ចិនលើកថ្ងៃចេញផ្សាយរបាយការណ៍ស្តីពីកំណើនសេដ្ឋកិច្ច ដោយគ្មានបញ្ជាក់មូលហេតុ
ចិនបានធ្វើឲ្យគេភ្ញាក់ផ្អើល នៅពេលសម្រេចមិនបញ្ចេញតួលេខស្តីពីកំណើនសេដ្ឋកិច្ចប្រចាំត្រីមាស ទី ៣ ទៅតាមកាលកំណត់ ដែលត្រូវធ្វើ នៅថ្ងៃអង្គារទី ១៨ តុលា។ នៅថ្ងៃចន្ទ ការិយាល័យស្ថិតិជាតិរបស់ចិន NBS បានប្រកាសថា ការចេញផ្សារយតួលេខស្តីពីកំណើនសេដ្ឋកិច្ចចិននឹងត្រូវលើកពេល ដោយគ្មានបញ្ជាក់មូលហេតុ។ ការប្រកាសលើកពេលចេញផ្សាយរបាយការណ៍ស្តីពីកំណើនសេដ្ឋកិច្ចចិន ធ្វើឡើងនៅក្នុងកាលៈទេសៈដែលសមាជបក្សកុម្មុយនិស្តចិនកំពុងត្រៀមបើកផ្លូវឲ្យលោកស៊ី ជីនពីង ចូលកាន់តំណែង សម្រាប់អាណត្តិទី៣ នៅចុងសប្តាហ៍នេះ។
ចុះផ្សាយនៅថ្ងៃ៖
ការិយាល័យស្ថិតិជាតិចិនបានប្រកាសលើកពេល ចេញផ្សាយតួលេខកំណើនសេដ្ឋកិច្ច នៅត្រីមាសទី៣ នៅក្នុងខណៈពេល ដែលអ្នកជំនាញព្យាករថា កំណើនសេដ្ឋកិច្ចចិន ពីខែ កក្កដាដល់ខែ កញ្ញាឆ្នាំ នេះ មានកម្រិតទាបបំផុត មិនធ្លាប់មាន គិតចាប់តាំងពីឆ្នាំ ២០២០។
នៅត្រីមាសទី ១ ចិនមានកំណើនសេដ្ឋកិច្ច ប្រមាណ ៤,៨% ប៉ុន្តែ កំណើនសេដ្ឋកិច្ចបានធ្លាក់ចុះ មកនៅត្រឹម ០,៤% នៅត្រីមាសទី២។ អ្នកជំនាញធ្លាប់រំពឹងថា កំណើនសេដ្ឋកិច្ចចិនសម្រាប់ត្រីមាសទី ៣នឹងអាចធ្លាក់ចុះ អាក្រក់បំផុត ដែលចិនមិនធ្លាប់ជួបប្រទះ នៅក្នុងរយៈពេល ៤ទសវត្សរ៍មកនេះ។
ការិយាល័យស្ថិតិ ជាតិចិនប្រកាសលើកពេល មិនចេញផ្សាយតួលេខមិនល្អស្តីពីកំណើនសេដ្ឋកិច្ចចិន នៅចំពេលដែលចិនកំពុងធ្វើសមាជបក្សកុម្មុយនិស្ត បើកផ្លូវឲ្យលោកស៊ី ជីនពីង កាន់អំណាច មួយអាណត្តិបន្តទៀត។ នៅថ្ងៃសុក្រទី ១៤តុលា ការិយាល័យស្ថិតិជាតិចិនធ្លាប់បានប្រកាសផ្អាក ការចេញផ្សាយតួលេខពាណិជ្ជកម្មចិនសម្រាប់ខែកញ្ញា។
សេដ្ឋកិច្ចវិទូមកពីNatixis លោកស្រី Alicia Garcia Herrero វិញ យល់ថា ការដែលការិយាល័យស្ថិតិជាតិចិន មិនចេញផ្សាយ មិនមែនមានន័យតួលេខកំណើនសេដ្ឋកិច្ចមិនល្អនោះទេ ប៉ុន្តែ វាអាចជាសញ្ញាដែលថា នៅក្នុងអំឡុងពេលដែលបក្សកុម្មុយនិស្តកំពុងបើកសមាជ អាជ្ញាធរមិនត្រូវចេញផ្សាយ អ្វីដែលនឹងអាចបង្កការមន្ទិលសង្ស័យ រំខានដល់ដំណើរការជ្រើសតាំងលោកស៊ី ជីនពីងជាប្រធានាធិបតីចិន សម្រាប់អាណតិ្តទី៣។
នៅក្នុងពិធីបើកសមាជបក្ស កាលពីថ្ងៃអាទិត្យ លោកប្រធានាធិបតីស៊ី ជីនពីងបានឡើងនិយាយការពារនយោបាយ កូវីដសូន្យនៅប្រទេសចិន នោះបើទោះបីជាមានការរិះគន់ថា នយោបាយកូវីដសូន្យ បានប៉ះពាល់ខ្លាំងដល់សកម្មភាពសេដ្ឋកិច្ច តាមរយៈការបិទខ្ទប់ ទីក្រុង បិទរោងចក្រ ក្រុមហ៊ុន ដើម្បីទប់ស្កាត់ការឆ្លងរាលដាលជំងឺកូវីដ។ នយោបាយកូវីដ សូន្យ កំពុងដាក់សម្ពាធលើសេដ្ឋកិច្ចរបស់ចិន ដែលកំពុងជួបការលំបាក ដោយសារ ការផ្ទុះវិបត្តិអចលនទ្រព្យ។
ប៉េកាំងធ្លាប់បានដៅចង់បានកំណើនសេដ្ឋកិច្ច ៥,៥% សម្រាប់ឆ្នាំ ២០២២ ប៉ុន្តែ សម្រាប់អ្នកជំនាញ ចិនទំនងមិនអាចសម្រេចតាមគោលដៅរបស់ខ្លួន។ នៅសប្តាហ៍មុន មូលនិធិរូបិយវត្ថុអន្តរជាតិបានទម្លាក់ការព្យាករកំណើនសេដ្ឋកិច្ចរបស់ចិន នៅត្រឹម ៣,៣%នៅឆ្នាំនេះ។
លោក Zhao Chenxin មន្រ្តីជាន់ខ្ពស់របស់គណៈកម្មការទទួលបន្ទុកកំណែទម្រង់ និងការអភិវឌ្ឍជាតិ បាននិយាយប្រាប់អ្នកកាសែតកាលពីថ្ងៃចន្ទថា កំណើនសេដ្ឋកិច្ចរបស់ចិននៅត្រីមាសទី ៣ នៅតែកើនឡើងគួរឲ្យកត់សំគាល់ និងថា គិតជាទូទៅ សេដ្ឋកិច្ចរបស់ចិន នៅល្អត្រដែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ