ចិនបញ្ជូនអវកាសយានិកស៊ីវិលជាលើកទីមួយ ទៅស្ថានីយ៍អវកាស
ចិនកំពុងបោះជំហានចូលដល់ដំណាក់ថ្មីមួយទៀត ក្នុងមហិច្ឆតាអវកាស។ នៅថ្ងៃអង្គារទី ៣០ ឧសភា ជាលើកទីមួយ ចិននឹងបញ្ជូនអវកាសយានិកស៊ីវិលម្នាក់ ទៅបំពេញបេសកកម្មនៅស្ថានីយ៍អវកាសធៀនគង់។ គឺលោក គួយ ហៃឆូវ ដែលជាសាស្ត្រាចារ្យនៅសកលវិទ្យាល័យ អាកាសចរណ៍និងអវកាសក្រុងប៉េកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
រហូតមកទល់ពេលនេះ អវកាសយានិកដែលចេញបំពេញការងារនៅស្ថានីយ៍អវកាស សុទ្ធតែមាននាមជាទាហានបម្រើក្នុងក្រសួងយោធារំដោះប្រជាជនចិនទាំងអស់។ ប៉ុន្តែនៅថ្ងៃអង្គារ វេលាម៉ោង ៩និង៣១នាទី ព្រឹកម៉ោងនៅក្នុងស្រុក (ត្រូវម៉ោង១និង៣១នាទីម៉ោងសកល) លោកសាស្ត្រាចារ្យ គួយ ហៃឆូវ នឹងហោះក្បែរអវកាសយានិកយោធាពីររូបទៀត គឺលោក ជិង ហៃប៉េង Jing Haipengនិងស៊ូ យ៉ាងស៊ូ Zhu yangzhu សំដៅទៅស្ថានីយអវកាស ក្នុងក្របខ័ណ្ឌនៃបេសកកម្មShenzhou-១៦។
លោក គួយ ហៃឆូវ នឹងទទួលខុសត្រូវចាត់ចែងបន្ទុកសំខាន់ៗនៅលើតារាគន្លងវិថី ដែលជាការដកពិសោធន៍វិទ្យាសាស្ត្រអវកាស។ នេះបើតាមការបញ្ជាក់របស់អ្នកនាំពាក្យភ្នាក់ងារអវកាសចិន។
ចិនបានបញ្ជូនមនុស្សទៅក្នុងអវកាសជាលើកទីមួយ នៅឆ្នាំ២០០៣ និងមានស្ថានីយអវកាសផ្ទាល់ខ្លួន ឈ្មោះ Tiangong ឬវិមានសួគ៌ ដែលចាប់ដំណើរការយ៉ាងពេញលេញ តាំងពីចុងឆ្នាំ២០២២មក។ ស្ថានីយ៍cin មានបំពាក់បច្ចេកវិទ្យាវិទ្យាសាស្ត្រដ៏ទំនើបបំផុត មានអាទិ៍ប្រព័ន្ធនាឡិកាអាតូមិចសម្រាប់អវកាស និងហោះក្នុងលំហរគន្លងតារាវិថីកម្ពស់ប្រមាណ៤០០ទៅ៤៥០គីឡូម៉ែត្រពីភពផែនដី។ ចិនគ្រោងប្រើស្ថានីយ៍នេះ រយៈពេលយ៉ាងហោច១០ឆ្នាំ ដើម្បីអាចរក្សាវត្តមានមនុស្សជាប់ឥតដាច់ក្នុងអវកាសឱ្យបានយូរ។
ក្រុមអវកាសយានិកបានផ្លាស់វេនគ្នាទៅប្រចាំការនៅក្នុងស្ថានីយ៍អវកាស ដើម្បីសិក្សាពិសោធន៍វិទ្យាសាស្ត្រផងនិងសាកល្បងបច្ចេកវិទ្យាថ្មីផង។
ធ្លាប់យឺតយ៉ាវខ្លាំង តែក្រោមអំណាចរបស់ប្រធានាធិបតីស៊ីជីនពីង និងក្នុងរយៈពេលប៉ុន្មានទសវត្សរ៍ចុងក្រោយនេះ ចិនបានចំណាយទុនវិនិយោគ កម្មវិធីអវកាសអស់រាប់ពាន់លានដុល្លារ ដើម្បីរត់ប្រដេញតាមអាមេរិកនិងរុស្ស៊ី។ កាលពីឆ្នាំ២០១៩ យានយន្តអវកាសចិនបានហោះទៅដល់ផ្នែកម្ខាងទៀតនៃព្រះចន្ទ។ តាំងពីឆ្នាំ២០២១មក ចិនបានបញ្ជូនរ៉ូប៉ូទៅចុះនៅលើភពអង្គារ ហើយមានគម្រោងបញ្ជូនអវកាសយានិកមួយក្រុមដំបូងទៅភពព្រះចន្ទនៅឆ្នាំ២០២៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ