អង្គការអន្តរជាតិ២ទាមទារឲ្យតុលាការICCស៊ើបអង្កេតលើការធ្វើទុកបុកម្នេញលើស្រ្តីអាហ្វហ្កានីស្ថាន
សេចក្តីថ្លែងការណ៍រួម ចុះផ្សាយនៅថ្ងៃសុក្រនេះ អង្គការការពារសិទ្ធិមនុស្សអន្តរជាតិ ២ គឺអង្គការAmnesty International និងគណៈកម្មការអន្តរជាតិដើម្បីយុត្តិធម៌ ICJ បានចោទប្រកាន់រដ្ឋាភិបាលតាលីបង់ថា កំពុងធ្វើទុកបុកម្នេញ សង្កត់សង្កិន រឹតត្បិត សិទ្ធិសេរីភាព របស់មនុស្សស្រីអាហ្វហ្កានីស្ថាន។ សម្រាប់អង្គការការពារសិទ្ធិមនុស្សទាំងពីរ ការធ្វើទុក្ខបុកម្នេញរបស់អាជ្ញាធរតាលីបង់ដោយផ្អែកលើយេនឌ័រ គឺជាឧក្រិដ្ឋកម្មប្រឆាំងមនុស្សជាតិដែលតុលាការព្រហ្មទណ្ឌអន្តរជាតិ ICC គួរស៊ើបអង្កេត និងចាត់វិធានការផ្លូវច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
របាយការណ៍ថ្មីរបស់អង្គការការពារសិទ្ធិមនុស្សអន្តរជាតិ Amnesty International រួមជាមួយគណៈកម្មការអន្តរជាតិដើម្បីយុត្តិធម៌ សង្កត់ធ្ងន់ទៅលើការធ្វើទុក្ខបុកម្នេញរបស់ពួកតាលីបង់ ទៅលើស្រ្តីអាហ្វហ្កានីស្ថាន តាមរយៈ ការចាប់ដាក់ពន្ធនាគារ ការបាត់ខ្លួនដោយបង្ខំ ការធ្វើទារុណកម្ម ការរៀបការដោយបង្ខំ និងការបំពារបំពានផ្សេងទៀត។
ចាប់តាំងដណ្តើមអំណាចគ្រប់គ្រងអាហ្វហ្កានីស្ថាន នៅក្រោយការដកទ័ពដោយប្រថុចញ៉ុចរបស់អាមេរិក និងអូតង់ នៅពាក់កណ្តាលឆ្នាំ ២០២១ រដ្ឋាភិបាលតាលីបង់ធ្លាប់បានសន្យាថា នឹងអនុវត្តនយោបាយយោគយល់ គោរពសិទ្ធិសេរីភាព។ ប៉ុន្តែ អាជ្ញាធរតាលីបង់មិនបានគោរពការសន្យា ផ្ទុយទៅវិញ បានត្រលប់ទៅប្រើច្បាប់អ៊ីស្លាមតឹងរ៉ឹង ដោយសម្រេចហាមឃាត់ លែងឲ្យក្មេងស្រីទៅរៀន បិទសិទ្ធិមនុស្សស្រីមិនឲ្យទៅធ្វើការ ឬចេញទៅសួនសាធារណៈ និងចាប់ដាក់ពន្ធនាគារ ធ្វើទារុណកម្ម ស្រ្តីដែលចូលរួមធ្វើបាតុកម្មតវ៉ាប្រឆាំងអំណាចផ្តាច់ការតាលីបង់។
សម្រាប់អគ្គលេខាធិការអង្គការ Amnesty International លោកស្រី Agnès Callamard អ្វីដែលកំពុងកើតឡើងនៅអាហ្វហ្កានីស្ថាន គឺជាសង្រ្គាមប្រឆាំងមនុស្សស្រី ដែលជាឧក្រិដ្ឋកម្មអន្តរជាតិ ដែលត្រូវបានរៀបចំ ជាប្រព័ន្ធ និងបែករីកសាយ ទៅគ្រប់ទីកន្លែងក្នុងប្រទេសអាហ្វហ្កានីស្ថាន។
នៅក្នុងរបាយការណ៍ដែលមានឈ្មោះថា តាលីបង់ធ្វើសង្រ្គាមប្រឆាំងស្រ្តី អង្គការការពារសិទ្ធិមនុស្ស Amnesty International និងគណៈកម្មការអន្តរជាតិដើម្បីយុត្តិធម៌ ដកស្រង់លក្ខន្តិកៈរបស់តុលាការព្រហ្មទណ្ឌអន្តរជាតិដែលថា ការធ្វើទុក្ខបុកម្នេញដោយផ្អែកទៅលើយេនឌ័រ គឺជាឧក្រិដ្ឋកម្មប្រឆាំងមនុស្សជាតិ។ អង្គការទាំងពីរខាងលើបានទាមទារសុំឲ្យតុលាការព្រហ្មទណ្ឌអន្តរជាតិ នៅទីក្រុងឡាអេ ស៊ើបអង្កេតទៅលើការធ្វើទុក្ខបុកម្នេញលើមនុស្សស្រីនៅអាហ្វហ្កានីស្ថាន ដើម្បីអូសកអ្នកទទួលត្រូវមកកាត់ទោសតាមច្បាប់អន្តរជាតិ។
តាមរបាយការណ៍របស់អង្គការការពារសិទ្ធិមនុស្ស រដ្ឋាភិបាលផ្តាច់ការតាលីបង់សព្វថ្ងៃ កំពុងរំលោភសិទ្ធិមនុស្សធ្ងន់ធ្ងរនៅអាហ្វហ្កានីស្ថាន ដូចជា ប្រហារជីវិតមនុស្សក្រៅតុលាការ ធ្វើទារុណកម្ម សងសឹកបាញ់សម្លាប់អ្នកដែលធ្លាប់ធ្វើការឲ្យរដ្ឋាភិបាលមុន និងតាមប្រមាញ់ ធ្វើបាបក្រុមអ្នកស្រឡាញ់ភេទដូចគ្នា និងសកម្មជនសិទ្ធិមនុស្ស។
គួរបញ្ជាក់ថា អាហ្វហ្កានីស្ថានមិនបានផ្តល់សច្ចាប័នលើសន្ធិសញ្ញាអន្តរជាតិ ក្រុងរ៉ូម ដែល បង្កើតតុលាការព្រហ្មទណ្ឌអន្តរជាតិ ប៉ុន្តែ បានទទួលស្គាល់សមត្ថកិច្ចរបស់តុលាការ នៅឆ្នាំ ២០០៣ ដែលបានបើកផ្លូវឲ្យមានការស៊ើបអង្កេតទៅលើករណីឧក្រិដ្ឋកម្មសង្រ្គាម ដែលប្រព្រឹត្តឡើង តាំងពីឆ្នាំ ២០០៣ នៅអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ