ប្រធានាធិបតីហ្វីលីពីនអញ្ជើញទៅប៉េកាំងដើម្បីពង្រឹងចំណងមិត្តភាពជាមួយចិន
ក្នុងដំណើរទស្សនកិច្ចផ្លូវរដ្ឋ ជាលើកដំបូង ក្នុងប្រទេសចិន លោកប្រធានាធិបតីហ្វីលីពីន ហ្វ៊ែរឌីណង់ ម៉ាកូស ជូញ៉រ បានប្រកាសបង្ហាញសេចក្តីសង្ឃឹមនៅថ្ងៃពុធទី ៤មករានេះថា នឹងអាចពង្រឹងចំណងទំនាក់ទំនងរវាងម៉ានីលនិងប៉េកាំង។ ចិននិងហ្វីលីពីនមានជម្លោះតានតឹងនឹងគ្នាខ្លាំងជុំវិញបញ្ហាសមុទ្ទចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
“ពង្រឹងទំនាក់ទំនងចិន-ហ្វីលីពីន ជាភាពចាំបាច់ទីមួយ” សម្រាប់ក្រុងម៉ានីល។ នេះបើតាមប្រសាសន៍របស់លោកប្រធានាធិបតីហ្វីលីពីន ហ្វ៊ែរឌីណង់ ម៉ាកូស ជូញ៉រ ក្នុងឱកាសជួបប្រជុំជាមួយប្រធានសភាប្រជាមានិតចិនលោក លី ស្ហង់ស្ហូ។ លោកម៉ាកូស ជូញ៉រ ដែលនឹងត្រូវជួបពិភាក្សាជាមួយនឹងសមភាគីចិន លោក ស៊ីជីនពីងដែរនោះ បានបង្ហាញសេចក្តីសង្ឃឹមទៀត ថា ប្រទេសទាំងពីរ ចិននិងហ្វីលីពីន នឹងរឹតចងដោយភាពជាដៃគូដែលនាំដល់ស្ថិរភាពនិងការពង្រឹងសេដ្ឋកិច្ច។
ជាសរុបក្នុងដំណើរទស្សនកិច្ចផ្លូវរដ្ឋដែលនឹងត្រូវបញ្ចប់នៅថ្ងៃព្រហស្បតិ៍ទី៥មករា ចិននិងហ្វីលីពីន មានចុះកិច្ចព្រមព្រៀងទ្វេភាគីចំនួនប្រមាណ១៤កិច្ចសន្យា។ លោកម៉ាកូស ជូញ៉រ ក៏ត្រូវចុះហត្ថលេខា នៅសប្តាហ៍នេះផងដែរលើកិច្ចព្រមព្រៀងបង្កើតខ្សែទំនាក់ទំនងផ្ទាល់ថ្នាក់ក្រសួងការបរទេស ជុំវិញបញ្ហាព្រំដែនទឹក ពោលគឺជុំវិញជម្លោះព្រំដែនក្នុងសមុទ្ទចិនខាងត្បូង។ មុនចេញដំណើរទៅក្រុងប៉េកាំង កាលពីថ្ងៃអង្គារ លោកប្រធានាធិបតីហ្វីលីពីនបានប្រកាសថានឹងជជែកជាមួយសមភាគីចិន ស្តីពីបញ្ហាសន្តិសុខនយោបាយ ជាលក្ខណៈទ្វេភាគី និងជាលក្ខណៈតំបន់។ បញ្ហារវាងប្រទេសទាំងពីរ មិនមែនជាបញ្ហាដែលត្រូវកើតមានឡើងសម្រាប់ប្រទេសជាមិត្តនឹងគ្នាទេ។ នេះជាប្រសាសន៍បន្ថែមរបស់លោក ម៉ាកូស ជូញ៉រ ដោយសង្កត់ធ្ងន់ថា លោកមិនបណ្តោយឱ្យចិនជាន់ឈ្លីសិទ្ធិក្នុងដែនទឹករបស់ហ្វីលីពីន ដូចប្រធានាធិបតីហ្វីលីពីនមុនទេ។
កាលពីសប្តាហ៍មុន រដ្ឋាភិបាលហ្វីលីពីនបានគូសបញ្ជាក់ថា ភាគីទាំងពីរ ត្រៀមរៀបចំបណ្តាញទាក់ទងគ្នាផ្ទាល់ដើម្បីបញ្ចៀសរាល់ការកំហុសឆ្គងផ្នែកគណនាឬទូរគមនាគមន៍ទាក់ទងនឹងសមុទ្ទខាងលិចនៃប្រទេសឬផ្នែកមួយនៃសមុទ្ទចិនខាងត្បូង ដែលហ្វីលីពីន ទាមទារជារបស់ខ្លួន។ ហ្វីលីពីនបានប្រកាសកាលពីថ្ងៃទី ២២ធ្នូ២០២២ បង្កើនវត្តមានយោធាក្នុងសមុទ្ទចិនខាងត្បូង ក្រោយពីបានទទួលព័ត៌មានថាចិនកំពុងរៀបចំដីកោះគ្មានមនុស្សរស់នៅជុំវិញប្រជុំកូនកោះជាប់ជម្លោះស្ព្រាតលី។
ចិនទាមទារគ្រប់គ្រងសមុទ្ទចិនខាងត្បូងស្ទើរទាំងស្រុង និងមិនខ្វល់នឹងសេចក្តីសម្រេចរបស់តុលាការអន្តរជាតិគាំទ្រដោយអង្គការសហប្រជាជាតិកាលពីឆ្នាំ២០១២ ថាជាការទាមទារគ្មានមូលដ្ឋានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ