ម៉ាឡេស៊ី រំលាយចោល ទោសប្រហារជីវិតដោយស្វ័យប្រវត្តិ
នៅថ្ងៃចន្ទទី ៣មេសា២០២៣នេះ សភាម៉ាឡេស៊ីបានបោះឆ្នោតរំលាយចោលច្បាប់ប្រហារជីវិតជាស្វ័យប្រវត្តិ សម្រាប់បទឧក្រិដ្ឋមួយមួយ។ អង្គការក្រៅរដ្ឋាភិបាលបានអបអរសេចក្តីសម្រេចរបស់ម៉ាឡេស៊ីថាជាការវិវឌ្ឍន៍ដ៏សំខាន់មួយ សម្រាប់តំបន់អាស៊ីអាគ្នេយ៍។
ចុះផ្សាយនៅថ្ងៃ៖
ស្តាប់ - ០១:៤៥
នៅម៉ាឡេស៊ី ជនប្រព្រឹត្តបទឧក្រិដ្ឋដូចយ៉ាង មនុស្សឃាត និងជួញដូរគ្រឿងញៀន ត្រូវទទួលទោសប្រហារជីវិត ដោយស្វ័យប្រវត្តិ។ កន្លងមកចៅក្រមគ្មានជម្រើសអ្វីផ្សេងក្រៅពីដាក់ទោសបែបនេះទេ។ ប៉ុន្តែយើងមិនអាចមើលរំលងសិទ្ធិមានជីវិតរស់នៅរបស់បុគ្គលម្នាក់ៗបានឡើយ ហេតុដូច្នេះហើយបានជាថ្ងៃនេះ សភាម៉ាឡេស៊ីបានអនុម័តច្បាប់ថ្មី រំលាយចោល “ទោសប្រហារជីវិត” ដោយស្វ័យប្រវត្តិ។ នេះជាប្រសាសន៍របស់លោកអនុរដ្ឋមន្ត្រីក្រសួងយុត្តិធម៌ម៉ាឡេស៊ីទៅកាន់អង្គសភា។
ច្បាប់ថ្មី ដែលត្រូវឆ្លងកាត់ព្រឹទ្ធសភាដោយគ្មានឧបសគ្គ មិនលុបចោលទោសប្រហារជីវិតទាំងស្រុងទេ ប៉ុន្តែច្បាប់បានផ្តល់សិទ្ធិឱ្យតុលាការ ចៅក្រម មានលទ្ធភាពដាក់ទោសជនឧក្រិដ្ឋ ក្នុងពន្ធនាគាររយៈពេលយូរ ក្នុងលក្ខខណ្ឌខ្លះ។
សូមបញ្ជាក់ថាតាំងពីឆ្នាំ២០១៨មក ម៉ាឡេស៊ីបានព្យួរការអនុវត្តទោសប្រហារជីវិត ប៉ុន្តែតុលាការបន្តចេញសាលក្រមដាក់ទោសប្រហារជីវិតលើជនល្មើសដដែល។
នាយកអង្គការក្រៅរដ្ឋាភិបាល Humain Right Watch ប្រចាំតំបន់អាស៊ី បានស្វាគមន៍សេចក្តីសម្រេចរបស់ម៉ាឡេស៊ី ថាជាការបោះជំហានអភិវឌ្ឍខ្លួនដ៏សំខាន់មួយ ដែលអាចនឹងជះឥទ្ធិពលគំរូដល់ប្រទេសជិតខាងក្នុងតំបន់ និងក្នុងអាស៊ាន។ រដ្ឋាភិបាលនៃបណ្តាប្រទេសនៅអាស៊ានមួយចំនួនធំ មានជាអាទិ៍សិង្ហបុរី មានច្បាប់ប្រហារជីវិត និងទើបបានប្រហារជីវិតអ្នកទោសជាច្រើន។ បន្ទាប់ពីផ្អាកការប្រហារជីវិតក្នុងអំឡុងពេលផ្ទុះវិបត្តិកូវីដ១៩ ឆ្នាំមុនសិង្ហបុរីបានព្យួរកអ្នកទោស១១នាក់ ភាគច្រើនជាជនជាប់ទោសក្នុងបទជួញដូរគ្រឿងញៀន។ ភូមា ក៏បានចាប់ផ្តើមកាត់ទោសប្រហារជីវិតឡើងវិញដែរ ក្រោយពីអាក់ខានអស់រយៈពេលជាង១០ឆ្នាំ។
ក្នុងចំណោមប្រទេសជាសមាជិកអាស៊ាន មានតែកម្ពុជា និងហ្វីលីពីនប៉ុណ្ណោះ ដែលបានរំលាយចោលទាំងស្រុងទោសប្រហារជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ