ចិន

អាកាសចរណ៍៖ចិនបានបើកសម្ពោធការហោះហើរយន្តហោះដឹកអ្នកដំណើរ « Made in China » ជាផ្លូវការ

នៅក្នុងប្រទេសចិន ក្រុមហ៊ុនអាកាសចរណ៍ China Eastern Airlines បានបើកសម្ពោធការហោះហើរយន្តហោះដឹកអ្នកដំណើរ « Made in China » លើកទី១ នាថ្ងៃអាទិត្យ ទី២៨ ឧសភានេះ។ យន្តហោះដឹកអ្នកដំណើរ « Made in China » មានឈ្មោះ C919 បានហោះចេញពីអាកាសយានដ្ឋានក្រុងសៀងហៃឆ្ពោះទៅកាន់អាកាសយានដ្ឋានក្រុងប៉េកាំងជាមួយនឹងអ្នកដំណើរប្រមាណជា ១៣០នាក់។ ព្រឹត្តិការណ៍នេះជាសក្ខីកម្មដែលបញ្ជាក់ពីការបោះជំហានទៅមុខរបស់វិស័យអាកាសចរណ៍ចិនប្រឈមនឹងគូប្រជែងអាមេរិក និងអឺរ៉ុប។

ចុះផ្សាយនៅថ្ងៃ៖ 28/05/2023 - 13:48

១២ នាទី

ចិនបានបើកសម្ពោធការហោះហើរយន្តហោះដឹកអ្នកដំណើរ « Made in China » លើកទី១ AP - Ding Ting

ដោយ៖ គួច គន្ធារ៉ា

ផ្សាយពាណិជ្ជកម្ម

ហោះចេញពីអាកាសយានដ្ឋានក្រុងសៀងហៃនៅម៉ោង ១០ និង ៣២នាទីម៉ោងក្នុងស្រុក C919 ដែលមានដឹកអ្នកដំណើរប្រមាណជា ១៣០នាក់បានចុះចតដោយជោគជ័យនៅអាកាសយានដ្ឋានក្រុងប៉េកាំងនៅប្រមាណជា ២ម៉ោងក្រោយមក។ រូបភាពនៃការហោះហើរលើកដំបូងរបស់ C919 ជាមួយនឹងអ្នកដំណើរត្រូវបានផ្សព្វផ្សាយដោយទូរទស្សន៍រដ្ឋ CCTV។ គួរបញ្ជាក់ថា យន្តហោះដឹកអ្នកដំណើរ « Made in China » C919 ត្រូវបានផលិតដោយក្រុមហ៊ុនផលិតយន្តហោះចិនឈ្មោះ Comac ដែលជាក្រុមហ៊ុនរដ្ឋ។ តាំងពី ១៥ឆ្នាំមកម្ល៉េះដែល Comac បានចាប់ផ្តើមផលិតយន្តហោះដឹកអ្នកដំណើរ C919។

តែជាមួយនឹងការយឺតយ៉ាវច្រើនឆ្នាំក្រោមហេតុផលផ្សេងៗ ការហោះហើរសាកល្បងលើកទី១ បានធ្វើឡើងក្នុងឆ្នាំ ២០១៧ និងក្រោយមក ការហោះហើរសាកល្បងបានធ្វើច្រើនដងរហូតដល់ថ្ងៃបើកសម្ពោធហោះហើរជាផ្លូវការក្នុងថ្ងៃអាទិត្យ ទី២៨ ឧសភា ឆ្នាំ ២០២៣ នេះ។ ជាមួយនឹងវត្តមានយន្តហោះដឹកអ្នកដំណើរ « Made in China » C919 នៅក្នុងអាកាសរបស់ចិនពេលនេះ ក្រុងប៉េកាំងសង្ឃឹមចូលប្រកួតប្រជែងជាមួយយន្តហោះដឹកអ្នកដំណើររបស់បរទេស ពិសេសប៊ូអ៊ីង 737 MAX របស់អាមេរិក និង អ៊ែរប៊ូស A320 របស់អឺរ៉ុប។

ពិតណាស់ យន្តហោះដឹកអ្នកដំណើរ C919 ជាស្នាដៃរបស់ចិន ១០០%។ តែគេមិនត្រូវភ្លេចនិយាយទេថា មានគ្រឿងបន្លាស់សំខាន់ៗជាច្រើនដែលបំពាក់នៅក្នុង C919 ជាគ្រឿងបន្លាស់នាំចូលពីបរទេស ពិសេសម៉ូទ័រ និងគ្រឿងអេឡិចត្រូនិកដែលផលិតដោយក្រុមហ៊ុនអាមេរិក General Electric និង Honeywell ឬមួយក៏ក្រុមហ៊ុនបារាំង Safran។ ក្រុមហ៊ុន China Eastern Airlines ដែលបានកម្ម៉ង់ទិញ C919 ចំនួន ៥គ្រឿងក្នុងខែមីនា ឆ្នាំ ២០២១ បានបញ្ជាក់ថា ក្រុមហ៊ុននឹងផ្តើមធ្វើចរាចរណ៍ C919 ពីក្រុងសៀងហៃទៅក្រុងឆេនឌូចាប់ពីថ្ងៃចន្ទ ទី២៩ ឧសភា។

ចំណែកក្រុមហ៊ុនផលិតយន្តហោះចិន Comac បានបញ្ជាក់ពីទទួលបានការកម្ម៉ង់ទិញ C919 ជាង ១ ២០០គ្រឿងពីក្រុមហ៊ុនអាកាសចរណ៍ប្រមាណជា ៣០ក្រុមហ៊ុន។ Comac សង្ឃឹមផលិតយន្តហោះ C919 ចំនួន ១៥០គ្រឿងក្នុងមួយឆ្នាំពីពេលនេះទៅ ៥ឆ្នាំខាងមុខ៕