និសីទ នៅថ្ងៃអាទិត្យនេះ រដ្ឋមន្រ្តីក្រសួងដឹកជញ្ជូនផ្លូវដែកនិយាយថា ការផ្លាស់ប្តូរប្រព័ន្ធអេឡិចត្រូនិកinterlocking ដែលមាននាទីគ្រប់គ្រងបញ្ជូនសញ្ញានៅលើផ្លូវដែក ជាមូលហេតុនៃគ្រោះថ្នាក់បុករថភ្លើង កាលពីថ្ងៃសៅរ៍។
នៅក្នុងដំណើរចុះត្រួតពិនិត្យនៅកន្លែងកើតហេតុ កាលពីថ្ងៃសៅរ៍ នាយករដ្ឋមន្រ្តីឥណ្ឌា លោកណារិនដ្រា ម៉ូឌីបានសន្យាចាត់វិធានការ ដាក់ពិន័យរាល់អ្នកដែលទទួលខុសត្រូវលើសោកនាដកម្មបុករថភ្លើង ដែលបានសម្លាប់មនុស្ស ដ៏ច្រើនមិនធ្លាប់មាន នៅឥណ្ឌា នៅ២០ឆ្នាំចុងក្រោយនេះ។
អ្វីដែលគេកំពុងចោទសួរនៅពេលនេះគឺថា ហេតុអ្វីបានជារថភ្លើងដឹកអ្នកដំណើរចរាចរ បរ នៅលើខ្សែផ្លូវរបស់រថភ្លើងដឹកទំនិញ។ នៅយប់ថ្ងៃសុក្រ ឈានចូលដល់ថ្ងៃសៅរ៍ រថភ្លើងដឹកពេញដោយអ្នកដំណើរពីទីក្រុងCalcutta ទៅ Chinnai បានងាក បត់ចេញពីខ្សែរផ្លូវរថភ្លើងដើម ទៅបើកលើខ្សែផ្លូវរបស់រថភ្លើងដឹកទំនិញ។ រត់ក្នុងល្បឿន ១៣០គីឡូម៉ែត្រក្នុងមួយម៉ោង រថភ្លើងដឹកអ្នកដំណើរបើកបុកមួយទំហឹងរថភ្លើងដឹកទំនិញដែលកំពុងសំចតនៅស្ថានីយ៍រថភ្លើង។ ភ្លាមៗ ទូររថភ្លើងដឹកអ្នកដំណើរពេញៗ ចំនួន៣បានខ្ទាត ប៉ើងទៅបុកទូរចុងក្រោយរបស់រថភ្លើងដឹកអ្នកដំណើរមួយគ្រឿងទៀត ដែលធ្វើដំណើរបញ្ច្រាសទិស សំដៅចូលក្រុង Calcutta។
គ្រោះថ្នាក់បុករថភ្លើងបីខ្សែ ដែលពីរខ្សែជារថភ្លើងដឹកអ្នកដំណើរបានបណ្តាលឲ្យមនុស្សស្លាប់យ៉ាងតិច ២៨០នាក់។ តាមអនុប្រធានប៉ូលិសផ្លូវដែកឥណ្ឌា រហូតមកដល់ពេលនេះ គេអាចកំណត់អត្តសញ្ញាណរបស់ជនរងគ្រោះតែជាង៤០នាក់ប៉ុណ្ណោះ ដូច្នេះប៉ូលិស អំពាវនាវឲ្យគេធ្វើធ្វើតេស្តADN ដើម្បីសម្រួលដល់ការស្វែងរកសាច់ញាតិដែលបាត់បង់ជីវិតនៅក្នុងគ្រោះថ្នាក់លើកនេះ។
គ្រោះថ្នាក់បុករថភ្លើងកាលពីថ្ងៃសៅរ៍ ជាសោកនាដកម្មសម្លាប់មនុស្សដ៏ច្រើន បន្ទាប់ពីគ្រោះថ្នាក់រថភ្លើងបុកគ្នា កាលពីឆ្នាំ ១៩៩៥ នៅក្បែរទីក្រុងAgra ដែលបានសម្លាប់មនុស្សជាង៣០០នាក់។ គ្រោះថ្នាក់រថភ្លើងបុកគ្នា ដែលសម្លាប់មនុស្សច្រើនជាងគេនៅក្នុងប្រវត្តិសាស្រ្តឥណ្ឌា គឺគ្រោះថ្នាក់នៅរដ្ឋ ប៊ីហា ភាគខាងកើតឥណ្ឌា នៅឆ្នាំ ១៩៨១ នៅពេលទូររថភ្លើងដឹកអ្នកដំណើរចំនួន៧ធ្លាក់ចុះទៅក្នុងទឹកទន្លេ សម្លាប់មនុស្សពី៨០០ទៅ ១០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ