ឥណ្ឌូណេស៊ីថ្កោលទោសការវាយប្រហារលើក្បួនរថយន្តដឹកមន្រ្តីទូតអាស៊ាន នៅភូមា
ប្រធានាធិបតីឥណ្ឌូណេស៊ី លោកហ្សូកូ វីដូដូ កាលពីថ្ងៃចន្ទ ទី ៨ឧសភា បាននិយាយថ្កោលទោស ការវាយប្រហារលើក្បួនរថយន្តដឹកមន្រ្តីអាស៊ាន ក្នុងទឹកដីភូមា។ តាមមេដឹកនាំឥណ្ឌូណេស៊ី ក្បួនរថយន្តដឹកមន្រ្តីអាស៊ាន បានរងការវាយប្រហារដោយក្រុមប្រដាប់អាវុធ កាលពីថ្ងៃអាទិត្យ នៅពេលក្បួនរថយន្តធ្វើដំណើរឆ្លងកាត់រដ្ឋស្ហាន ភាគខាងកើតភូមា សម្រាប់បេសកកម្មជំនួយមនុស្សធម៌នៅភូមា។ ភូមាដែល ធ្លាក់ក្នុងជម្លោះប្រដាប់អាវុធ សង្រ្គាមស៊ីវិល ជាង២ឆ្នាំមកនេះ នៅក្រោយរដ្ឋប្រហារយោធាទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី ក្លាយជាប្រធានរឿងនាំមុខ នៅក្នុងជំនួបកំពូលមេដឹកនាំអាស៊ាន ដែលត្រូវប្រព្រឹត្តទៅ នៅប្រទេសឥណ្ឌូណេស៊ី ពីថ្ងៃទី ៩ដល់ថ្ងៃទី ១១ឧសភា។
ចុះផ្សាយនៅថ្ងៃ៖ កែប្រែថ្ងៃទី៖
តាមប្រធានាធិបតីឥណ្ឌូណេស៊ី ក្បួនរថយន្តដែលដឹកមន្រ្តីទូតឥណ្ឌូណេស៊ី និងសិង្ហបុរី រួមទាំងមន្រ្តីសម្របសម្រួលជំនួយមនុស្សធម៌របស់អាស៊ាន ប្រចាំនៅភូមា បានរងការបាញ់ប្រហារពីក្រុមប្រដាប់អាវុធមួយក្រុម នៅក្នុងខណៈពេលក្បួនរថយន្តបើកឆ្លងកាត់ទីក្រុង Taunggyi នៅក្នុងបេសកកម្មផ្តល់ជំនួយមនុស្សធម៌ នៅភូមា។
នៅថ្ងៃចន្ទ លោកប្រធានាធិបតីហ្សូកូ វីដូដូ បាននិយាយថា មន្រ្តីទូតឥណ្ឌូណេស៊ី សិង្ហបុរី និងមន្រ្តីសម្របសម្រួលអាស៊ានបានធ្វើដំណើរទៅផ្តល់ជំនួយមនុស្សធម៌ដល់ប្រជាជនភូមា នៅរដ្ឋស្ហានភាគខាងកើត ភូមា ប៉ុន្តែ ចៃដន្យអាក្រក់ ក្បួនរថយន្តរបស់ពួកគេត្រូវគ្រាប់កាំភ្លើងរបស់ក្រុមប្រដាប់អាវុធមិនស្គាល់មុខមួយក្រុម។ តាមប្រធានាធិបតីឥណ្ឌូណេស៊ី ការបាញ់ប្រហារលើក្បួនរថយន្តដឹកមន្រ្តីទូតអាស៊ាន មិនបានបង្កឲ្យមានគ្រោះថ្នាក់ជីវិតអ្វីឡើយ។
មន្រ្តីយោធាភូមាដែលសុំមិនបញ្ចេញឈ្មោះបាននិយាយប្រាប់ទីភ្នាក់ងារព័ត៌មានបារាំង AFP ថា ពិតជាមានការវាយប្រហារ ទៅលើក្បួនរថយន្តរបស់មន្រ្តីទូតមែន ប៉ុន្តែ គេមិនបានបញ្ជាក់ថា នោះជាស្នាដៃរបស់កងទ័ពភូមា។ ចំណែក រដ្ឋាភិបាលស្រមោលភូមា ដែលរួមបញ្ចូលកងកម្លាំងការពារប្រជាជន ដែលជាក្រុមប្រឆាំងនឹងរដ្ឋប្រហារ និយាយប្រាប់ទីភ្នាក់ងារព័ត៌មានអង់គ្លេស Reuters ថាខ្លួនមិនបានចូលរួម ពាក់ព័ន្ធនឹងការវាយប្រហារទៅលើក្បួនរថយន្តដឹកមន្រ្តីអាស៊ាន។
ទីក្រុង Taunggyiក្នុងរដ្ឋស្ហាន ជាទីដែលក្បួនរថយន្តដឹកមន្រ្តីអាស៊ាន រងការវាយប្រហារ ធ្លាប់ជាកន្លែងស្ងប់សុខ មិនសូវមានកើតមានការប៉ះទង្គិចហិង្សាដូចរដ្ឋផ្សេងទៀត គិតចាប់តាំងពីភូមាធ្លាក់ក្នុងជម្លោះប្រដាប់អាវុធ ដោយសាររដ្ឋប្រហាររបស់មេដឹកនាំយោធា។ ទើបតែនៅខែមីនាកន្លងទៅ ដែលគេប្រទះឃើញសាកសពរបស់មនុស្សប្រមាណ ៣០នាក់ ដែលត្រូវគេសម្លាប់ នៅក្នុងវត្ត។ កងទ័ពភូមា និងក្រុមប្រឆាំងប្រដាប់អាវុធ បានទម្លាក់កំហុសដាក់គ្នាទៅវិញ ទៅមក។ យ៉ាងណាក៏ដោយ របបសឹកភូមាបានរងការថ្កោលទោសពីសហគមន៍ អន្តរជាតិ នៅក្រោយ ការវាយប្រហារផ្លូវអាកាសរបស់កងទ័ពភូមា សម្លាប់ប្រជាជនស៊ីវិលយ៉ាងតិច ១០០នាក់ កាលពីពាក់កណ្តាលខែមេសាកន្លងទៅ។
តាមមន្រ្តីទូតអាស៊ាន វិបត្តិភូមានឹងក្លាយជាប្រធានរឿងនាំមុខគេ នៅក្នុងជំនួបកំពូលមេដឹកនាំអាស៊ាន នៅប្រទេសឥណ្ឌូណេស៊ី នៅសប្តាហ៍នេះ។ នៅក្នុងសេចក្តីថ្លែងការណ៍ព្រាងដែលទីភ្នាក់ងារព័ត៌មានបារាំង AFPបានទទួលអានកាលពីថ្ងៃអាទិត្យ អាស៊ានបានអំពាវនាវឲ្យគ្រប់ភាគីជម្លោះបញ្ឈប់ជាបន្ទាន់ ការប្រយុទ្ធដ៏ហិង្សា ដើម្បីបើកផ្លូវឲ្យមានការចរចា បិទបញ្ចប់ជម្លោះនៅភូមា។ ការអំពាវនាវរបស់អាស៊ានទំនងគ្មានទម្ងន់នយោបាយ ដាក់សម្ពាធទៅលើរបបសឹកភូមា ដែលធ្លាប់បានសន្យារួចហើយថា នឹងបង្រ្កាប កម្ទេចក្រុមប្រឆាំង ឲ្យអស់សិន ទើបរៀបចំការបោះឆ្នោតសភាតាមក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ