តើអ្វីខ្លះជាគ្រោះថ្នាក់នៃ ព្យុះស៊ីក្លូន ដែលបង់ក្លាដែស និងភូមា កំពុងត្រៀមប្រឈម ?
អាជ្ញាធរភូមានិងបង់ក្លាដែស បានរួសរាន់ជម្លៀសប្រជាពលរដ្ឋទៅរកទីទួលមានសុវត្ថិភាព គេចពីខ្យល់ព្យុះស៊ីក្លូន ម៉ូខា (Mocha) ដែល នឹងវាយបោកបក់លើបង់ក្លាដែស និងភូមា នៅរសៀលថ្ងៃអាទិត្យទី ១៤ឧសភា ក្នុងល្បឿនប្រមាណ២២០គីឡូម៉ែត្រក្នុងម៉ោង។ នៅភូមា រដ្ឋាភិបាលសឹកភូមាមានចំណាត់ការជម្លៀសប្រជាពលរដ្ឋរស់នៅតាមឆ្នេរប្រមាណ មួយសែននាក់កន្លះ ... តាំងពីថ្ងៃសៅរ៍មក។ ជើងហោះហើរអន្តរជាតិត្រូវផ្អាករហូតដល់ថ្ងៃចន្ទ។ ចំណែកនៅបង់ក្លាដែស អាជ្ញាធរបានចាត់វិធានការប្រមូលជនភៀសខ្លួនរ៉ូហ៊ីងយ៉ា ចេញពីជំរំរខេករខាកដែល ស្ថិតនៅចំផ្លូវខ្យល់ព្យុះ សំដៅទៅកាន់មជ្ឈមណ្ឌលរបស់សហគមដែលមានរចនាសម្ព័ន្ធរឹងមាំល្អ។ បើតាមឧតុនិយមឥណ្ឌា ម៉ូខា ជាខ្យល់ព្យុះស៊ីក្លូន ដ៏មហាកំណាចបំផុតមួយ ដែលគេមិនធ្លាប់ជួបប្រទះអស់ជាច្រើនឆ្នាំមកហើយ និងជាព្យុះដំបូងប្រចាំរដូវតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១៨
ឈ្មោះជាព្យុះស៊ីក្លូន កកើតឡើងនៅមហាសមុទ្ទឥណ្ឌា ម៉ូខាបានពាំនាំមកជាមួយនូវកម្លាំងខ្យល់បោកបក់ក្នុងល្បឿន២២០គីឡូម៉ែត្រក្នុងមួយ និងអាចចុះថយកម្លាំងបន្តិចនៅពេលមកប៉ះដីគោក។ ប៉ុន្តែក្រៅអំពីកម្លាំងខ្យល់ដ៏កំណាច គ្រប់ស៊ីក្លូនសុទ្ធតែអាចបង្កឱ្យមានមហន្តរាយទឹកជំនន់មរណៈដ៏ខ្លាំងក្លា។ ស៊ីក្លូនខ្លះអាចធ្វើទឹកសមុទ្ទជោរឡើង និងមានរលកជាផ្ទាំងៗកម្ពស់រាប់ម៉ែត្រវាយចូលមកលើតំបន់ឆ្នេរ ជាច្រើនសិបគីឡូម៉ែត្រ។ បើតាមឧតុនិយមឥណ្ឌា ស៊ីក្លូន ម៉ូខា នឹងបង្កឱ្យមានរលកព្យុះ អាចដល់បីម៉ែត្រ វាយបោកលើតំបន់ទំនាបឆ្នេរខាងលិចភូមា និងបង់ក្លាដែស។
តំបន់រងការគំរាមកំហែងព្យុះស៊ីក្លូនម៉ូខា ជាកន្លែងងាយរងគ្រោះព្យុះភ្លៀងស្រាប់ ពីខែមេសាដល់ខែធ្នូ ព្រោះមានរយៈកម្ពស់សទាប មានស្ថានភាពមានទីតាំងភូមិសាស្ត្រជាតំបន់ឆ្នេរ ចុងបំផុតរបស់ឈូងសមុទ្ទបង់ហ្កាល់ និង មានដង់ស៊ីតេប្រជាជនខ្ពស់ខ្លាំងទៀត។ ខែឧសភា និងវិច្ឆិកា ជារដូវដែលមានព្យុះកំណាចខ្លាំង ជាងគេនៅឈូងសមុទ្ទបង់ហ្កាល់និងសមុទ្ទអារ៉ាប៊ី។ នេះបើតាមអង្គការឧតុនិយមពិភពលោក។
ឈូងសមុទ្ទបង់ហ្កាល់ មានផ្តុំគ្រប់លក្ខខណ្ឌដែលងាយនឹងបង្កបង្កើតឱ្យមានព្យុះស៊ីក្លូន មានជាអាទិ៍សីតុណ្ហភាពដ៏ខ្ពស់នៃផ្ទៃទឹកសមុទ្ទ។ ហើយស៊ីក្លូនកាន់តែកំណាចខ្លាំងឡើងៗ នារយៈពេលប៉ុន្មានឆ្នាំចុងក្រោយមកនេះ ក៏ដោយសារតែការប្រែប្រួលអាកាសធាតុ។ ប៉ុន្តែចំនួនជនរងគ្រោះបាត់បង់ជីវិតបានធ្លាក់ចុះ មួយផ្នែកដោយសារតែសំណង់លំនៅដ្ឋានមាំទាំជាងមុនផង និងដោយសារនយោបាយជម្លៀសបង្ការជាមុនផង។
សូមរំលឹកថា កាលពី១៩៧០ ស៊ីក្លូនអមដោយរលកសមុទ្ទជោរខ្លាំងបានវាយបោកបក់លើតំបន់បង់ក្លាដែសបច្ចុប្បន្ននេះសម្លាប់ជីវិតមនុស្សជាងកន្លះលាននាក់។ នៅឆ្នាំ១៩៩៩ មនុស្ស១០ម៉ឺននាក់នៅខេត្តOdishaឥណ្ឌា បានស្លាប់ដោយគ្រោះស៊ីក្លូន។ ខែវិច្ឆិកា ២០០៧ ស៊ីក្លូនSidr បានគួចយកជីវិតមនុស្សអស់ប្រមាណ៤០០០នាក់ និងធ្វើឱ្យភាគខាងត្បូងបង់ក្លាដែស ខូចខាតគិតជាទឹកប្រាក់អស់ជាច្រើនពាន់លានដុល្លារ។ ជាង១៣៨០០០នាក់ ភាគច្រើននៅខាងឆ្នេរភូមា ត្រូវស្លាប់ដោយព្យុះស៊ីក្លូនNargis នាខែឧសភា២០០៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ