កូរ៉េខាងត្បូងបាញ់បង្ហោះរ៉ុកកែតអវកាស នាំយកផ្កាយរណបទៅលើ បានដោយជោគជ័យ
បន្ទាប់ពីបានពន្យាពេលមួយថ្ងៃ ដោយសារបញ្ហាបច្ចេកទេស ទីបំផុតកូរ៉េខាងត្បូង បានបាញ់បង្ហោះរ៉ុកកេតអវកាសរបស់ខ្លួន បានដោយជោគជ័យ កាលពីថ្ងៃព្រហស្បតិ៍ទី២៥ឧសភា។ រ៉ុកកែតអវកាស ដែលជាបច្ចេកវិទ្យាសុទ្ធសាធរបស់កូរ៉េខាងត្បូងនេះ បាននាំយកនូវផ្កាយរណបជាច្រើនគ្រឿងឡើងទៅលើ ដែលនេះគឺជាលើកទីមួយហើយ សម្រាប់វិស័យអវកាសរបស់កូរ៉េខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
រ៉ុកកែតអវកាស ឈ្មោះ Nuri ដែលស្ថាបនាឡើងដោយបច្ចេកវិទ្យារបស់កូរ៉េខាងត្បូងទាំងស្រុង ត្រូវបានបាញ់បង្ហោះសាកល្បងលើកទី១ ដោយបរាជ័យកាលពីប៉ុន្មានឆ្នាំមុន មុននឹងបានជោគជ័យនៅឆ្នាំ២០២២ ជាមួយនឹងការភ្ជាប់ដាក់យកទៅជាមួយនូវផ្ការណបសាកល្បង។ លើកនេះគឺជាលើកទី៣ ដែលកូរ៉េខាងត្បូង បានបាញ់បង្ហោះរ៉ុកកែតអវកាស Nuri ហើយការបាញ់បង្ហោះនេះបានជោគជ័យ។ ក្រុមអ្នកជំនាញកូរ៉េ បានចំណាយពេលប្រមាណជាង១០ឆ្នាំ និងប្រាក់ចំនួន ២០០០ពាន់លានវុន ស្មើនឹង ១៤០០លានដុល្លារ ដើម្បីអាចស្ថាបនា យានរ៉ុកកែត Nuri ដែលមានទំងន់២០០តោន និងប្រវែង៤៧ម៉ែត្រ។
យោងតាមរូបភាពផ្សព្វផ្សាយទីភ្នាក់ងារស្រាវជ្រាវអវកាសកូរ៉េខាងត្បូង រ៉ុកកែត Nuri បានហោះចេញពីស្ថានីយអវកាស Naro បានប្រមាណ៥នាទី ក្នុងរយៈកំពស់ ៣០០គីឡូម៉ែត្រ ហើយបន្ទាប់មក បានផ្តាច់ខ្លួនចេញពីផ្នែកទី២នៃតួខ្លួនរ៉ុកកែត។ យ៉ាងហោចណាស់ ប្រជាជនកូរ៉េខាងត្បូង ចំនួន២សែននាក់ បានតាមដានការផ្សាយបន្តផ្ទាល់នៃការបាញ់បង្ហោះ ជាទីមោទនភាពជាតិនេះ។
លោក Ko Jeong Hwan នាយកកម្មវិធីស្រាវជ្រាវរ៉ុកកែត នៅវិទ្យាស្ថានស្រាវជ្រាវអវកាសកូរ៉េ បានឲ្យដឹងថា រ៉ុកកែត Nuri បានហោះនាំយកផ្កាយរណបចំនួន៨គ្រឿងឡើងទៅលើខ្សែអកប៊ីត។ ក្នុងចំណោមនេះ គឺមានផ្កាយរណបមួយជាប្រភេទផ្កាយរណបពាណិជ្ជកម្ម ដែលជាបច្ចេកវិទ្យារបស់កូរ៉េខាងត្បូងសុទ្ធសាធតែម្តង ស្ថាបនាឡើងដោយវិទ្យាស្ថានជាន់ខ្ពស់កូរ៉េផ្នែកវិទ្យាសាស្ត្រនិងបច្ចេកវិទ្យា។ ផ្កាយរណបនេះ មានឈ្មោះថា NEWTSat 2 ទំងន់១៨០គីឡូក្រាម ដែលត្រូវដាក់ឲ្យអណ្តែតលើខ្សែអកប៊ីត ដែលមានរយៈកំពស់ប្រមាណ ៥៥០គីឡូម៉ែត្រពីផែនដី។ ផ្កាយរណបពាណិជ្ជកម្មនេះ បំពាក់ដោយប្រព័ន្ធរ៉ាដាទំនើបចុងក្រោយបំផុត ដែលអាចថតរូបភាពយ៉ាងច្បាស់ក្រៃ ទោះបីជាស្ថិតក្នុងលក្ខខណ្ឌឧុតុនិយមយ៉ាងណាក៏ដោយ។
គួរកត់សំគាល់ថា កូរ៉េខាងត្បូងជាប្រទេសឈានមុខគេមួយ ផ្នែកបច្ចេកវិទ្យាទំនើបជាទូទៅ។ ក៏ប៉ុន្តែ ទាក់ទិននឹងវិស័យស្រាវជ្រាវអវកាសវិញ កូរ៉េខាងត្បូងហាក់ដើរក្រោយគេឆ្ងាយ។ ការបាញ់បង្ហោះយានរ៉ូកែត Nuri ដែលជោគជ័យនាពេលនេះ គឺជាការបោះជំហានថ្មីសម្រាប់ប្រទេសមហាអំណាចអាស៊ីមួយនេះ នៅក្នុងវិស័យបច្ចេកវិទ្យាអវកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ