ជម្លោះសមុទ្រចិនខាងត្បូង៖ ហ្វីលីពីនព្រួយបារម្ភខ្លាំងពីការពង្រីកទឹកដីរបស់ចិន
នៅថ្ងៃពុធ ទី២១ធ្នូ ក្រសួងការបរទេសហ្វីលីពីន បានសម្តែងក្តីព្រួយបារម្ភជាខ្លាំង ចំពោះសកម្មភាពពង្រីកទឹកដីរបស់ចិន និងដែលធ្វើសកម្មភាពចូលរំលោភបំពានដែនកោះរបស់ហ្វីលីពីន។ សេចក្តីព្រួយបារម្ភរបស់រដ្ឋបាលទីក្រុងម៉ានីល គឺបន្ទាប់ពី សារព័ត៌មានអាមេរិក រាយការណ៍ដោយបង្ហាញពីរូបភាពផ្កាយរណប និងដែលបានស្រង់យកប្រភពព័ត៌មានពី រដ្ឋាភិបាលអាមេរិក ទៅបញ្ជាក់ថា ចិនកំពុងសាងសង់កោះថ្មីៗថែមទៀតនៅក្បែរតំបន់ជម្លោះដ៏ប្រទាញប្រទង់គ្នាជាមួយនឹង ហ្វីលីពីន។
ចុះផ្សាយនៅថ្ងៃ៖
ស្តាប់ - ០២:១៤
«យើងព្រួយខ្លាំងណាស់ ព្រោះសកម្មភាពប្រាស់ចាកពីស្មារតីក្រមប្រតិបត្តិសមុទ្រចិនខាងត្បូង និងផ្ទុយពីសេចក្តីវិនិច្ឆ័យ កាលពីឆ្នាំ២០១៦។» នេះជាប្រតិកម្មក្រសួងការបរទេសហ្វីលីពីន នៅក្នុងសេចក្តីថ្លែងការណ៍ ថ្ងៃអង្គារ ដោយបញ្ជាក់ទៀតថា នឹងឲ្យស្ថាប័នភ្នាក់ងារដទៃបើកការស៊ើបអង្កេតបន្ថែម។
តាមព័ត៌មានបរទេស ដែលក្រសួងការបរទេសហ្វីលីពីន យកជាដំណឹងច្បាស់ការណ៍ដែរ គឺថា ចិនបានចាក់សង់កោះសិប្បនិមិត្តថ្មីទៀត នៅចម្ងាយប្រហែលតែ ១៣ គីឡូម៉ែត្រ ពីកោះអូអៃតា (Loaita) ត្រួតត្រាដោយ ហ្វីលីពីន ហើយទីនោះ ចម្ងាយប្រមាណ៤៥០គីឡូម៉ែត្រ ពីកោះធំ ផាលាវ៉ាន របស់ហ្វីលីពីន។
ពីរដ្ឋធានីប៉េកាំង អ្នកនាំពាក្យក្រសួងការបរទេសចិន អ្នកស្រី ម៉ៅ នីង បានឆ្លើយតបទៅវិញថា ព័ត៌មាននេះគ្មានមូលដ្ឋានទាល់តែសោះ។ អ្នកនាំពាក្យរូបនេះអះអាងទៀតថា វឌ្ឍនភាពទូតហ្វីលីពីននិងចិន កំពុងដើរលើផ្លូវល្អ ហើយភាគីទាំងពីរបន្តដោះស្រាយបញ្ហាសមុទ្រ តាមលក្ខណៈសមរម្យ ចេញពីការពិភាក្សាគ្នាដោយមេត្រីភាព។
កាលពីសប្តាហ៍មុន រដ្ឋមន្ត្រីការពារជាតិហ្វីលីពីន បានប្រកាសថ្លែងក្តីបារម្ភម្តងរួចមកហើយ ក្រោយពេលដែលមានសញ្ញាណពីសកម្មភាពនាវាចររបស់ចិនជាច្រើនខុសពីធម្មតា។ រដ្ឋមន្ត្រីការពារជាតិហ្វីលីពីន បានធានាអះអាងប្តេជ្ញាចិត្ត ដោយយកគោលការណ៍ណែនាំរបស់ប្រធានាធិបតីខ្លួន ថា «នឹងមិនព្រមឲ្យទឹកដីបាត់បង់សូម្បីតែមួយថ្នាំងដៃ»។ ទន្ទឹមនឹងនេះ អ្នកនាំពាក្យរដ្ឋាភិបាលអាមេរិក អំពាវនាវឲ្យចិនគោរពច្បាប់បទដ្ឋានអន្តរជាតិ។ ចំណែកឯកអគ្គរដ្ឋទូតចិនប្រចាំរដ្ឋធានីម៉ានីល ប្រតិកម្មតបវិញ ដោយអង្អុរមុខរដ្ឋធានីវ៉ាស៊ីនតោនថាកំពុងតែ«សាបព្រោះភាពចលាចល»។
ក្នុងជម្លោះសមុទ្រចិនខាងត្បូងនេះ គឺ តៃវ៉ាន់ និងប្រទេសជាច្រើនក្នុងតំបន់អាស៊ាន មានហ្វីលីពីន វៀតណាម ម៉ាឡេស៊ី និងព្រុយណេ ត្រូវប្រឈមមុខនឹង ប្រទេសចិន។ ចិន ដែលចេះតែទាមទារដែនកោះ និងសង់កោះសិប្បនិមិត្តបន្ថែមជាបន្ត នៅតំបន់ជម្លោះ។ ចិនក៏បានចាត់ចោលសេចក្តីសម្រេចរបស់តុលាការអន្តរជាតិ កាលពីឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ