អតីតស្រ្តីសមាជិកសភាអាហ្វហ្កានីស្ថានត្រូវខ្មាន់កាំភ្លើងបាញ់សម្លាប់
នៅអាហ្វហ្កានីស្ថាន ស្រ្តីអតីតសមាជិកសភាម្នាក់ត្រូវបានក្រុមប្រដាប់អាវុធមួយក្រុមចូលបាញ់សម្លាប់ដល់ក្នុងផ្ទះ នៅទីក្រុងកាប៊ូល នៅយប់ថ្ងៃសៅរ៍ ឈានចូលដល់ថ្ងៃអាទិត្យ។ តាមសេចក្តីប្រកាសព័ត៌មានរបស់ប៉ូលិសតាលីបង់ កាលពីថ្ងៃអាទិត្យ ទី ១៥ មករា អង្គរក្សរបស់ស្រ្តីអតីតសភាអាហ្វហ្កានីស្ថានក៏ត្រូវបានខ្មាន់កាំភ្លើងបាញ់សម្លាប់ ចំណែក បងប្រុសរបស់អតីតអ្នកតំណាងរាស្រ្តរងរបួស នៅក្នុងការវាយប្រហារនៅទីក្រុងកាប៊ូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
អាយុ ៣២ឆ្នាំ Mursal Nabizada និងអង្គរក្សម្នាក់របស់លោកស្រី ត្រូវក្រុមប្រដាប់អាវុធ បាញ់សម្លាប់ នៅក្នុងផ្ទះ នៅទីក្រុងកាប៊ូល កាលពីរាត្រីថ្ងៃសៅរ៍។ តាមលោក Khalid Zadran អ្នកនាំពាក្យរបស់ប៉ូលិសតាលីបង់ កម្លាំងសន្តិសុខបានចាប់ផ្តើមស៊ើបអង្កេត ដោយម៉ត់ចត់ ដើម្បីស្វែងរកមុខឃាតករ និងយកមកផ្តន្ទាទោស នៅចំពោះមុខច្បាប់។
ធ្លាប់កាន់តំណែងជាសមាជិកសភា នៅក្នុងអាណត្តិរដ្ឋាភិបាលអាហ្វហ្កានីស្ថាន តាំងពីឆ្នាំ ២០១៨ លោកស្រី Mursal Nabizadaបានបដិសេធមិនចាកចេញពីប្រទេស នៅពេលពួកតាលីបង់ត្រលប់មកចូលកាន់អំណាច ឡើងវិញ នៅអាហ្វហ្កានីស្ថាន នាខែសីហាឆ្នាំ ២០២១។
នៅក្នុងសារធ្វីតធ័រ លោកស្រី Mariam Solaimankhi ដែលធ្លាប់ជាសហការី សំដែងការគោរពវិញ្ញាណក្ខន្ធរបស់អតីតសមាជិកសភា ដែលលោកស្រីចាត់ទុកជាវីរនារី ក្លាហាន មិនចុះចាញ់ ខ្លាចការគំរាមកំហែង។ តាមលោកស្រី Solaimankhi ស្រ្តីអតីតសមាជិកសភា មានឱកាសចាកចេញពីអាហ្វហ្កានីស្ថាន នៅថ្ងៃដែលពួកតាលីបង់ចូលកាន់អំណាចនៅក្រុងកាប៊ូល ប៉ុន្តែ លោកស្រីបដិសេធមិនរត់ចោលប្រទេស ដើម្បីនៅបន្តការពារបុព្វហេតុប្រជាជនអាហ្វហ្កានីស្ថាន។
ទទួលបានសញ្ញាប័ត្រផ្នែកកិច្ចការរដ្ឋបាល នៅប្រទេសប៉ាគីស្ថាន លោកស្រី Nabizada ក៏ដូចជាស្រ្តីអាហ្វហ្កានីស្ថានផ្សេងទៀតមានឱកាសទទួលបានតំណែងសំខាន់ នៅក្នុងអាណត្តិរដ្ឋាភិបាលអាហ្វហ្កានីស្ថាន ដែលគាំទ្រដោយសម្ព័ន្ធមិត្តអន្តរជាតិ។
នៅអំឡុង ២ទសវត្សរ៍ដែលអាហ្វហ្កានីស្ថានទទួលជំនួយអន្តរាគមន៍ពីកងទ័ពបរទេស នាំមុខដោយអាមេរិក ស្រ្តីអាហ្វហ្កានីស្ថានជាច្រើនត្រូវបានតែងតាំងជាចៅក្រម អ្នកកាសែត ប៉ូលិស និងអ្នកនយោបាយ។ ពួកគេមួយភាគធំ បានសម្រេចចិត្តចាកចោលប្រទេស ចាប់តាំងពីពួកតាលីបង់ត្រលប់ចូលកាន់អំណាចនៅអាហ្វហ្វានីស្ថាន។ ដោយអនុវត្តច្បាប់អ៊ីស្លាមដ៏តឹងតែងឡើងវិញ រដ្ឋាភិបាលតាលីបង់ដែលមិនបានការទទួលស្គាល់ពីអន្តរជាតិ បានត្រលប់មករឹតបន្តឹងបិទសិទ្ធិស្រ្តីមិនឲ្យធ្វើការនៅខាងក្រៅផ្ទះ ហាមឃាត់មិនឲ្យក្មេងស្រីអាចបន្តការសិក្សានៅវិទ្យាល័យ និងនៅមហាវិទ្យាល័យ និងចាប់តម្រូវឲ្យស្រ្តីពាក់ក្រណាត់បិទមុខ នៅទីសាធារណៈ។
ប្រទេសសមាជិកមួយចំនួននៃក្រុមប្រឹក្សាសន្តិសុខរបស់អង្គការសហប្រជាជាតិ កាលពីថ្ងៃសុក្រកន្លងទៅ ធ្លាប់បានអំពាវនាវ ទាមទារឲ្យរដ្ឋាភិបាលតាលីបង់ឈប់រឹតបន្តឹង បិទសិទ្ធិស្រ្តីអាហ្វហ្កានីស្ថាន និងត្រូវបើកផ្លូវ អនុញ្ញាតឲ្យក្មេងស្រីបន្តការសិក្សានៅមហាវិទ្យាល័យឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ