អាជ្ញាធរម៉ាឡេស៊ី សង្ស័យថា នាវាចិនចូលលួចសម្ភារៈនៅក្នុងខ្មោចនាវាចម្បាំងអង់គ្លេសដែលលិចក្នុងសមុទ្រ
កាលពីថ្ងៃសៅរ៍ទី២៧ឧសភា កងឆ្មាំសមុទ្រម៉ាឡេស៊ី បានចាប់ឃាត់នាវាមួយគ្រឿងចុះបញ្ជីនៅចិន ដែលចូលចតដោយគ្មានការអនុញ្ញាតនៅក្នុងដែនទឹកម៉ាឡេស៊ី។ ពេលចូលទៅឆែកឆេរ គេបានប្រទះឃើញ នូវគ្រាប់កាំភ្លើងត្បាល់ ព្រមទាំងសម្ភារៈជាច្រើនផ្សេងទៀត ដែលគេសង្ស័យថា នាវាចិននោះ ទំនងជាបានទៅលួចយកពីចេញពីខ្មោចនាវាចម្បាំងរបស់កងទ័ពអង់គ្លេស ដែលលិចក្នុងសមុទ្រ តាំងតែពីសម័យសង្គ្រាមលោកលើកទី២។
ចុះផ្សាយនៅថ្ងៃ៖
ស្តាប់ - ០២:២៥
លោក Nurul Hizam Zakaria ប្រធានទីភ្នាក់ងារយាមល្បាតសមុទ្រ ប្រចាំរដ្ឋ Johor របស់ម៉ាឡេស៊ី បានឲ្យដឹងថា សមត្ថកិច្ចម៉ាឡេស៊ី បានឃាត់នាវាចិនមួយគ្រឿង ដែលបានធ្វើដំណើរចេញពីកំពង់ផែ ក្រុងហ្វូចូវ។ សមាជិកនាវិក ចំនួន៣២នាក់ ២១នាក់ជាជនជាតិចិន ១០នាក់ជាជាតិបង់ក្លាដែស និង១នាក់ជនជាតិម៉ាឡេស៊ី ត្រូវបានឃាត់ខ្លួនបណ្តោះអាសន្ន ដើម្បីសួរចម្លើយ។
មន្រ្តីម៉ាឡេស៊ីខាងលើ បានបញ្ជាក់ថា ការស៊ើបអង្កេត នឹងផ្តោតសំខាន់ទៅលើការស្វែងរកប្រភព នៃគ្រាប់កាំភ្លើងត្បាល់មិនទាន់ផ្ទុះ ជាច្រើនគ្រាប់ ដែលគេបានប្រទះឃើញ នៅលើនាវាចិននេះ។ លោកបានប្រាប់អ្នកយកព័ត៌មានបារាំង AFP ថាមន្ត្រីមានសមត្ថកិច្ច និងអ្នកជំនាញម៉ាឡេស៊ីជាច្រើននាក់ កំពុងតែពិនិត្យឆែកឆេរបន្តលើនាវានេះ។
ដោយឡែក មន្ត្រីកិច្ចការសមុទ្រម៉ាឡេស៊ីម្នាក់ ដោយសុំមិនបញ្ជេញឈ្មោះ បានប្រាប់អ្នកកាសែតថា តាមការសង្ស័យ គឺគ្រាប់កាំភ្លើងត្បាល់ទាំងនោះ ប្រហែលជាត្រូវបានក្រុមនាវិកចិន ចុះទៅយកពីក្នុងខ្មោចនាវាចម្បាំងអង់គ្លេសចំនួន២គ្រឿង ដែលលិចក្នុងសមុទ្រ តាំងតែពីសម័យសង្គ្រាមលោកលើកទី២។
សូមបញ្ជាក់ថា យោងតាមរូបភាពជាច្រើន ដែលផ្សព្វផ្សាយដោយកងឆ្មាំសមុទ្រម៉ាសឡេស៊ី នៅលើនាវាចិននោះ គេឃើញមាន បំណែកដែកច្រែសជាច្រើនដុំ គ្រាប់កាំភ្លើងត្បាល់ជាច្រើនគ្រាប់ ព្រមទាំងឧបករណ៍ម៉ាស៊ីនស្ទូចដ៏ធំមួយ និងសម្ភារៈផ្សេងទៀត ដែលប្រើប្រាស់ក្នុងការអារផ្តាច់ដែក។
អាជ្ញាធរម៉ាឡេស៊ីបានអះអាងថា ខ្លួនមិនអាចអត់ឱនជាដាច់ខាត នូវការសកម្មភាពចូលទៅលួច លុកលុយបំផ្លេចបំផ្លាញបេតិកភណ្ឌជាតិ សល់ពីសម័យសង្គ្រាម។ ដូចគ្នា បណ្តាញព័ត៌មាន BBC បានចុះផ្សាយកាលពីថ្ងៃសៅរ៍ថា លោករដ្ឋមន្ត្រីក្រសួងការពារជាតិអង់គ្លេស ថ្កោលទោសចំពោះការចូលទៅទន្រ្ទានបំផ្លាញ ដល់ខ្មោចនាវាចម្បាំងរបស់អង់គ្លេស ពីសំណាក់ជនខិលខូច។
សូមរំលឹកថា កាលពីថ្ងៃទី១០ធ្នូ ឆ្នាំ១៩៤១ នាវាចម្បាំងដ៏ធំ២គ្រឿង របស់កងទ័ពអង់គ្លេស ត្រូវបានកងទ័ពជប៉ុនវាយប្រហារបណ្តាលឲ្យលិច នៅក្បែរតំបន់សមុទ្រចិនខាងត្បូង បណ្តាលឲ្យស្លាប់ទាហានជើងទឹកអង់គ្លេសជាច្រើនរយនាក់។ ថ្មីៗនេះ កាសែតម៉ាឡេស៊ីមួយឈ្មោះ New Straits Times បានចុះផ្សាយថា សម្ភារៈជាច្រើននៅលើនាវាចម្បាំងទាំងនេះ ដែលដែលធ្វើពីលោហៈអាលុយមីញ៉ូម និងស្ពាន់ជាដើម កំពុងត្រូវបានក្រុមចោរសមុទ្រសំឡឹងចង់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ