ព្យុះ ម៉ូខា ដ៏កំណាច កំពុងបោកបក់លើបង់ក្លាដែសនិងភូមា
ស៊ីក្លូនម៉ូខា បានចាប់វាយបោកបក់លើឆ្នេរបង់ក្លាដែស និងភូមា នៅរសៀលថ្ងៃអាទិត្យនេះ។ ម៉ូខា បានគាស់រំលើងដើមឈើ បានគួចយកជម្រករបស់ជនជាតិភាគតិចរ៉ូហ៊ីងយ៉ា និងបង្កឱ្យសមុទ្ទជន់ជោរយ៉ាងខ្លាំង លើតំបន់ឆ្នេរ។ បើតាមអ្នកជំនាញអាកាសធាតុត្រូពិកអាមេរិក កាន់តែខិតមកជិតដល់ដី ម៉ូខា កាន់តែកំណាចខ្លាំងឡើង ដែលអាចប្រៀបនឹងខ្យល់ព្យុះអ៊ូរ៉ាហ្កង់កំរិតទី៥បាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ជាមួយនឹងកម្លាំងខ្យល់បោកគួចដល់ ២៥៩គីឡូម៉ែត្រក្នុងម៉ោង និងចុះថយមកត្រឹម១៩៥គីឡូម៉ែត្រក្នុងម៉ោង នៅពេលប៉ះដែនទ្វីប ព្រមទាំងផ្ទាំងរលកសមុទ្ទកម្ពស់ដល់៤ម៉ែត្រ ព្យុះម៉ូខា គឺស៊ីក្លូនដ៏កំណាចបំផុត ស្មើនឹងព្យុះអ៊ូរ៉ាហ្កង់កំរិត៥ កំរិតអតិបរិមា បើគិតតាមមាត្រដ្ឋានSaffir-simpson។ នេះបើតាមភ្នាក់ងារអាកាសធាតុត្រូពិកអាមេរិក។
ម៉ូខា ត្រូវបន្តដំណើរបក់ឆ្ពោះទៅទិសខាងជើង ឆៀងឦសាន ក្នុងប្រវែងអង្កត់ផ្ចិត៧៥គីឡូម៉ែត្រ ពោលគឺចន្លោះរវាងតំបន់ Cox’s Bazar នៅបង់ក្លាដែស ទីដែលមានជនភៀសខ្លួនរ៉ូហ៊ីងយ៉ា ១លាននាក់រស់នៅ និង តំបន់ ស៊ីតវេ ប្រទេសភូមា ។
បើតាមរូបភាពបង្ហោះតាមបណ្តាញសង្គម ផ្លូវថ្នល់បានក្លាយជាទឹកជ្រោះ ទឹកចាប់ជន់ឡើង ដើមឈើត្រូវរលើងដួល ចរាចរណ៍ត្រូវផ្អាក រលកសមុទ្ទទាំងផ្ទាំងៗកំពុងវាយបោកនិងជន់ជោរលើតំបន់ឆ្នេរ ប្រជាពលរដ្ឋត្រូវបង្ខំចិត្តរត់រកកន្លែងជម្រកការពារខ្លួន។ នៅរដ្ឋរ៉ាក់ឃីន ប្រទេសភូមា លំនៅដ្ឋានរបស់ជនភៀសខ្លួនរ៉ូហ៊ីងយ៉ា ត្រូវប៊ើងកួចទៅតាមកម្លាំងខ្យល់ ប្រជាជនរាប់សិបនាក់ប៉ងនាំគ្នារត់គេចព្យុះ តែមិនមែនជាការងាយទេ ព្រោះតំបន់នេះបានធ្លាក់ក្នុងភាពវឹកវរខ្លាំង តាំងពីក្រុមយោធាឡើងកាន់អំណាចមក។ កម្មវិធីស្បៀងអាហារពិភពលោក ធានាត្រៀមជួយសង្គ្រោះពលរដ្ឋប្រមាណ ៤សែននាក់។ អង្គការកាកបាទក្រហមភូមាសេចក្តីថ្លែងការណ៍ត្រៀមធ្វើសកម្មភាពប្រឈមនឹងភាពបន្ទាន់ខ្លាំងនេះដែរ។
នៅបង់ក្លាដែស អាជ្ញាធរបានជម្លៀសប្រជាពលរដ្ឋប្រមាណ១សែន៩ម៉ឺននាក់ពីជំរំ Cox’s Bazar និងជិត១សែននាក់ចេញពីក្រុងមួយទៀតជិតនោះ ទៅរកទីទួលមានសុវត្ថិភាព គេចពីខ្យល់ព្យុះស៊ីក្លូន ម៉ូខា តាំងពីថ្ងៃសៅរ៍មក។ ប៉ុន្តែផុតពីកម្លាំងបោកបក់របស់ស៊ីក្លូន ដែលបង្កឱ្យមានភ្លៀងធ្លាក់យ៉ាងជោគជាំនោះ តំបន់រងគ្រោះបង់ក្លាដែសនេះត្រូវគ្រោះហូរបាក់ដី សង្កត់លើជំរំជនភៀសខ្លួនរ៉ូហ៊ីងយ៉ា ដែលសង់លើជម្រាលកូនភ្នំ និងដែលធ្លាប់រងគ្រោះបែបនេះជាញឹកញយស្រាប់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ