សមាជិកសភាអាស៊ានការពារសិទ្ធិមនុស្ស អំពាវនាវឲ្យសង្គ្រោះជនភៀសខ្លួនរ៉ូហ៊ីងយ៉ាដែលអណ្ដែតតែលតោលក្នុងសមុទ្រ
យោងតាមប្រភពព័ត៌មានផ្សេងៗគ្នា គឺមានជនភៀសខ្លួនរ៉ូហ៊ីងយ៉ា យ៉ាងហោច២០០នាក់ កំពុងស្ថិតនៅលើទូកដែលអណ្តែតតែលតោលក្នុងសមុទ្រអង់ដាម៉ាន់ អស់ជាច្រើនសប្តាហ៍មកហើយ។ តំណាងក្រុមការពារសិទ្ធិមនុស្ស នៃសមាជិកសភាអាស៊ាន បានចេញសេចក្តីអំពាវនាវ ឲ្យររដ្ឋាភិបាលប្រទេសអាស៊ានទាំងអស់ ត្រូវតែរួមគ្នាជួយស្រោចស្រង់ជីវិតជនភៀសខ្លួនរ៉ូហ៊ីងយ៉ា ដែលរត់គេចពីការកាប់សម្លាប់នៅភូមា។
ចុះផ្សាយនៅថ្ងៃ៖
ស្តាប់ - ០២:៥២
លោកស្រី Eva Sundari អតីតសមាជិកសភាឥណ្ឌូណេស៊ី និងជាសមាជិកក្រុមសមាជិកសភាអាស៊ានដើម្បីសិទ្ធិមនុស្ស បានថ្លែងអំពាវនាវ កាលពីថ្ងៃអង្គារទី២០ធ្នូ សូមឲ្យប្រទេសអាស៊ាន និងប្រទេសក្នុងតំបន់ទាំងអស់ ត្រូវតែរួមគ្នា បើកប្រតិបត្តិការជួយសង្គ្រោះជីវិតជនភៀសខ្លួនរ៉ូហ៊ីងយ៉ា។ លោកស្រីបន្ថែមថា វាជារឿងគួរឲ្យអាម៉ាសខ្លាំងណាស់ ដែលរដ្ឋាភិបាលបណ្តាប្រទេសអាស៊ាន ឈរឱបដៃមើលជីវិតមនុស្សជាច្រើនរយនាក់ ដែលមានទាំងកុមារតូចៗផងនោះ តែលតោលក្នុងសមុទ្រប្រឈមនឹងសេចក្តីស្លាប់បែបនេះ។
សូមបញ្ជាក់ថា ទូកជនភៀសខ្លួនរ៉ូហ៊ីងយ៉ាងមួយ មានផ្ទុកមនុស្សប្រមាណ២០០នាក់ ក្នុងនោះមានស្ត្រីនិងកុមារច្រើននាក់ ត្រូវគេដឹងថាកំពុងអណ្តែតតែលតោល ក្នុងសមុទ្រអង់ដាម៉ាន់ ចន្លោះរវាងដែនកោះឥណ្ឌា ប្រទេសថៃ ម៉ាឡេស៊ី និងឥណ្ឌូណេស៊ី។ មិនទាន់មានប្រភពបញ្ជាក់ពីទីតាំងជាក់ច្បាស់ ថាទូកនោះស្ថិតនៅកន្លែងណា ហើយបានអណ្តែតតែលតោល តាំងតែពីពេលណានោះទេ។
បើយោងតាមប្រភពពីសកម្មជនរ៉ូហ៊ីងយ៉ា នៅក្រៅប្រទេស ដែលបានទទួលដំណឹង ពីក្រុមគ្រួសារសាច់ញាតិ ដែលស្ថិតនៅលើទូកនោះ បានប្រាប់អ្នកយកព័ត៌មានបារាំង AFP ថាទូកដឹកជនភៀសខ្លួនរ៉ូហ៊ីងយ៉ា ប្រមាណ២០០នាក់នោះ បានអណ្តែតក្នុងសមុទ្រយ៉ាងហោច ២សប្តាហ៍មកហើយ។ ប្រភពមួយទៀត ពីអង្គការ UNHCR បានឲ្យដឹងថា ទូកនោះអណ្តែតតែលតោលក្នុងសមុទ្រ តាំងតែពីចុងខែវិច្ឆិកាម្លេះ។ ប្រភពដដែលនេះ អះអាងទៀតថា កាលពីសប្តាហ៍មុន គេបានជូនដំណឹងមកថា មានមនុស្សស្លាប់ចំនួនយ៉ាងហោច១២នាក់ នៅលើទូកនោះ ខណៈជនភៀសខ្លួនផ្សេងទៀតដែលនៅលើទូកកំពុងប្រឈមគ្រោះថ្នាក់ ដោយគ្មានអាហារ និងទឹកបរិភោគ។
សូមរំលឹកថា បច្ចុប្បន្ននេះមានជនភៀសខ្លួនរ៉ូហ៊ីងយ៉ា ប្រមាណ១លាននាក់ កំពុងរស់នៅក្នុងជំរំនៅឯប្រទេសបង់ក្លាដែស។ ការរស់នៅក្នុងជំរំ ជាមួយនឹងលក្ខខណ្ឌដ៏លំបាកលំបិនបំផុត ខណៈសេចក្តីសង្ឃឹមថាអាចបានត្រលប់ទៅស្រុកភូមិកំណើត នៅរដ្ឋរ៉ាឃីនភាគខាងលិចភូមាវិញ គឺកាន់តែរសាត់បាត់ពន្លឺ។
ប៉ុន្មានខែចុងក្រោយនេះ មានជនភៀសខ្លួនរ៉ូហ៊ីងយ៉ាច្រើនពាន់នាក់ បានប្រថុយជីវិត ជិះទូកឈើរខេករខាក ចាកចេញពីជំរំ ឆ្លងសមុទ្ររាប់ពាន់គីឡូម៉ែត្រ សំដៅមកសុំសិទ្ធិជ្រកកោននៅម៉ាឡេស៊ី និងឥណ្ឌូណេស៊ី។ ជាក់ស្តែង កាលពីថ្ងៃទី៨ធ្នូថ្មីៗនេះ ជនភៀសខ្លួនរ៉ូហ៊ីងយ៉ា ប្រមាណជាង១៥០នាក់ ត្រូវបាននាវាដឹកប្រេងវៀតណាម ស្រង់ពីសមុទ្រ នៅក្បែរឆ្នេរប្រទេសថៃ ហើយបញ្ជូនយកទៅឲ្យអាជ្ញាធរភូមា។ ហើយកាលពីថ្ងៃទី១៨ធ្នូ ឆ្មាំសមុទ្រស្រីលង្កា បានស្រង់ជនភៀសខ្លួនរ៉ូហ៊ីងយ៉ា ចំនួនជាង១០០នាក់។ យោងតាម UNHCR យ៉ាងហោងណាស់ មានជនភៀសខ្លួនរ៉ូហ៊ីងយ៉ា១៦១នាក់ ដែលស្លាប់នៅក្នុងសមុទ្រ ក្នុងឆ្នាំ២០២២នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ