ក្រោយបិទបញ្ចប់សមាជបក្សកម្មុយនិស្ត ចិនប្រកាសពីកំណើនសេដ្ឋកិច្ចងើបឡើងវិញនៅត្រីមាសទី៣
នៅក្នុងប្រទេសចិន ស្ថានភាពសុខភាពសេដ្ឋកិច្ចហាក់មានភាពប្រសើរជាងការរំពឹងទុករបស់ក្រុមអ្នកវិភាគ។ តាមទិន្នន័យផ្សព្វផ្សាយដោយការិយាល័យស្ថិតិក្នុងថ្ងៃចន្ទ ទី២៤ តុលា ចិនបានស្គាល់កំណើនសេដ្ឋកិច្ចក្នុងអត្រា ៣,៩% សម្រាប់តីមាសទី៣ ក្រោយពីមានការធ្លាក់ចុះចំនួន ២,៦% នៅត្រីមាសទី២។ គួរបញ្ជាក់ថាតាមធម្មតា ចិនត្រូវផ្សព្វផ្សាយតួលេខកំណើនសេដ្ឋកិច្ចត្រីមាសទី៣ តាំងពីថ្ងៃអង្គារ ទី១៨ តុលាមុនម្ល៉េះ។
ចុះផ្សាយនៅថ្ងៃ៖
ស្តាប់ - ០២:១៨
គេត្រូវរង់ចាំការបិទបញ្ចប់សមាជបក្សកុម្មុយនិស្តលើកទី២០ និងការឡើងកាន់អំណាចអាណត្តិថ្មីជាអគ្គលេខាធិការគណបក្សរបស់លោកស៊ី ជីនពីងទើបរដ្ឋាភិបាលផ្សព្វផ្សាយតួលេខស្តីពីកំណើនសេដ្ឋកិច្ចសម្រាប់ត្រីមាសទី៣។ កំណើនសេដ្ឋកិច្ចចិនក្នុងត្រីមាសទី៣ បានស្ទុះឡើងដល់ទៅ ៣,៩% ពោលខុសពីការព្យាករណ៍ទុករបស់ក្រុមអ្នកជំនាញទាំង ១២នាក់ដែលថាមានត្រឹមតែ ២,៥%។ ការព្យាករណ៍ក្នុងអត្រា ២,៥% ដោយក្រុមអ្នកជំនាញយល់ថា ចិនបន្តអនុវត្តន៍នយោបាយសូន្យកូវីដដែលបានធ្វើឲ្យប៉ះពាល់យ៉ាងខ្លាំងដល់សកម្មភាពសេដ្ឋកិច្ច។
គួរបញ្ជាក់ថា រវាងត្រីមាសទី១ ត្រីមាសទី២ និងត្រីមាសទី៣ ចិនបានស្គាល់កំណើនសេដ្ឋកិច្ចខុសគ្នាឆ្ងាយ។ នៅត្រីមាសទី ១ កំណើនសេដ្ឋកិច្ចដែលចិនទទួលបានមានដល់ទៅ ៤,៨%។ តែបានធ្លាក់ចុះយ៉ាងគំហុកនៅត្រីមាសទី២ ដោយទទួលបានត្រឹមតែ ០,៤%។ ឥឡូវនេះនៅត្រីមាសទី៣ កំណើនសេដ្ឋកិច្ចបានងើបឡើងវិញក្នុងអត្រា ៣,៩%។ « ចាប់ពីពេលនេះតទៅ សេដ្ឋកិច្ចចិនបានស្គាល់សញ្ញាងើបឡើងវិញហើយ » នេះជាការថ្លែងសាទររបស់អ្នកទទួលខុសត្រូវជាន់ខ្ពស់នៃការិយាល័យស្ថិតិ។ ក្រៅពីតួលេខស្តីពីកំណើនសេដ្ឋកិច្ច ចិនក៏បានប្រាប់ពីតួលេខស្តីពីអ្នកអត់ការងារធ្វើដែរ។
ក្នុងខែកញ្ញា ចំនួនអ្នកអត់ការងារធ្វើមាន ៥,៥% ពោលច្រើនជាងកាលពីខែសីហាដែលមានត្រឹម ៥,៣%។ តែតួលេខនេះនៅមិនពេញលេញទេ ព្រោះគេបានរាប់តែចំនួនអ្នកអត់ការងារធ្វើនៅក្នុងទីក្រុងប៉ុណ្ណោះ ពោលមិនបានរាប់បញ្ចូលអ្នកអត់ការងារធ្វើនៅតាមទីជនបទដាច់ស្រយាលឡើយ។ គួរបញ្ជាក់ថា ចិនបានកំណត់គោលដៅកំណើនសេដ្ឋកិច្ចក្នុងអត្រា ៥,៥% សម្រាប់ឆ្នាំ ២០២២។ តែក្រុមអ្នកវិភាគគិតថាមិនអាចសម្រេចបានទេ។ ចំណែកមូលនិធិរូបិយវត្ថុអន្តរជាតិបានព្យាករត្រឹម ៣,២% ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ