បោះឆ្នោតម៉ាឡេស៊ី៖ អតីតនាយករដ្ឋមន្រ្តីមហាធៀរ អាយុ៩៧ឆ្នាំ វិលមកប្រលូកក្នុងនយោបាយ
អាយុ ជិតសតវត្សរ៍ លោកមហាធៀរ មហាម៉ាត់ ដែលជាអ្នកនយោបាយដ៏វ័យចំណាស់បំផុតរបស់ម៉ាឡេស៊ី បានវិលត្រលប់មកប្រលូកចូលនយោបាយឡើងវិញ។ នៅថ្ងៃសៅរ៍នេះ អតីតនាយករដ្ឋមន្រ្តីវ័យ ៩៧ឆ្នាំ រូបនេះ បានដាក់បេក្ខភាពរបស់លោកសម្រាប់ការបោះឆ្នោតសភា មុនកាលកំណត់ ដែលត្រូវរៀបចំ នៅថ្ងៃទី ១៩វិច្ឆិកា ខាងមុខ។ លោកនាយករដ្ឋមន្រ្តី អ៊ីស្មាអែល សាប្រ៊ី យ៉ាកុប ដែលទើបប្រកាសរំលាយសភា និងប្រកាសការបោះឆ្នោតមុនកាលកំណត់ ក៏បានដាក់បេក្ខភាព ដូចគ្នានឹងលោកអាន់វ៉ា អ៊ីប្រាហ៊ីម មេបក្សប្រឆាំងដ៏លេចធ្លោ នៅម៉ាឡេស៊ី។
ចុះផ្សាយនៅថ្ងៃ៖
ស្តាប់ - ០២:៤២
អាយុ ៩៧ ឆ្នាំ អតីតនាយករដ្ឋមន្រ្តីមហាធៀរ មហាម៉ាត់ ដែលគេចាត់ទុកជាបិតាស្ថាបនិកម៉ាឡេស៊ី សម័យទំនើប បានត្រលប់មកប្រលូកចូលឆាកនយោបាយឡើងវិញ។ នៅថ្ងៃសៅរ៍នេះ លោកមហាធៀរ មហាម៉ាត់ បានធ្វើដំណើរ ទៅអគារដ្ឋាភិបាលនៅលើកោះ Langkawiដើម្បី ដាក់បេក្ខភាពរបស់លោកសម្រាប់ការប្រកួតប្រជែង នៅក្នុងការបោះឆ្នោតសភា ដែលត្រូវប្រព្រឹត្តទៅនៅ ២សប្តាហ៍ខាងមុខ។
មានកាយវិការយឺតៗ ដោយសារតែវ័យចំណាស់ លោកមហាធៀរនៅមានសុខភាពល្អរឹងមាំ។ នៅចំពោះមុខ អ្នកកាសែត និងអ្នកគាំទ្រគណបក្សរបស់លោក គឺគណបក្ស Homeland Fighters លោកមហាធៀរ មហាម៉ាត់និយាយថា លោកនឹងមានសំណាងឈ្នះច្រើន នៅក្នុងការបោះឆ្នោតសភាលើកនេះ។ លោកមហាធៀរបានបញ្ចេញសំណើចផងដែរ នៅពេលលឺពាក្យទាមទារឲ្យចូលនិវត្តន៍។
អតីតនាយករដ្ឋមន្រ្តី លោកមហាធៀរ ដែលធ្លាប់ដឹកនាំធ្វើកំណែទម្រង់នៅម៉ាឡេស៊ី ពីឆ្នាំ ១៩៨១ ដល់ឆ្នាំ ២០០៣ បានត្រលប់មកប្រលូកចូលនយោបាយវិញ នៅឆ្នាំ ២០១៨ ដោយបានពួតដៃជាមួយលោកអាន់វ៉ា អ៊ីប្រាហ៊ីម មេដឹកនាំបក្សប្រឆាំងដើម្បីទម្លាក់រដ្ឋាភិបាលរបស់លោក ណាហ្ស៊ីប រ៉ាហ្សាក់ ដែលរួបរឹតដោយសំណុំរឿងពុករលួយ។
ជាប់ឈ្មោះ ក្នុងកំណត់ត្រាពិភពលោក Guinness World Record ក្នុងនាមជា នាយករដ្ឋមន្រ្តីដ៏ចាស់ជាងគេនៅក្នុងពិភពលោក នៅពេលលោកឈ្នះឆ្នោត និងចូលកាន់តំណែង នៅឆ្នាំ ២០១៨ លោកមហាធៀរ មហាម៉ាត់ បានប្រកាសចុះចេញពីតំណែងនាយករដ្ឋមន្រ្តីម៉ាឡេស៊ី នៅឆ្នាំ ២០២០។
ដោយសារការប្រកាសចុះចេញពីតំណែងនាយករដ្ឋមន្រ្តី របស់លោកមហាធៀរ មហាម៉ាត់ ម៉ាឡេស៊ីបានធ្លាក់ក្នុងវិបត្តិនយោបាយ។ ក្នុងរយៈពេល២ឆ្នាំមកនេះ ម៉ាឡេស៊ីបានផ្លាស់ប្តូររដ្ឋាភិបាលដល់ទៅ៣ដង។ ស្ថិតក្រោមសម្ពាធរបស់គណបក្ស លោកនាយករដ្ឋមន្រ្តី អ៊ីស្មាអែល សាប៊្រី យ៉ាកុបបានប្រកាសរំលាយសភា នៅខែតុលា ដើម្បីរៀបចំការបោះឆ្នោតមុនកាលកំណត់ នៅថ្ងៃទី ១៩វិច្ឆិកា នៅពេលការបោះឆ្នោតផ្លូវការត្រូវគ្រោងធ្វើ នៅខែកញ្ញា ឆ្នាំ ២០២៣។
ការស្ទង់មតិបានបង្ហាញសំឡេងគាំទ្រប្រកៀកប្រកិតគ្នារវាងគណបក្សនយោបាយធំៗចំនួន ៤ នៅក្នុងការបោះឆ្នោតសភាលើកនេះ ដែលនៅក្នុងនោះ នាំមុខដោយគណបក្សរបស់នាយករដ្ឋមន្ត្រី សព្វថ្ងៃ គណបក្សប្រឆាំងរបស់អ៉ាន់វ៉ា អ៊ីប្រាហ៊ីម និងគណបក្សរបស់លោកមហាធៀរ មហាម៉ាត់។ នៅពេលលោកមហាធៀរមានឱកាសឈ្នះឆ្នោត ដើម្បី បានអាសនៈ នៅសភា អ្នកវិភាគមួយចំនួនវាយតម្លៃថា លោកមហាធៀរ មានសំណាងស្តួចស្តើង ដើម្បីត្រលប់មកចូលកាន់តំណែងនាយករដ្ឋមន្រ្តីម៉ាឡេស៊ីជាលើកទី ៣។ នៅម៉ាឡេស៊ី ជាទីដែលយុវជន ជាចំនួនភាគច្រើន នៅក្នុងចំណោមអ្នកចុះឈ្មោះ ថ្មី ៦លាននាក់ ក្នុងចំណោមអ្នកបោះឆ្នោតសរុប ២១លាននាក់ លោកមហាធៀរ ជាអ្នកនយោបាយជាន់ចាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ