១ឆ្នាំសង្រ្គាមរុស្ស៊ី-អ៊ុយក្រែន៖មហាសន្និបាតអង្គការសហប្រជាជាតិទាមទារឲ្យរុស្ស៊ីដកទ័ពចេញពីអ៊ុយក្រែនជាបន្ទាន់
នៅថ្ងៃព្រហស្បតិ៍ ទី២៣ កុម្ភៈ ពោលមួយថ្ងៃមុនខួប ១ឆ្នាំនៃសង្រ្គាមរុស្ស៊ីឈ្លានពានអ៊ុយក្រែន មហាសន្និបាតអង្គការសហប្រជាជាតិបានអនុម័តក្នុងសំឡេងភាគច្រើនលើសេចក្តីសម្រេចចិត្តមួយស្តីពីសង្រ្គាមអ៊ុយក្រែន។ នៅក្នុងសេចក្តីសម្រេចចិត្តដែលគ្មានលក្ខណៈបង្ខិតបង្ខំ មហាសន្និបាតអង្គការសហប្រជាជាតិបានទាមទារឲ្យរុស្ស៊ីដកទ័ពចេញពីអ៊ុយក្រែនជាបន្ទាន់ និងអំពាវនាវឲ្យមានសន្តិភាពត្រឹមត្រូវ និងយូរអង្វែង។
ចុះផ្សាយនៅថ្ងៃ៖
ស្តាប់ - ០២:២១
សេចក្តីសម្រេចចិត្តដែលគ្មានការបង្ខិតបង្ខំបានទទួលសំឡេងគាំទ្រចំនួន ១៤១សំឡេង សំឡេងប្រឆាំងចំនួន ៧សំឡេង និងសំឡេងអនុបវាទចំនួន ៣២សំឡេងនៅក្នុងចំណោមសមាជិកទាំង ១៩៣ប្រទេសរបស់អង្គការសហប្រជាជាតិ។ សំឡេងប្រឆាំងទាំង ៧សំឡេងមានរុស្ស៊ី បេឡារុស ស៊ីរី កូរ៉េខាងជើង ម៉ាលី នីការ៉ាហ្កា និងប្រទេសអេលីត្រេ។ ចំណែកចិន និងឥណ្ឌាស្ថិតក្នុងចំណោមប្រទេសដែលបានបោះឆ្នោតអនុបវាទ។ កំណត់សម្គាល់មួយទៀត ចំនួនប្រទេសដែលបានបោះឆ្នោតគាំទ្រសេចក្តីសម្រេចរបស់មហាសន្និបាតអង្គការសហប្រជាជាតិពេលនេះ គឺប្រហាក់ប្រហែលគ្នានឹងចំនួនប្រទេសដែលបានបោះឆ្នោតថ្កោលទោសរុស្ស៊ីដែលបានផ្តាច់យកទឹកដីអ៊ុយក្រែនច្រើនតំបន់កាលពីខែតុលា ឆ្នាំ ២០២២។
នៅក្នុងសេចក្តីសម្រេចចិត្តដែលបានអនុម័តក្នុងថ្ងៃទី២៣ កុម្ភៈម្សិលមិញ មហាសន្និបាតអង្គការសហប្រជាជាតិបានបញ្ជាក់ជាថ្មីពីការគោរពចំពោះបូរណភាពទឹកដីអ៊ុយក្រែន និងទាមទារឲ្យរុស្ស៊ីដកកងកម្លាំងទ័ពរបស់ខ្លួនទាំងអស់ជាបន្ទាន់ចេញពីអ៊ុយក្រែនដោយគ្មានលក្ខខណ្ឌ។ ទឹកដីអ៊ុយក្រែនដែលមហាសន្និបាតចង់និយាយ គឺទឹកដីដែលរុស្ស៊ីទើបបានផ្តាច់យកកាលពីខែតុលា ឆ្នាំ ២០២២។ ទន្ទឹមគ្នានេះ សេចក្តីសម្រេចចិត្តក៏បានអំពាវនាវឱ្យមានការបញ្ឈប់អរិភាព និងគូសបញ្ចាក់ពីភាពចាំបាច់ក្នុងការឈានទៅឲ្យសម្រេចឱ្យបានឆាប់តាមដែលអាចធ្វើទៅបាននូវសន្តិភាពទាំងស្រុង ត្រឹមត្រូវ និងយូរអង្វែងនៅអ៊ុយក្រែនស្របតាមគោលការណ៍នៃធម្មនុញ្ញរបស់អង្គការសហប្រជាជាតិ។
គួរបញ្ជាក់ថា សង្រ្គាមរុស្ស៊ីឈ្លានពានអ៊ុយក្រែនក្នុងរយៈពេល ១ឆ្នាំបានបណ្តាលឲ្យស្លាប់មនុស្សយ៉ាងតិច ៨ ០០៦នាក់ និងរបួស ១៣ ២៨៧នាក់នៅអ៊ុយក្រែន នេះបើតាមតួលេខរបស់អង្គការសប្រជាជាតិ។ តែតួលេខនេះគ្រាន់ជាតួលេខដែលទទួលបាន និងដែលអាចមានច្រើនជាងនេះ។ ក្រៅពីស្លាប់ និងរបួស អង្គការសហប្រជាជាតិបានលើកឡើងពីមានមនុស្សជិត ១៨លាននាក់កំពុងត្រូវការជំនួយបន្ទាន់ និងមានប្រមាណ ១៤លាននាក់បានបម្លាស់ទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ