វិបត្តិអ៊ុយក្រែន៖ ចិនចេញមុខកាន់តែខ្លាំង ដោយអញ្ជើញថា្នក់ដឹកនាំអឺរ៉ុបទៅប៉េកាំង
គណៈមជ្ឈិមបក្សកុម្មុយនិស្តចិន បើកកិច្ចប្រជុំពេញអង្គ លើកទី២០ នៅរដ្ឋធានីប៉េកាំង។ ប្រធានាធិបតីចិន ស៊ី ជីនពីង ជាប្រធានអង្គប្រជុំបិទទ្វារ ដែលចាប់ផ្តើម ពីថ្ងៃអាទិត្យនេះ និងអូសបន្លាយដល់ថ្ងៃអង្គារ៍ ខាងមុខ។ ដោយឡែក នៅលើឆាកអន្តរជាតិ គឺ ចិន កាន់តែចេញមុខក្នុងវិបត្តិអ៊ុយក្រែនកាន់តែខ្លាំង ដោយបានអញ្ជើញថា្នក់ដឹកនាំនៅអឺរ៉ុប ជាបន្តបន្ទាប់ទៅក្រុងប៉េកាំង។
ចុះផ្សាយនៅថ្ងៃ៖
ស្តាប់ - ០៨:១៣
ដំណើរឆ្ពោះទៅប្រទេសសង្គមជឿនលឿនលើគ្រប់វិស័យ
កិច្ចប្រជុំបើកនៅថ្ងៃអាទិត្យ តែជាការប្រជុំបិទទ្វាររហូតដល់ថ្ងៃអង្គារ៍ ដាច់ខែកុម្ភៈ។ ពេលនេះ គេពុំទាន់ដឹងអ្វីច្រើនចេញពីប្រជុំសម្ងាត់នេះទេ ប៉ុន្តែ អ្វីដែលគេដឹងត្រួសៗ គឺតាមរយៈការប្រកាសឲ្យដឹងជាផ្លូវការ របស់ក្រសួងការបរទេសចិន ។
ជារួម គឺ ការិយាល័យនយោបាយរបស់មជ្ឈិមបក្សកុម្មុយនិស្តចិន នឹងពិនិត្យមើលផែនការសកម្មភាពនយោបាយ នាពេលកន្លងមករបស់រដ្ឋាភិបាលចិន ហើយនិង ពិភាក្សាគ្នាលើគម្រោងការកំណែទម្រង់ស្ថាប័នបក្ស និងកែទម្រង់រដ្ឋ។ នៅក្នុងគម្រោងផែនការសកម្មភាព និងគម្រោងកំណែទម្រង់នេះ គឺចាំបាច់ត្រូវផ្លាស់ប្តូរបេក្ខភាពដឹកនាំខ្លះៗ។ អ្នកខ្លះបានចាត់តាំងទុករួចហើយ តែខ្លះទៀត គេនឹងត្រូវស្នើឡើងនៅក្នុងអង្គប្រជុំតែម្តង។
តាមក្រសួងការបរទេសចិន កម្មវត្ថុនៃកិច្ចប្រជុំរបស់ថ្នាក់ដឹកនាំចិននេះ គឺបន្តការខំប្រឹងប្រែងរក្សាកំណើនសេដ្ឋកិច្ច និង រក្សាលំនឹងសេដ្ឋកិច្ច ហើយធានាស្ថិរភាពសង្គម ដើម្បីបន្តមាគ៌ារដ្ឋ សម្រេចឆ្ពោះទៅ «ប្រទេសសង្គមជឿនលឿនលើគ្រប់វិស័យ»។
ថ្នាក់ដឹកនាំអឺរ៉ុបណាខ្លះ នឹងទៅ ចិន?
ចំពោះសំណុំបញ្ហាអ៊ុយក្រែន ចិន ចេញមុខក្នុងវិបត្តិអ៊ុយក្រែនកាន់តែខ្លាំង។ ប្រមុខការទូតចិន ទើបតែអញ្ជើញទៅរុស្ស៊ី ដើម្បីនិយាយជាមួយប្រធានាធិបតី ពូទីន ហើយ ថ្នាក់ដឹកនាំអឺរ៉ុបវិញ ក៏នឹងសម្រុកបន្តកន្ទុយគ្នាទៅប្រទេសចិន។
ដំណឹងពីដំណើរទស្សនកិច្ចរបស់ថ្នាក់ដឹកនាំស្ថាប័នសហភាពអឺរ៉ុប គឺត្រូវទម្លាយឲ្យដឹងពី ឯកអគ្គរដ្ឋទូតចិនប្រចាំសហភាពអឺរ៉ុប លោក ហ្វុយ កុង (Fu Cong ) ដែលត្រូវកាសែតចិន Global Times ផ្សព្វផ្សាយ។ ក្នុងព័ត៌មាននេះ ឯកអគ្គរដ្ឋទូតចិនប្រចាំសហភាពអឺរ៉ុប ប្រកាសថា ប្រធានគណៈកម្មការអឺរ៉ុប អួរស៊ូឡា វ៉ុនឌែរ ឡេយែន និង ប្រធានក្រុមប្រឹក្សាអឺរ៉ុប ស្ហាល មីស្ហែល អាចនឹងអញ្ជើញទៅ ប្រទេសចិន នៅក្នុងអំឡុងឆមាសទី១ ឆ្នាំ២០២៣។ ដំណើរទស្សនកិច្ចរបស់ថ្នាក់ដឹកកំពូលទាំងពីររបស់សហភាពអឺរ៉ុប នេះ កំពុងតែរៀបចំគម្រោងលម្អិត និងត្រូវចាប់ផ្តើមចាប់ៗនេះ។
ទន្ទឹមនឹងគ្នានេះ នៅថ្ងៃសៅរ៍ នៅកន្លែងពិព័រណ៌កសិកម្មប្រចាំឆ្នាំក្នុងក្រុងប៉ារីស ប្រធានាធិបតីបារាំង អេម៉ានុយអែល ម៉ាក្រុង ក៏ប្រកាសដែរ ថា លោកនឹងអញ្ជើញបំពេញទស្សនកិច្ចនៅប្រទេសចិន នាដើមខែមេសា ខាងមុខ។ មុនដំណើរអញ្ជើញទៅស្រុកចិន ប្រធានាធិបតីបារាំង អំពាវនាវជាថ្មីម្តងទៀត ឲ្យរដ្ឋបាលក្រុងប៉េកាំង ជួយដាក់សម្ពាធលើរុស្ស៊ី ឲ្យបញ្ឈប់សង្គ្រាមឈ្លានពាន និងផ្តើមកសាងសន្តិភាព។
ចំណែក ប្រធានាធិបតីបេឡារុស នឹងចេញទៅមុនគេ ចិនមុនគេ។ តាមគម្រោង លោក អាឡិចសង់ លូកាស្ហេនកូ នឹងអញ្ជើញទៅដល់ ប៉េកាំង នៅថ្ងៃអង្គារ ហើយបន្តបំពេញទស្សនកិច្ចរហុតដល់ថ្ងៃព្រហស្បតិ៍សប្តាហ៍។ បេឡារុស ជាមិត្តរុស្ស៊ី និងបានផ្តល់ចំណែកដីខ្លះ ឲ្យរុស្ស៊ីបាញ់ផ្លោងមីស៊ីល ទៅអ៊ុយក្រែន។
ជាការគួរឲ្យស្តាយ! រដ្ឋមន្រ្តីក្រសួងការបរទេសអាមេរិក អញ្ជើញទៅតំបន់អាស៊ីកណ្តាល នៅដើមសប្តាហ៍ថ្មីនេះ។ បើកុំតែ អាមេរិក និង ចិន ប៉ះសម្តីគ្នារឿងបាឡុងហោះទេ ម្លេះសមនឹងលោក អង់តូនី ប្ល៊ីងកិន ទៅចិនដែរហើយ។
ទោះជាម្តេចក្តី បើពិនិត្យជានិមិត្តរូប គឺ ក្នុងឱកាសខួបមួយឆ្នាំនៃសង្គ្រាមអ៊ុយក្រែន ចិន បានប្រកាសឲ្យថ្នាក់ដឹកនាំរុស្ស៊ីនិងអ៊ុយក្រែន ចរចាគ្នារកសន្តិភាព។ ហើយសកម្មភាពជាបន្ទាប់ ចិនអញ្ជើញនិងហៅ ថ្នាក់ដឹកនាំដែលស្និទខាងអ៊ុយក្រែន និងអ្នកស្និទខាងរុស្ស៊ី ឲ្យទៅប៉េកាំង ដើម្បីពិគ្រោះគ្នាថែមទៀត។
អព្យាក្រឹតរបស់ចិន?
ក្នុងរឿងសង្គ្រាមអ៊ុយក្រែន ១ឆ្នាំមកហើយ ជាផ្លូវការ ចិន ប្រកាន់ជំហរអព្យាក្រឹតរហូតមក។ ប្រទេសចិន មិនដែលសូវមាត់កអ្វីច្រើនទេចំពោះសំណុំរឿងអ៊ុយក្រែន។ ស្តីបន្តោសរុស្ស៊ី ក៏មិនអើពើ និងជាន់ពន្លិចអ៊ុយក្រែន ក៏មិនដែលថា។ ប៉ុន្តែ ជាសកម្មភាព គឺ ចិន តែងតែច្រានចោលគម្រោងការរបស់អន្តរជាតិទាំងឡាយ ដែលចង់ដាក់ទណ្ឌកម្មរុស្ស៊ី និងដែលចិនមានវត្តមាននៅក្នុងជំនុំនោះ។ ជាក់ស្តែង សេចក្តីសម្រេចជាច្រើនរបស់អង្គការសហប្រជាជាតិ។ ថ្ងៃទី២៤ ខួប១ឆ្នាំនៃសង្គ្រាម មហាសន្និបាតអង្គការសហប្រជាជាតិទាមទារឲ្យរុស្ស៊ីដកទ័ពចេញពីអ៊ុយក្រែនជាបន្ទាន់ ប៉ុន្តែចិនមិនបានបោះឆ្នោតគាំទ្រទេ។ នៅថ្ងៃសៅរ៍ ទី២៥ទៀត កិច្ចប្រជុំរដ្ឋមន្ត្រីហិរញ្ញវត្ថុប្រទេសមានសេដ្ឋកិច្ចជឿនលឿនទាំង២០ គឺត្រង់ចំណុចពីសំណុំរឿងអ៊ុយក្រែន គឺសេចក្តីថ្លែងការណ៍រួមទៅមិនរួច។ ទៅមិនរួច ក៏ព្រោះតែ ឥណ្ឌា និង ចិន ជំទាស់។ ប្រភពស្និទ្ធនឹងកិច្ចប្រជុំថ្នាក់រដ្ឋមន្ត្រីហិរញ្ញវត្ថុG20 នៅឥណ្ឌា គឺ សមាជិកកិច្ចប្រជុំ ជំទាស់គ្នា ក្នុងការប្រើពាក្យពេចន៍ «សង្គ្រាមនៅអ៊ុយក្រែន» ឬ «ប្រតិបត្តិសឹកពិសេស»។ ពាក្យទាំងពីរនេះ ប្រទាញប្រទង់គ្នារវាង ការចង់របស់បច្ចិមប្រទេស និង ពាក្យដែលរុស្ស៊ីប្រើជាផ្លូវការសម្រាប់សំដៅទៅលើសង្គ្រាមអ៊ុយក្រែន។
ហេតុអ្វី ចិន សក្តិសមធ្វើជាអ្នកសម្របសម្រួល?
ទី១-ជំហរអ៊ុយក្រែន ចំពោះចិន។ ប្រធានាធិបតី វ៉ូឡូឌីមៀរ ហ្សេឡេនស្គី មានប្រសាសន៍ផ្ទាល់តែម្តង ៖ «ខ្ញុំចង់រំពឹងឃើញថា ចិន នឹងនៅប៉ែកខាងពិភពត្រឹមត្រូវ គឺ នៅខាងយើង! » លោក ហ្សេឡេនស្គី យល់ថា ការលូកដៃរបស់ចិនក្នុងសំណុំរឿងសង្គ្រាមនៅអ៊ុយក្រែន គឺជា«ជំហានវិជ្ជមាន» ហើយប្រធានាធិបតីអ៊ុយក្រែនរូបនេះ ក៏នឹងគ្រោងជួបសំណេះសំណាល់ជាមួយប្រធានាធិបតីចិន នៅពេលខាងមុខដែរ។ ចំណែកជំហររុស្ស៊ី គឺប្រធានាធិបតីរុស្ស៊ី ក៏សរសើរពីការសន្ទុះស្ទារបស់ ចិន ដែរ។
ទី២- សហរដ្ឋអាមេរិក ហាក់ដូចជាបន្ទន់កាយវិការបន្តិចចំពោះចិន។ នៅថ្ងៃសុក្រ ប្រធានាធិបតីសហរដ្ឋអាមេរិក លោក ចូ បៃដិន លើកឡើងផ្ទុយពីការអះអាងទាំងឡាយរបស់កូនចៅក្រោមឱវាទ។ ប្រធានាធិបតី ចូ បៃដិន យល់ថា សហរដ្ឋអាមេរិក នៅមិនទាន់មានភស្តុតាងច្រើនគ្រប់គ្រាន់នៅឡើយទេ ដែលអាចបញ្ជាក់ថា ចិនបានផ្តល់អាវុធទៅឲ្យរុស្ស៊ី ឬនិយាយបែបផ្សេង គេមិនទាន់អាចវិនិច្ឆ័យថា ចិនចូលរួមសកម្មក្នុងសង្គ្រាមអ៊ុយក្រែន ដោយផ្តល់ជំនួយអាវុធឲ្យ រុស្ស៊ី ទេ។
សញ្ញាណទាំងអស់នេះហើយ ដែលហាក់ដូចជាបើកផ្លូវកាន់តែច្រើន ពីតួនាទីរបស់ចិន នៅក្នុងដំណើរការអញ្ជើញថ្នាក់ដឹកនាំរុស្ស៊ីនិងអ៊ុយក្រែន ចូលតុចរចា។ ទោះជាយ៉ាងណាក៏ដោយ គេមិនត្រូវភ្លេចទេ ថាការដោះស្រាយ គឺគួប្បី កុំឲ្យ រុស្ស៊ី របស់លោក ពូទីន បាក់មុខ អាម៉ាសចំពោះប្រជាជាតិខ្លួនឯង និងកុំឲ្យអន្តរជាតិសើចចំអក ឬកាន់តែស្អប់ខ្ពើម ហើយក៏មិនត្រូវឲ្យ ប្រជាជាតិអ៊ុយក្រែន កាន់តែខាតបង់។ អាស្រ័យហេតុនេះ ការរកច្រកផ្លូវកណ្តាលក្នុងរឿងនេះ ពុំមែនជាការងាយស្រួលឡើយ។ ជំហរចិន ស្រដៀងជំហរបារាំង និងអ្នកជំនាញកិច្ចការអន្តរខ្លះផង យល់ថា មានតែផ្លូវមួយទេទើបរកច្រកផ្លូវកណ្តាលបាន នោះគឺការចរចាពិភាក្សាគ្នា ដើម្បីនឹងរកមាគ៌ាសន្តិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ